قازاقستاندا لاتىن گرافيكاسىنا نەگىزدەلگەن جاڭا قازاق ءالىپبيى بەكىتىلدى. 27 قازان كۇنى مەملەكەت باسشىسى نۇرسۇلتان نازاربايەۆ ءتيىستى جارلىققا قول قويعان. الماتى قالاسىنىڭ قوعامدىق ۇيىمدارى قازاق ءالىپبيىنىڭ بەكىتىلگەن نۇسقاسىن تولىقتاي قولدايدى، دەپ حابارلايدى Qamshy.kz اقپارات اگەنتتىگى. «ەل-شەجىرە» قوعامدىق قورىنىڭ ءتوراعاسى د.ءاشىمحاننىڭ ايتۋىنشا، لاتىن ءالىپبيى قازاقستان مەن دامىعان ەلدەردىڭ اراسىن جالعايتىن كوپىر ىسپەتتى.

 «ق ر پرەزيدەنتى نۇرسۇلتان نازاربايەۆ قازاق ءتىلى ءالىپبيىن كيريلليسادان لاتىن گرافيكاسىنا كوشىرۋ تۋرالى جارلىققا قول قويدى. ءبىز لاتىن عارپىنە كوشكەننەن نە ۇتامىز؟ بىرىنشىدەن، الەمدىك ينتەگراسياعا ۇمتىلىپ جاتقان ەل بولعاندىقتان، ءالىپبيدى دە بىرىزدەندىرۋ بۇرىننان كۇن تارتىبىندە تۇرعان ماسەلە ەدى. ەندى سول ماسەلەنى ءىس جۇزىندە شەشۋگە كىرىستىك. ەكىنشىدەن، تاريحي جازبا مۇرالارىمىزدى سۇزگىدەن وتكىزۋگە مۇمكىندىك تۋدى. ۇشىنشىدەن، قازاقستاندىقتار لاتىن ءالىپبيىن قولدانۋعا پسيحولوگيالىق تۇرعىدان دايىن. ەلىمىز نارىقتىق ەكونوميكاعا كوشىپ، جاڭا ەلەكترونيكالىق قۇرىلعىلار ەنگەن كەزدەن-اق، جۇرت لاتىنشا جازۋدى بىرتىندەپ باستاپ كەتتى. ادامدارعا لاتىن ءعارپىن ەشكىم ۇيرەتپەسە دە، ولار قالتا تەلەفوندارى ارقىلى حات-حابارلاردى لاتىنشا جازا باستادى. تورتىنشىدەن، لاتىن عارپىنە ءوتۋ الاش قايراتكەرلەرىنىڭ دە ارمانى بولعان ەدى. احمەت بايتۇرسىن ۇلى جاساعان نۇسقا بارىمىزگە ءمالىم. بيىل الاشوردا ۇكىمەتىنىڭ قۇرىلعانىنا 100 جىل تولىپ جاتقان كەزدە، لاتىن الىپبيىنە ءوتۋىمىز جاقسىلىقتىڭ نىشانى. قالاي بولعاندا دا، 27-قازان كۇنتىزبەگە تاريحي كۇن بولىپ ەنەرى ءسوزسىز. لاتىن الىپبيىنە كوشۋ كەزەڭ-كەزەڭىمەن ىسكە اساتىنىن دا ەستە ۇستاعان ابزال. سوندىقتان، بۇل ماسەلەدە اسا كوپ قيىندىقتار پايدا بولادى دەپ ويلامايمىن»، - دەدى د. ءاشىمحان.

ال  «اياجان» كوللەدجىنىڭ ديرەكتورى ك. قۇرىمبايەۆا ەلباسىنىڭ جارلىققا قول قويۋىن انا ءتىلىمىزدىڭ كەلەشەگى ءۇشىن جاسالعان عىلىمي-الەۋمەتتىك ءمانى زور باتىل شەشىم دەپ تانىدى.

