الماتىدا تىنىشپايەۆ اتىنداعى قازاق كولىك جانە كوممۋنيكاسيالار اكادەمياسىندا «مەملەكەتتىك تىل-مەنىڭ بولاشاعىم» اقپاراتتىق-ناسيحاتتاۋ شاراسى اياسىندا، قازاقستان رەسپۋبليكاسىنىڭ پرەزيدەنتى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان قازاق ءتىلىن لاتىن الىپبيىنە بىرتىندەپ كوشىرۋ جوباسىن تالقىلاۋ بويىنشا «لاتىن ءالىپبيىنىڭ بۇگىنى مەن كەلەشەگى» تاقىرىبىندا پروفەسسور-وقىتۋشىلارىنىڭ قاتىسۋىمەن كەزدەسۋ ءوتتى، دەپ حابارلايدى Qamshy.kz اقپارات اگەنتتىگىنىڭ ءتىلشىسى.

كەزدەسۋ بارىسىندا ستۋدەنت جاستارعا قازاق قوعامىنداعى ءتىل ساياساتىنىڭ تاريحى، بۇگىنگى قازاق ءتىلىنىڭ دەڭگەيى تۋرالى اقپاراتتار بەرىلىپ، لاتىن الىپبيىنە كوشۋ بارىسىنىڭ  ارتىقشىلىقتارى باياندالىپ، اۋىل شارۋاشىلىعى ماماندىقتارىنا  لاتىن ءالىپبيىنىڭ قاجەتتىلىگى تۋرالى مالىمەتتەر كەلتىرىلىپ، پىكىرلەر ايتىلدى.

ستۋدەنتتەردىڭ پىكىرلەرىن ءبىلۋ ماقساتىندا ستۋدەنتتەرگە سۇراقتار قويىلىپ لاتىن ءالىپبيىنىڭ بۇگىنگى جاعدايى مەن بولاشاعىن قالاي ەلەستەتە الاسىز دەگەن تاقىرىپپەن ەركىن ميكروفون ءساتى ۇيىمداستىرىلدى. 

ايتا كەتەيىك، ەلىمىزدە لاتىن گرافيكاسىنا نەگىزدەلگەن جاڭا قازاق ءالىپبيى بەكىتىلدى. 27 قازان كۇنى مەملەكەت باسشىسى نۇرسۇلتان نازاربايەۆ ءتيىستى جارلىققا قول قويعان.

بۇدان ءبىر كۇن بۇرىن مەملەكەت باسشىسى پرەزيدەنت اكىمشىلىگىنىڭ باسشىسى ادىلبەك جاقسىبەكوۆ پەن پرەزيدەنت اكىمشىلىگى باسشىسىنىڭ ءبىرىنشى ورىنباسارى مارات ءتاجيندى قابىلداعان كەزدە لاتىن قارپىنە نەگىزدەلگەن قازاق ءالىپبيىنىڭ سوڭعى جوباسى قىزۋ تالقىلانىپ، قوعام تاراپىنان قولداۋ تاپقانىن اتاپ وتكەن بولاتىن.

«لاتىن قارپىنە نەگىزدەلگەن قازاق ءالىپبيىنىڭ ۇسىنىلعان جوباسىن بەكىتۋ تۋرالى جارلىق شىعارۋ قاجەت. كوميسسيا جۇمىسىن اياقتادى. سوڭعى نۇسقا جاريالاندى. عالىمدار، ءتىلتانۋشىلار، ساياساتكەرلەر، جاستار جانە قازاقستان حالقى اسسامبلەياسىنىڭ وكىلدەرى ورتاق مامىلەگە كەلدى. جالپى، قوعام قولداپ وتىر»، – دەدى مەملەكەت باسشىسى.

قازاق ءتىلىنىڭ لاتىن ءالىپبيى جوباسى 25 قىركۇيەك كۇنى پارلامەنت ماجىلىسىندە تانىستىرىلعان ەدى. وسىعان بايلانىستى پارالامەنت تىڭدالىمى ۇيىمداستىرىلىپ، وعان بارلىق مۇددەلى تاراپتار قاتىسقان بولاتىن. وتىرىستى اشقان تومەنگى پالاتا سپيكەرى نۇرلان نىعماتۋلين  لاتىن الىپبيىنە كوشۋ ماسەلەسىندە ەشقانداي قاتەلىك بولماۋى كەرەك ەكەندىگىن، ءبىراق تا مۇنى ىسكە اسىرۋ قارقىندى جۇرەتىنىن ايتتى. ونىڭ ايتۋىنشا، لاتىن ارپىنە نەگىزدەلگەن قازاق ءتىلىنىڭ جاڭا ءالىپبيى بىرنەشە جىل بويىنا ازىرلەنگەن.

جاڭا قازاق ءالىپبيى قازىرگى كيريلليساداعى 42 ءارىپتىڭ ورنىنا لاتىن ءارپىنىڭ 32 تاڭباسىمەن تاڭبالاناتىن بولادى.