بۇگىن ءال-فارابي اتىنداعى قازاق ۇلتتىق ۋنيۆەرسيتەتى حالىقارالىق قاتىناستار فاكۋلتەتىنىڭ جانە قازاق-نەمىس ۋنيۆەرسيتەتىنىڭ وتىزدان اسا ستۋدەنتى ادام قۇقىقتارى بويىنشا «ەو شاعىن مودەلى - 2017» ينتەراكتيۆتى ويىنىنا قاتىستى، دەپ حابارلايدى Qamshy.kz اقپارات اگەنتتگى قازاقستانداعى ەو وكىلدىگىنە سىلتەمە جاساپ.

ءىس-شارا قازاقستانداعى ەۋروپالىق وداقتىڭ وكىلدىگى جانە ءال-فارابي اتىنداعى قازۇۋ-مەن بىرگە ۇيىمداستىرىلىپ، ەۋروپالىق وداقتىڭ قازاقستانداعى ادام قۇقىقتارى بويىنشا مەديا ناۋقانى اياسىندا ءوتتى.

«ەو شاعىن مودەلى - 2017» ويىنى بارىسىندا قاتىسۋشى-ستۋدەنتتەر ەو ەلدەرى مەن قازاقستاننىڭ ادام قۇقىقتارى مەن بوستاندىقتارىن قورعاۋ (دەنساۋلىق ساقتاۋ، ءبىلىم بەرۋ، مادەنيەت، سپورت جانە تۋريزم سالالارى) تاقىرىبىندا ىنتىماقتاستىق ماسەلەلەرىن قوزعايتىن ديپلوماتتاردىڭ رولدەرىن سومدادى.

ويىننىڭ نەگىزگى ماقساتتارى ستۋدەنتتەردىڭ ساراپتامالىق قابىلەتتەر، بۇقارا الدىندا سويلەي ءبىلۋ جانە كەلىسسوزدەر جۇرگىزە الۋ داعدىلارىن ارتتىرۋ، زەرتتەۋ جۇرگىزۋدىڭ ءادiستەرى جانە تەحنيكاسىمەن تانىستىرۋ، ولاردىڭ جالپى وي-ورىستەرىن كەڭەيتۋ، سونداي-اق ادام قۇقىقتارىنىڭ باستى قۇندىلىقتارىن ناسيحاتتاۋ بولىپ تابىلادى.

ءىس-شارا ۇيىمداستىرۋشىلارى ويىن سوڭىندا بارلىق قاتىسۋشىلاردى ءتۇرلى سىيلىقتار مەن سەرتيفيكاتتارمەن ماراپاتتاپ، جەڭىمپازدارعا ارنايى سىيلىقتار ۇسىندى.

قازاقستانداعى ەۋروپالىق وداق وكىلدىگىنىڭ باسشىسى، ەلشى ترايان حريستەا مىرزا:  «ەو ادام قۇقىقتارىن ناسيحاتتاۋعا ءارى قورعاۋعا ۇمتىلادى. ءبىز قازاقستانمەن ادام قۇقىقتارى تۋرالى پىكىرتالاستارعا ءتۇرلى فورماتتا قاتىسۋدى جالعاستىرىپ كەلەمىز. بۇگىنگى ستۋدەنتتىك ويىن وسىنداي پىكىرتالاس الاڭدارىنىڭ ءبىرى بولىپ تابىلادى. ستۋدەنتتەردىڭ بۇگىن كورسەتكەن ادام قۇقىقتارى مەن بوستاندىقتارى بويىنشا جوعارى بىلىمدەرىن قۇپتايمىز»، - دەپ اتاپ ءوتتى.

اتالعان شارا قازاقستانداعى ەو وكىلدىگىنىڭ #EU4HumanRights حەشتەگى اياسىندا ۇيىمداستىراتىن ادام قۇقىقتارىنا ارنالعان مەديا-كامپانياسىنىڭ العاشقى ءىس-شاراسى بولىپ تابىلادى.