بۇگىن الماتى قالاسىندا دوستىق ۇيىندە «جاڭعىرۋ 3.0: رۋحاني جاڭعىرۋ» اتتى ساراپشىلار كەزدەسۋلەر سەرياسىنان وڭىرلىك دوڭگەلەك ۇستەل بولىپ ءوتتى، دەپ حابارلايدى Qamshy.kz اقپارات اگەنتتىگى.

اتالمىش شارانى ەۋرازيالىق ينتەگراسيا ينستيتۋتى الماتى قالاسى اكىمدىگىمەن بىرلەسە وتىرىپ ۇيىمداستىردى.

بۇگىنگى شارادا «رۋحاني جاڭعىرۋ» باعدارلاماسىنىڭ باستى جالپىۇلتتىق 6 جوباسىنىڭ ءبىرى بولىپ تابىلاتىن «تۋعان جەر» جوباسىنىڭ الماتى قالاسىندا ىسكە اسىرىلۋ ماسەلەلەرى جايىندا ءسوز قوزعالدى.

دوڭگەلەك ۇستەل بارىسىندا مودەراتور رەتىندە قاتىسقان الماتى قالاسى اكىمىنىڭ ورىنباسارى ارمان ورازباي ۇلى شارا قاتىسۋشىلارىنا ءوزىنىڭ قۇتتىقتاۋ ءسوزىن ارنادى.

ەۋرازيالىق ينتەگراسيا ينستيتۋتى ديرەكتورى ديرەكتورىنىڭ ورىنباسارى ناتاليا كالاشنيكوۆا ءوز سوزىندە اتالمىش ءىس-شارانىڭ رۋحاني جاڭعىرۋ باعدارلاماسىن تالقىلاۋ بويىنشا ينستيتۋت جۇرگىزىپ وتىرعان ساراپشىلىق كەزدەسۋلەر سەرياسىندا نىشاندى ءىس-شارا بولىپ تابىلاتىندىعىن اتاپ ءوتتى. ونىڭ ايتۋىنشا، وسى ۋاقىتقا دەيىن وتكىزىلگەن كەزدەسۋلەر وڭىرلىك ەرەكشەلىكتەردى ەسكەرە وتىرىپ، باعدارلامانىڭ ىسكە اسىرىلۋ بارىسى تۋرالى ساراپشىلاردىڭ، جۇرتشىلىقتىڭ پىكىرىن جيناقتاپ-قورىتۋعا مۇمكىندىك بەرەدى. الماتى – ەرەكشە قالا، ول زيالىلار ەليتاسى شوعىرلانعان جەر، ونى جوبالاردى ىسكە اسىرۋداعى ساپالىق الەۋەت تە، مۇمكىندىكتەر شەڭبەرى دە ايقىن كورسەتىپ تۇر. اتالمىش ينستيتۋت باسشىلىعىنىڭ مالىمدەۋىنشە، ينستيتۋت رەسپۋبليكالىق جانە وڭىرلىك دەڭگەيدە وسىنداي 8 كەزدەسۋ وتكىزگەن.

ناتاليا كالاشنيكوۆانىڭ ايتۋىنشا، باعدارلامانىڭ ءتۇپ نەگىزى – ەل پرەزيدەنتى ۇسىنعان 6 جوبانى ىسكە اسىرۋ ارقىلى قوعامدى سەلقوستىقتان ارىلتىپ، جىگەرلى جەتىلۋ جولىنا ءتۇسىرۋ بولىپ تابىلادى.

«ءدال وسى جوبالار وسىنداي وزگەرۋ پروسەسىن ورگە سۇيرەر لوكوموتيۆتەر بولماق. بۇل رەتتە، باعدارلامانىڭ ءوزى قوعامدىق سانامىزدى، داستۇرلەردى، قۇندىلىقتاردى، ورتاق تاريح پەن تاريحي جادتى ەسكەرە وتىرىپ قالىپتاستىرۋ ىسىندە اۋقىمدى قازاقستاندىق برەندكە اينالىپ وتىر. وسى تۇرعىدان العاندا، «تۋعان جەر» جوباسىنىڭ الماتىدا ىسكە اسىرىلۋى ءبىزدىڭ تۋعان ەلىمىزدىڭ ءيميدجىن قالىپتاستىرۋ مەن نىعايتۋعا، ءوز قالامىزعا، ەلىمىزگە دەگەن ماحابباتىمىزعا ىقپال ەتەتىن جاڭا ماعىنامەن، قايىرىمدىلىق جانە مەسەناتتىق تۇجىرىمدامامەن تولتىرىلادى. ءاربىر قازاقستاندىقتىڭ «رۋحاني جاڭعىرۋ» جوبالارىن ىسكە اسىرۋعا بەلسەنە اتسالىسۋىنىڭ ءوزى جاڭا وي، ۇلتتىق سانانىڭ نىعايتىلۋى بولىپ تابىلادى»، - دەيدى ناتاليا كالاشنيكوۆا.

شارا بارىسىندا الماتى قالاسى بويىنشا رۋحاني جاڭعىرۋ جوبالىق ءوفيسىنىڭ باسشىسى گۇلنار قالەل قىزى قوڭىروۆا «تۋعان جەر» ارنايى جوباسىنىڭ ىسكە اسىرىلۋى تۋرالى» بايانداما جاسادى.

سونىمەن قاتار دوڭگەلەك ۇستەلدە «تۋعان جەر» جوباسىن ىسكە اسىرۋدا وقۋ باعدارلامالارىن دايىنداۋدىڭ ماڭىزىن اتاپ وتكەن تاريحناما، دەرەكتانۋ جانە زاماناۋي ءادىسناما ءبولىمىنىڭ پروفەسسورى، تاريح عىلىمدارىنىڭ دوكتورى احمەت ءۋاليحان ۇلى توقتاباي، سوربوننا-قازاقستان ينستيتۋتى حالىقارالىق قاتىناستار كافەدراسىنىڭ مەڭگەرۋشىسى، ساياسات عىلىمدارىنىڭ دوكتورى، پروفەسسور جومارت قۇدايبەرگەن ۇلى سىمتىكوۆ، «باربانگ» كۇردتەر قاۋىمداستىعىنىڭ پرەزيدەنتى كنياز يبراگيموۆيچ ميرزويەۆ، «اباي اقپارات» قوعامدىق قورىنىڭ ۆيسە-پرەزيدەنتى ايدوس ءامىروللا ۇلى سارىم، ق ر بعم عك فيلوسوفيا، ساياساتتانۋ جانە ءدىنتانۋ ينستيتۋتى ديرەكتورىنىڭ ورىنباسارى سەرىك نۇرمۇراتوۆ جانە وزگە دە جاۋاپتى تۇلعالار سپيكەرلىك ەتتى.

دوڭگەلەك ۇستەلدىڭ جۇمىسىنا عىلىمي-ساراپشىلىق قوعامداستىقتىڭ، ۇەۇ، جەرگىلىكتى اتقارۋشى ورگانداردىڭ، جاس عالىمداردىڭ 100-دەن استام وكىلى قاتىستى.

دوڭگەلەك ۇستەلگە قاتىسۋشىلار «رۋحاني جاڭعىرۋ» باعدارلاماسىن جان-جاقتى تالقىلاۋ، ۇسىنىستار ازىرلەۋ جانە ساپالى تۇردە ىسكە اسىرۋ ءۇشىن وسىنداي سۇحبات الاڭدارى مەن ساراپشىلىق كەزدەسۋلەردىڭ جۇمىسى ماڭىزدى ەكەندىگىن اتاپ ءوتتى.