ەكسپو عاجايىپتار مەكەنى ەدى، 
قىزىعى بەكەردەن دە بەكەر ەدى. 
ءۇش ايدى ءۇيتىپ-بۇيتىپ وتكىزدىك قوي 
شىلقىپ تۇر ەلدىڭ ءقازىر شەكەلەرى.

ءاۋ باستا قوناق كەلمەي قالا ما دەپ، 
ۋايىمداپ جوعارى جاقتىڭ كوكەلەرى. 
اۋىل مەن اۋدانداردان ەل جيناتىپ، 
ماجبۇرلەپ تالاي-تالاي مەكەمەنى.

بارساڭ دا بارماساڭ دا بيلەت ال دەپ، 
ءمۇعالىم، دارىگەردى توپەلەدى. 
نەگىزىندە حالىقتى قيناماي-اق 
اعالار بىلاي ەتسەڭ نە ەتەر ەدى -

وسى ءۇش ايدا ءوتىپتى 500 كونسەرت 
كوبىسى سالت-ساناڭا بوتەن ەدى. 
سونداعى ونەرپاز دەپ جۇرگەندەرىڭ 
شەگىرتكەدەي سەكىرگەن شەتەل ەدى.

كەۋدەسىن اشقان ءارتىس ايەلدەر مەن 
جىرتىلعان دجينسى كيگەن رەپەر ەدى. 
ولاردى شاقىرتپاي-اق ايتىس قىلساق 
ەكسپو ءتىپتى قاتىپ كەتەر ەدى.

سول كەزدە ەشكىم قيناماي اۋىلداعى ەل، 
وزدەرى الىپ ۇشىپ جەتەر ەدى. 
قاراپايىم حالىقتى ماجبۇرلەمەي، 
بيلەتتەر ءوز ەركىمەن وتەر ەدى.

ەكسپو-دا ءبىر ايتىس بولماعانى، 
اعايىن، قىنجىلتادى وتە مەنى. 
ويتكەنى، بار شەتەلدى تاڭقالدىرار 
قازاقتىڭ وسى ەدى عوي جەكە ونەرى. 
ەكسپو بەدەلىڭدى كوتەرگەنمەن 
رۋحىڭدى ۇلتتىق ونەر كوتەرەدى.

جانداربەك بۇلعاقوۆ