ءبىرىنشى وقيعانىڭ سيۋجەتى بىلاي ءوربيدى: اتىراۋ قالاسىنىڭ 1978 جىلى تۋعان ب. ەسىمدى تۇرعىنى (ءاتى-جونى وزگەرتىلدى) 16-عا ەندى تولعان قىزىن وزىنەن جاسى ەكى ەسە ۇلكەن ەر ادامعا ەركىنەن تىس تۇرمىسقا بەرىپ جىبەرگەن. سالافيزم اعىمىن ۇستاناتىن اكەنىڭ ويىنشا، ەگەر «دىندەس احيلارى»، ياعني، اعالارى جىنىستىق جەتىلگەن قىز بالاعا كوزى ءتۇسىپ، تۇرمىسقا شىعۋىن سۇراسا، اتا-اناسى قارسىلىق تانىتپاۋى ءتيىس. بۇل جاعدايعا بەيجاي قاراي الماعان كورشىلەرى مەن تۋىستارى قۇقىق قورعاۋ ورگاندارىنا دا حابارلاسقان. ءبىراق، الگى اكەسىماقتى پەرزەنتىنىڭ تاعدىرىنان گورى، ايدالاداعى بىرەۋدىڭ ءسوزى قاتتى الاڭداتاتىنعا ۇقسايدى. ءومىر پاراعىن اشپاي جاتىپ، ەرتە سولعان قىز بالا ءقازىر كەشكى مەكتەپتە وقۋعا ءماجبۇر دەپ جازادى Qamshy.kz اقپارات اگەنتتىگى atr.kz-كە سىلتەمە جاساپ.

ەكىنشى جاعدايدىڭ ورىن العانىنا دا كوپ ۋاقىت وتە قويعان جوق. بۇل جولى پالەنىڭ بارلىعى الەۋمەتتىك جەلىدەن باستالعان. سالافيزم يدەولوگياسىنا ۋلانعان الماتى قالاسىنىڭ وتىز جاستاعى تۇرعىنى «ۆكونتاكتە» جەلىسى ارقىلى 9 سىنىپتا وقيتىن اتىراۋلىق وقۋشى قىزبەن تانىسادى. قىزدىڭ دىنگە قىزىعۋشىلىعىن پايدالانباق بولعان الگى جىگىت «ينتەرنەت ماحاببات» قانا ەمەس، راديكالدىق يدەولوگيا تۋرالى دا كەڭىنەن ناسيحاتتاپ، اقىل توقتاتا قويماعان وقۋشىنىڭ ساناسىن ۋلاي باستايدى. كەيىن ءتىپتى، قىزعا ولەردەي عاشىق ەكەنىن، ەكەۋى ۇيلەنگەن جاعدايدا باقىتتى وتباسى بولاتىندارىن ايتىپ انت-سۋ ىشەدى.

وسىلايشا، ەكى-ۇش ايعا سوزىلعان «ونلاين ماحاببات» الماتىلىق جىگىتتىڭ اتىراۋعا كەلۋىمەن جالعاسادى. «دىندەس» تانىستارىنىڭ جالعان كۋالىك ەتۋىمەن وقۋشى قىزبەن اراداعى نەكەسىن قيعان جىگىت جاعدايدى قۇپيا تۇردە ۇستاۋعا تىرىسادى. سەبەبى، بۇل جاعدايلاردىڭ بارلىعىنان قىزدىڭ اتا-اناسى بەيحابار ەدى. ءسويتىپ، كۇيەۋسىماق العاشقى تۇندەرىن وتكىزۋ ءۇشىن ءقوناقۇيدى جالعا الادى. سول كەزدە «جاس كەلىنشەك» قۋلىققا كوشەدى. ۇيىنەن مەكتەپ كيىمىمەن شىعىپ، «عاشىعى» ەكەۋىنە ارنالعان قوناق ۇيدە ساباق ۋاقىتى بىتكەنگە دەيىن «كوڭىل كوتەرىپ»، كەيىن تۇك بولماعانداي ورالىپ وتىرعان. ارادا ەكى كۇن وتكەننەن كەيىن عانا مەكتەپتەگى ۇستازدارى قىزدىڭ ساباققا كەلمەگەندىگى تۋرالى دابىل قاعادى. وسىدان كەيىن اتا-اناسى بار جاعدايدى انىقتايدى. ءبىراق، بارلىعى كەش ەدى. سەبەبى، ويناپ-كۇلىپ بولعان جالعان «ءدىنشىل» جىگىت الدەقاشان «تالاق» ايتىپ، اجىراسىپ، الماتىعا تايىپ وتىرعان. جىگىتتىڭ ۇستىنەن قىلمىستىق ءىس قوزعاۋعا دا بولار ەدى. ءبىراق، «ولىمنەن ۇيات كۇشتى» دەگەن قازاقتىڭ ۇستانىمىنا بەرىك قىزدىڭ اتا-اناسى ونداي قادامعا بارماي وتىر. ءقازىر وڭباي الدانعان قىز بالا اتىراۋداعى كوللەدجدەردىڭ بىرىنە وقۋعا ءتۇستى.

اتالعان ەكى وقيعاعا بايلانىستى پىكىر بىلدىرگەن اتىراۋ وبلىسى ءدىن ىستەرى باسقارماسىنىڭ باسشىسى قايروللا كوشقالييەۆ، قىزىن اكەسىمەن شامالاس ادامعا ماجبۇرلەپ كۇيەۋگە بەرۋ فاكتىسىن قازىرگى ۋاقىتتا قۇزىرلى ورگانداردىڭ نازارعا العاندىعىن ايتتى. «بۇل جەردە «قىز ءوز ەركىمەن كۇيەۋگە ءتيدى» دەگەن اقپاراتتار دا تاراپ جاتىر. شىندىعىندا، ولاي ەمەس. سەبەبى، سالافيزم اعىمىنىڭ ۇستانۋشىلارى قىزدى كىشكەنتايىنان «16 جاستا كۇيەۋگە شىعاتىن كەز» دەپ تاربيەلەيدى. سوسىن «اكەگە قارسى شىعۋعا بولمايدى» دەگەن كوزقاراسى قالىپتاسقان قىز بالا «كەلىسپەۋ كۇنا ەكەن» دەگەن ويمەن باسىن ءيىپ كەتە بارادى. ال، ەكىنشى جاعدايعا قاتىستى ايتار بولساق، مۇندا وقۋشى قىز وزىنەن 14 جاس ۇلكەن جىگىتتىڭ ويىنشىعىنا اينالىپ وتىر. بۇل جاعدايعا قاتىستى مەكتەپ وقۋشىسىمەن پسيحولوگتار جانە «شاپاعات» ورتالىعىنىڭ تەولوگتارى جۇمىس جاسادى. ناتيجەسىندە ەكىنشى وقيعا كەيىپكەرى كوزقاراسىن وزگەرتىپ، حانافي ءمازحابىن قابىلدادى. بۇل جاعدايعا قىز بالالاردىڭ جەكە تراگەدياسى دەپ قاراۋعا بولمايدى. سەبەبى، اداسۋشىلىقتىڭ سوڭى وتباسى قۇندىلىقتارىنىڭ ابدەن كۇيرەۋىنە اپاراتىنىن كورسەتتى. دەسترۋكتيۆتى كوزقاراستاعى ادامدار ۇيات، ار، بالاسىنا دەگەن اكەلىك ماحاببات سياقتى سەزىمدەردەن دە ادا كەلەدى»،-دەيدى سپيكەر.

بايان اتايمان قىزى