وتباسى، اسىرەسە انا مەن بالانىڭ دەنساۋلىعى -  ۇلت  ساۋلىعىنىڭ كەپىلى.  باتىس قازاقستان وبلىستىق دەنساۋلىق ساقتاۋ ماماندارى دەموگرافياعا ءدۇمپۋ اكەلەتىن  ۇرپاق وربىتۋگە قابىلەتتى ايەلدەردىڭ دەنساۋلىعىن ءجىتى قاداعالاپ كەلەدى.   

وڭىردە نازىك جاندىلاردىڭ ىشىندەگى 169256-سى   ۇرپاق وربىتۋگە قابىلەتتى ەكەن. ولارعا وبلىس بويىنشا مەديسينالىق ۇيىمداردا  30-عا جۋىق وتباسىن جوسپارلاۋ كابينەتى جۇمىس جاسايدى ەكەن. بۇل كابينەتتە قىز-كەلىنشەكتەر جۇكتىلىكتى جوسپارلاۋدىڭ ماڭىزدىلىعىن ۇعىنىپ، ءتۇرلى تۇقىم قۋالايتىن اۋرۋلار، تۋا پايدا بولاتىن اقاۋلار، جۇقپالى جانە تاعى باسقا دەرتتەر بويىنشا كەڭەس الا الادى. وبلىستىق دەنساۋلىق ساقتاۋ باسقارما باسشىسىنىڭ ورىنباسارى نۇردانات بەركىنعاليدىڭ مالىمەتىنشە، وڭىردە جۇكتى ايەلدەردىڭ 8 %-ى قانازدىق دەرتىمەن ەسەپتە تۇرادى ەكەن. بۇل كەلىنشەكتەر ق ر دەنساۋلىق ساقتاۋ مينيسترلىگىنىڭ 2011 جىلعى 4 قاراشاداعى №786 «تەگىن مەديسينالىق كومەكتىڭ كەپىلدىك بەرىلگەن كولەمىنىڭ شەڭبەرىندە امبۋلاتوريالىق دەڭگەيدە بەلگىلى ءبىر اۋرۋلارى بار  حالىقتى تەگىن قامتاماسىز ەتۋ ءۇشىن دارىلىك زاتتاردىڭ جانە مەديسينالىق ماقساتتاعى بۇيىمداردىڭ جانە مامانداندىرىلعان ەمدىك ونىمدەردىڭ تىزبەسىن بەكىتۋ تۋرالى» بۇيرىعىنا سايكەس تەمىر سۋلفاتى پرەپاراتتارى مەن اسكوربين قىشقىلى، فولي قىشقىلى سەكىلدى دارى-دارمەكتەردى تەگىن پايدالانۋدا. 

سونىمەن قوسا  وڭىردەگى دەنساۋلىق ساقتاۋ ماماندارىنىڭ ايتۋىنشا، قىز-كەلىنشەكتەردىڭ اراسىندا بەلەڭ العان گينەكولوگيالىق دەرتتەردىڭ  ىشىندە جاتىر موينىنىڭ جاراسى، انابەز قوسالقىسىنىڭ قابىنۋى، جاتىر ميوماسى ءجيى كەزدەسەدى ەكەن. اتالمىش دەرتتەرگە جىنىستىق جولمەن تارايتىن ينفەكسيالار، دۇرىس تاماقتانباۋ، نەرۆتىك سترەسستەردەن بولاتىن ەندوكريندىك اۋىتقۋلار، ەكولوگيا جانە  جىنىستىق سەرىكتىڭ كوپ بولۋى سەبەپ بولادى ەكەن. اتالمىش سالا ماماندارى نازىك جاندىلارعا گيگيەنا ساقتاپ، جىلىنا كەم دەگەندە ءبىر رەت گينەكولوگ دارىگەرگە قارالىپ، ىنشىك ءسۇرتىندىسىن تاپسىرۋعا كەڭەس بەرەدى.

گۇلىم اقاپ،

باتىس قازاقستان وبلىسى