ەرتەدە ءبىر پاتشا ءومىر ءسۇرىپتى. سول پاتشانىڭ ەلىن قايىرشىلار جايلاپتى. وسىعان بايلانىستى پاتشا ءامىر ەتىپتى:

كىمدە-كىم قاندايدا ءبىر قايىرشىعا بىردەڭە بەرەتىن بولسا، قولىن شابامىن! - دەپتى.

سول پاتشانىڭ ەلىنە جاقىن جول بويىندا ءبىر ساۋداگەردىڭ كەرۋەنىن قاراقشىلار توناپ كەتىپتى. ءسويتىپ الگى ساۋداگەر اۋىل شەتىندەگى ءبىر ءۇيدىڭ ەسىگىن قاعىپتى. ەسىكتى ءبىر ادەمى قىز اشىپتى. قىزىم، ءبىر ءۇزىم نان مەن ءبىر كەسە سۋ بەرشى! - دەپتى ساۋداگەر.

قىز بولسا پاتشانىڭ جارلىعى تۋرالى ايتىپتى. ەگەر مەن سىزگە بىردەڭە بەرسەم، قولىمنان ايرىلامىن،-دەگەنىندە،مەن قايىرشى ەمەسپىن،ساۋداگەرمىن. جولدا قاراقشىلار كەرۋەنىمدى توناپ كەتتى.

وسى جەرگە 3-4 كۇندە ازەر جەتتىم، - دەپ ساۋداگەر جاعدايىن ايتادى. قىز جانى اشىپ، اللاعا تاۋەكەل ەتىپ، ءبىر كەسە سۋ مەن ەكى كۇلشە نان الىپ شىعىپ بەرىپتى. بۇل اڭگىمە دەرەۋ پاتشانىڭ قۇلاعىنا جەتەدى.

مۇنى ەستىگەن پاتشا اشۋلانىپ، جەندەتتەرىنە، تەز قىزدى تاۋىپ، ەكى قولىن شاۋىپ تاستاۋدى بۇيىرىپتى. جەندەتتەر قىزدى تاۋىپ، ەكى قولىن شاۋىپ تاستاپتى. سودان ءبىراز ۋاقىت وتكەن سوڭ، پاتشا ەل ارالاپ جۇرسە، شەتكى ءبىر ۇيدەن وتە مۇڭدى اۋەن ەستىپتى.

پاتشا الگى ۇيگە ءمان-جايدى ءبىلىپ كەلۋگە ادامدارىن جىبەرىپتى. پاتشانىڭ جىبەرگەن ادامدارى وندا ءبىر وتە ادەمى قىزدىڭ بارىن ايتىپ كەلىپتى. ءبىراق ەكى قولى جوق ەكەن دەپتى. جوعى قالاي، قولسىز تۋىلىپتى ما؟ - دەپ سۇراپتى پاتشا. جوق، ول قىز ءبىر قايىرشىعا تاماق بەرىپ، ءسىزدىڭ امىرىڭىزبەن قولى شابىلعان ەكەن دەپتى. مۇنشا زالىم بولماسام نەتتى؟ - دەپ پاتشا قاپالانىپتى.

سودان پاتشا نەدە بولسا وسى قىزعا ۇيلەنەمىن دەپ شەشىپتى. اقىرى پاتشا قىزعا ۇيلەنىپتى. سوندا دا قىزدىڭ جۇرەگى جىبىمەپتى.قىز پاتشادان ۇلدى بولادى. ءبىراق قىز ول جەردە تۇرعىسى كەلمەي، ءبارىبىر قاشىپ كەتەمىن دەپ ءجۇرىپتى.

ءسويتىپ ءبىر كۇنى تۇندە ۇلىن الىپ سارايدان قاشىپ شىعىپتى. تاۋ-تاستى كەزىپ،ۇزاق جول ءجۇرىپ ءبىر دارياعا كەز بولىپتى. قاتتى شولدەپ سۋ ىشەيىن دەسە قولى جوق ،ەڭكەيىپ سۋ ىشۋگە ىڭعايلانا بەرگەنىندە بالاسى سۋعا ءتۇسىپ كەتىپ، اعا جونەلەدى.

قۇتقارۋعا ەكى قولى جوق،كوككە قاراپ: يا، راببىم، ۇلىمدى قۇتقارا گور!-دەپ، اللاعا جالبارىنىپ، دۇعا جاساپتى. مەيىرىمى شەكسىز اللا سول مەزەتتە ەكى پەرىشتەنى جاراتىپتى. بىرەۋى كەلىپ دۇعا وقىپ، سۋدى ارتقا قاراي اعىزىپ،ۇلىن قۇتقارىپتى. ال ەكىنشى پەرىشتە:

قىزىم، قولىڭدى سۋعا سال!-دەپتى. قىز قولىن سۋعا سالعان ەكەن، اللانىڭ امىرىمەن ەكى قولى كەسىلگەن جەرىنەن ءوسىپ شىعىپتى. اللانىڭ قۇدىرەتىنە رازى بولعان قىز كوككە قاراپ دۇعا جاساپتى.

سول كەزدە الگى ەكى پەرىشتە كەرى قاراي كەتىپ بارا جاتىپتى.جاقسى ادامدار، سىزدەر كىمسىزدەر، سىزدەر ءۇشىن قانداي دۇعا جاساپ، قالاي راحمەتىمدى ايتارىمدى بىلمەي تۇرمىن؟ -دەپ قىز تاڭىرقاپ تۇرىپ قالىپتى.

سوندا ادام كەيپىندەگى ەكى پەرىشتە: سەن ءبىزدى تانىمادىڭ با،ءبىز سەنىڭ ساداقاعا بەرگەن ەكى كۇلشە نانىڭبىز، ءساداقا-تۇرلى بالەنى قايتارادى،- دەپ عايىپ بولىپتى.

سەرىك احمەتوۆتىڭ Facebook پاراقشاسىنان