الماتىدا پەدياتريا جانە بالالار حيرۋرگياسى ورتالىعىنىڭ اشىلعانىنا 85 جىل تولۋىنا وراي سالتاناتتى جيىن وتەدى. وندا بالالار دەنساۋلىعىنا قاتىستى وزەكتى تاقىرىپتار تالقىلانباق.

قازاق بالالار حيرۋرگياسىنىڭ اتاسى كامال ورمانتايەۆ،  اكادەميك تورەگەلدى شارمانوۆ،  مەديسينا عىلىمدارىنىڭ دوكتورى، پروفەسسور تامارا چۋۆاكوۆا سىندى تانىمال دارىگەرلەر قاتىساتىن جيىندا پەدياتريا جانە بالالار حيرۋرگياسى عىلىمي ورتالىعىنىڭ وتكەنى مەن بۇگىنى، جەتىستىگى مەن دامۋى، ەلىمىزدەگى پەدياتريالىق قىزمەتتىڭ باعىت-باعدارى سارالانباق.

سالتاناتتى جيىن اياسىندا كونفەرەنسيا ءوتىپ، پەدياتريانىڭ وزەكتى ماسەلەلەرى، ونكولوگيالىق، گەماتولوگيالىق كومەك بەرۋدى ۇيىمداستىرۋ، زەرتحانالىق قىزمەتتىڭ، بالالار كارديوحيرۋرگياسى قىزمەتىنىڭ دامۋى، ونكولوگيالىق اۋرۋلارعا شالدىققان بالالاردى وڭالتۋدىڭ بۇگىنگى جاعدايى سىندى بالالاردى ەمدەۋدەگى وزەكتى مەسەلەلەر تالقىلانادى.

مەرەيتويلىق شاراعا انا مەن بالا ساۋلىعىنا ولشەۋسىز ۇلەس قوسقان ارداگەر-دارىگەرلەر، ورتالىقتىڭ سەرىكتەستەرى مەن ارىپتەس-دوستارى، قازاقستاندىق مەديسينالىق مەكەمەلەردىڭ باسشىلارى، پەدياتريا ورتالىعى ۇجىمى مەن باسشىلىعى قاتىسادى.

شارا اياسىندا ورتالىقتا ۇزاق جىلدار قىزمەت اتقارعان، ەل بولاشاعى-بالالار مەن نارەستەلەردى ەمدەپ،  ۇلت دەنساۋلىعىن جاقسارتۋعا ولشەۋسىز ۇلەس قوسقان ارداگەر-دارىگەرلەردى ماراپاتتاۋ ءراسىمى وتەدى.

ايتا كەتەيىك، پەدياتريا جانە بالالار حيرۋرگياسى ورتالىعىنىڭ نەگىزى 1932 جىلى 28 قاراشادا  انا مەن بالا دەنساۋلىعىن قورعاۋ عىلىمي زەرتتەۋ ينستيتۋتى رەتىندە قالانعان. اتالعان ورتالىق بالالاردىڭ دەنساۋلىعىن قورعاۋدا قول جەتكىزگەن جەتىستىكتەرى ءۇشىن حالىقتار دوستىعى وردەنىمەن جانە «ساپا ءۇشىن ەۋروپالىق گران پري» حالىقارالىق بايقاۋىنىڭ  «مەديسينا سالاسىنىڭ كوشباسشىسى» باس جۇلدەسىمەن ماراپاتتالعان. سالتاناتتى شارا 27 قازان كۇنى «پەدياتريا جانە بالالار حيرۋرگياسى  عىلىمي ورتالىعىندا وتەدى.