بىزگە ەشتەڭە جاقپايدى. ەشتەڭەگە كوڭىلىمىز تولمايدى. تاماقتىڭ تۇزى جوق، ەتى قاتتى.. كۇن سۋىق، الدە تىم ىستىق.. ادام كوپ، جۇمىس قيىن، جۇمىس اۋىر.. ساباق شارشاتتى.. وزگەنىڭ زاتى جاقسىراق، ءومىرى قىزىعىراق، ءۇيى ۇلكەنىرەك، ايەلى ادەمىرەك...
تاعى نە بار ەدى؟... جالپى تۇسىنىكتى عوي.
ءومىر – بىتپەيتىن پروبلەما. ۇزاق كەپتەلىس. مەزى ەتەدى، شارشاتادى. كۇندەگى كۇيبەڭ تىرىشىلىكتەن جۇيكەڭىز جۇقارادى.
وسىدان كەيىن ورىندالماعان ماقسات، ارمان كۇيىندە قالعان ارماندار تۇنشىقتىرىپ، دوڭبەكشىگەن تۇندەردە ۇيىقتاي الماي بارلىق الەمگە وكپەلى بولىپ جاتاسىز. ودان پايدا جوق بولعان سوڭ، جوعارىدا جازىلعان نارسەلەر باستالادى-اي كەپ..
ارينە، ءسىز مۇنى بايقامايسىز. ءسىز ءۇشىن ءبارى شىنىمەن دە ناشار، ساپاسىز، تاماق ءدامسىز، ءومىر قىزىقسىز، وزگەنىكى جاقسىراق بولىپ كورىنەدى. ءتىپتى، بارلىعى سىزگە تۋرا ءبىر قاساقانا، ادەيى جوسپارلى تۇردە ۇيىمداستىرىلعان سەكىلدى.
وزىنە دەگەن، ومىرىنە دەگەن كوڭىل تولماۋشىلىق ءوزىن قاز-قالپىندا قابىلداي الماعانداردا بولادى. ارينە، اندا-ساندا ءوزىڭدى قالىڭ ورمان ويعا باتىرىپ، ارەكەتتەرىڭدى سارالاپ، ماقساتتارىڭدى جىكتەپ، نىساناڭدى كوزدەپ، دالدەپ، وسى رەتتە وزىڭدەگى كوڭىل تولمايتىن جاقتارىڭا باسا نازار اۋدارىپ وتىرعان دۇرىس. الايدا، بۇل وزىڭە دەگەن كوڭىل تولماۋشىلىعىڭدى بار الەمگە كورسەتۋ كەرەك دەگەن ءسوز ەمەس قوي؟
«قولدا بار التىننىڭ ءقادىرى جوق» دەگەن ماقال بار ەمەس پە ەدى؟ قازەكەم سونى بەكەر ايتپاعان ەكەن. جاقىندا قاتتى سىرقاتتانىپ، جانىم كوزىمە كورىندى. دۇنيەڭ دەگەن تۇك ەمەس ەكەن.. ەشنارسە قاجەت ەمەس بولىپ قالدى. «جازىلسام، بولدى» دەگەن ويدان باسقا ەشتەڭە مازالاعان جوق، سول ساتتە.
ءومىردىڭ ءقادىرىن، دەنساۋلىقتىڭ ءقادىرىن، كورشىنىڭ ەمەس ءوز ۇيىڭدەگى ايەلىڭنىڭ ءقادىرىن تەك جوعالتقاندا عانا بىلەسىڭ. جۇمىر باستى پەندە اتاۋلى وسىنى بىلەدى، ءبىراق تۇسىنبەيدى.
كوپ ادامدار وزدەرىنە نە قاجەت ەكەنىن، ومىرلەرىنە نە سەبەپتى كوڭىلى تولمايتىنىن دا بىلمەيدى.
ەڭ بىرىنشىدەن، ءوزىڭدى بىرەۋمەن، باسقامەن، كورشىمەن سالىستىرۋدى قويۋ كەرەك. سالىستىرۋ دەگەن وتە ناشار نارسە. ول- قىزعانىشتىڭ باسى، باستاۋى. ەگەر ءسىز بىرەۋدىڭ قابىلەتى مىقتىراق ەكەنىن نەمەسە ماتەريالدىق جاعدايىن جاقسىراق دەپ ساناساڭىز، ءسىز ءوزىڭىزدى تومەندەتكەنىڭىز.
«بولماساڭ دا ۇقساپ، ب ا ق
ءبىر عالىمدى كورسەڭىز». دەمەك، ءوزىڭىز مىقتى دەپ ساناعان ادامدى قىزعانعانشا، جاقسى قاسيەتتەرىن ۇيرەنىڭىز.
ادام دامۋ ءۇشىن بويىنداعى قورقىنىشتى جەڭۋ كەرەك. ەشتەڭە ىستەمەگەن ادام عانا شاتاسپايدى. كەيبىر ادامدار تابيعاتىنان قورقىنىش پەن دەپرەسسياعا تۇسۋگە بەيىم بولادى. سوندىقتان تاۋەكەلگە بارۋعا قورقادى.
وزىڭدە باردى قادىرلەمەۋ، وزگەگە قىزىعۋ-بۇگىنگى زاماننىڭ تەندەنسياسى. بۇگىنگى تاڭدا كەڭ قولدانىستاعى الەۋمەتتىك جەلىلەر دە وعان سەبەپ بولۋدا.
ءقازىر بايقاساڭىز، ەكى قۇربى-قۇرداس اراسىنداعى اڭگىمە مىناداي: «كەشە ينستاگراممنان دينارانىڭ دوسى وعان نە سىيلاعانىن كوردىڭ با؟ ال، ادينا بولسا پاريجگە بارىپ قايتىپتى.. داۋلەت كولىگىن اۋىستىرىپتى، مەن بولسام اۆتوبۋسپەن ءجۇرمىن..» دەگەن سياقتىعا اينالعان. بۇل تەك جاستار اراسىندا تارالعان ادەت ەمەس.
بۇل قازىرگى قوعامنىڭ شىندىعى. ادامداردىڭ وزگەلەرگە قاراپ ءومىر ءسۇرۋ، وزگەلەر نە ىستەسە سوعان قاراپ ەلىكتەۋ تەندەنسياسى دامىپ كەلە جاتىر. وزگەلەر دەگەنىمىز – سول ادامدى قورشاعان ادامدار، قوعام.
الدارىڭىزدا، دەگراداسياعا ۇشىراعان قوعام. قاشان ءوزىمىزدىڭ پرينسيپتەرىمىز، جەكە ءوزىمىزدىڭ كوزقاراستارىمىز، ءوزىمىزدىڭ قالاۋىمىز بەن تالعامىمىزبەن ءومىر سۇرەمىز؟ قولداعى التىننىڭ ءقادىرىن قاشان بىلەمىز؟ كورشىڭىز ءسىزدىڭ ايەلىڭىزگە كوز سالعاندا ما؟
نازەركە مۇسا