«ەلىمىز تاۋەلسىزدىك العاننان باستاپ كوپتەگەن يگى ىستەردىڭ ۇيىتقىسى بولىپ كەلەسىز. جىل سايىنعى قازاقستان حالقىنا جاسالعان جولداۋلار مەن اۋقىمدى ستراتەگيالىق باعدارلامالارىڭىز ەلىمىزدى الەمنىڭ دامىعان 30 ەلىنىڭ قاتارىنا قوسىلۋ ءۇشىن جاسالىپ جاتقان اۋقىمدى ءىس-شارالاردىڭ ءبىرى. ەلباسىنىڭ تاعى ءبىر ماڭىزدى باستامالارىنىڭ ءبىرى جانە انا ءتىلىمىزدىڭ كەلەشەگى ءۇشىن جاسالعان عىلىمي-الەۋمەتتىك ءمانى زور باتىل شەشىمگە قولداۋ ءبىلدىرىپ، ۇلتتىق ءتىلىمىزدىڭ دىبىستىق ەرەكشەلىكتەرىن تولىققاندى كورسەتە الاتىن ءالىپبيدى تاڭداپ، تاريحىمىزدى تاعى ءبىر جاڭالىقپەن تولىقتىردىق. ەندەشە، 2017 جىلدىڭ 26 قازانى قازاقستان ءۇشىن تاريحي، ەل تاۋەلسىزدىگىنىڭ تاريحىندا التىن ارىپتەرمەن جازىلاتىن ايرىقشا كۇن بولىپ، ۇلتتىق ءتىل ەرەكشەلىگىنە نەگىزدەلگەن جاڭا گرافيكا قابىلداندى، مەملەكەتتىك مارتەبەسى بار ءتىلىمىز ءۇشىن سەرپىندى ءسات تۋدى. «قازاق ءتىلى ءالىپبيىنىڭ كيريلليسادان لاتىن گرافيكاسىنا كوشىرىلۋىن قامتاماسىز ەتۋ جارلىعىن»، قازاق ءتىلى ءالىپبيىنىڭ 2025 جىلعا دەيىن لاتىن گرافيكاسىنا كەزەڭ-كەزەڭىمەن كوشۋىن قامتاماسىز ەتۋ ءۇشىن اۋدانىمىزدا ءىس-شارالار وتكىزۋ ماقساتىندا باستامانى «قازاق ءتىلى» قوعامدىق بىرلەستىگىمەن بىرلەسە وتىرىپ قولعا الدىق»، - دەدى «اياجان» كوللەدجىنىڭ ديرەكتورى.

قازاق ءالىپبيىنىڭ بەكىتىلگەن نۇسقاسىن «ادىرنا» ۇلتتىق-ەتنوگرافيالىق بىرلەستىگى» قوعامدىق قورىنىڭ ديرەكتورى ا.اۋباكىر دە قولدادى.

«ادىرنا» ۇلتتىق-ەتنوگرافيالىق بىرلەستىگى» قوعامدىق قورى ەلباسى نۇرسۇلتان ءابىش ۇلى نازاربايەۆتىڭ لاتىن الىپبيىنە ءوتۋ جايىنداعى باستاماسىن قولدايدى. بۇل دۇنيەجۇزى قازاقتارىمەن ورتاق ءتىل تابىسىپ، قازاق ەلىنىڭ بىرلىگىن نىعايتۋعا جاسالعان ۇلكەن قادام رەتىندە باعالايمىز. سونىمەن بىرگە، تۋىستاس تۇرىك حالىقتارىمەن دا ىنتىماقتاستىق ماسەلەسىنە وڭ ىقپال ەتەدى دەپ سەنەمىز. ءبىر كەزدەرى لاتىن ءالىپبيى قازاق جەرىندە قولدانىستا بولعان. ونىڭ ۇستىنە، ەلىمىزدە اعىلشىن ءتىلىن جەتىك بىلەتىن جاستار ءوسىپ كەلەدى. ولارعا لاتىن الىپبيىنە بەيىمدەلۋ اسا قيىندىق تۋعىزا قويار دەپ ويلامايمىز. بۇل ءبىزدىڭ تاۋەلسىزدىگىمىزدى بەكىتە تۇسەتىن قادام دەپ ەسەپتەيمىز. تاڭدالىپ الىنعان ءالىپبي نۇسقاسى بۇعان دەيىنگى نۇسقالارعا قاراعاندا الدەقايدا جوعارى دەڭگەيدە ەكەنى بايقالادى»، - دەدى ا. اۋباكىر.