بيىلعى جىلدىڭ 11 قىركۇيەگىندە پارلامەنت قابىرعاسىندا  «قازاق ءتىلىن لاتىن الىپبيىنە كوشىرۋ» تۋرالى العاشقى تىڭداۋ ءوتتى. «Attila group» كومپانياسىنىڭ وتىنىشىمەن وسى تىڭداۋدا بايانداما جاساۋىما تۋرا كەلدى. تاقىرىپ: مەملەكەتتىك ءتىلدىڭ ءبىرىڭعاي ستاندارتتى ءالىپبيىنىڭ كونۆەرتەرى. ەڭ الدىمەن پروگرامميستەردىڭ ايتۋىمەن لاتىن گرافيكاسىنا نەگىزدەلگەن قازاق ءالىپبيىنىڭ كونۆەرتەرى قانداي بولۋى كەرەك دەگەن سۇراققا جاۋاپ ىزدەدىك. ەڭ باستىسى — ەلباسىمىز نۇرسۇلتان نازاربايەۆ ايتقانداي، «قازاقستان الەمدەگى بار قازاقتىڭ وتانى» بولسا، مەملەكەتتىك ءتىلدىڭ ءبىرىڭعاي ستاندارتتى ءالىپبيى دە الەمدەگى بار قازاقستاندىقتارعا ورتاق ءالىپبي بولۋى كەرەك دەگەن تۇجىرىمعا كەلدىك. ول ءۇشىن «لاتىنعا نەگىزدەلىپ قابىلدانعان ءالىپبيدىڭ كونۆەرتەرى» مىنا تالاپتارعا جاۋاپ بەرە الۋى كەرەك:

1) كونۆەرتەر كيريلل، اراب، لاتىن جانە ت.ب. الىپبيلەرىنە نەگىزدەلۋى ءتيىس.

2) ينتەرنەت براۋزەرلەرگە ارنالعان كونۆەرتەر پروگرامماسى جاسالۋى كەرەك.

3) كەز كەلگەن سايتتى كونۆەرتيزاسيا جاساي الاتىن API پروگراممالىق قوندىرعىسى بولۋى ءتيىس.

4) ۇيالى تەلەفوندارعا باعىتتالعان ios، android قوسىمشالارى جاسالۋى ءتيىس.

5) كونۆەرتەر ورنالاستىرىلعان سايت لاتىن الىپبيىنە اۋدارعىسى كەلەتىن ادامعا ىڭعايلى بىرنەشە تىلدە جاساۋلى ءتيىس. مىسالى: اعىلشىن، ورىس ت.ب.

6) شاعىن ماتىندەردى اۋداراتىن كونۆەرتەردىڭ قىزمەتى دە شەكتەۋلى بولادى. سوندىقتان كولەمدى كىتاپتاردى دا اۋداراتىن، ونىڭ ىشىندە سۋرەت، باسقا دا گرافيكا، ءتىپتى ءتۇسى، ۇلكەن-كىشىلىگى ءارتۇرلى ارىپتەردى سول كۇيىندە قاتەسىز جىلدام اۋداراتىن بولۋى ءتيىس.

7)  جاڭا ءالىپبيدىڭ بارلىق ەملە ەرەجەلەرءى كەزەڭ-كەزەڭىمەن كونۆەرتەرگە تياناقتى ەنگىزىلىپ، كەز كەلگەن ءماتىن قاتەسىز، ساۋاتتى اۋدارىلۋى قاجەت.

8) اعىلشىن ارىپتەرى مەن قابىلدانعان ءالىپبي قاتار كەلگەندە اجىراتا الاتىن مۇمكىندىككە يە بولۋى مىندەتتى. سەبەبى زامانۋي اقپاراتتار مەن تەحنولوگيا تىلىندە اعىلشىن سوزدەرى كوپ كەزدەسەدى.

9) كونۆەرتەر تەك قانا كيريلل الىپبيىنەن لاتىن گرافيكاسىنا قاتەسىز اۋدارۋى جەتكىلىكسىز. كەرىسىنشە لاتىن گرافيكاسىنان كيريلل الىپبيىنە، اراب گرافيكاسىنان لاتىن الىپبيىنە، لاتىن الىپبيىنەن اراب گرافيكاسىنا ەش قاتەسىز اۋداراتىن بىرەگەي جۇيە بولۋى كەرەك.

10) ەڭ باستىسى - ينتەرنەت بولماعان جاعايدا كومپيۋتەر مەن ۇيالى تەلەفوندا سايكەستىرۋ مۇمكىندىگى بولۋى كەرەك. ياعني بۇل كونۆەرتەردى ءوز قۇرالىڭىزعا قوندىرىپ العاننان كەيىن ينتەرنەتسىز دە پايدالانۋ مۇمكىندىگى بولۋى قاجەت.

11) قازاق ارىپتەرى ىزدەۋ جۇيەسىنەن كەدەرگىسىز تابىلۋى، SEO جۇيەسى كەمەلدى جاسالۋى ءتيىس.

12) ەلدەگى مەكەمەلەردە كۇنىنە مىڭداعان قۇجات اينالاتىنىن ەسكەرسەك، كونۆەرتەر سايتى ءبىر مەزەتتە ەڭ كەمىندە 100 مىڭ قولدانۋشىعا قىزمەت كورسەتە الۋعا مىندەتتى.

13) كونۆەرتەر سايتى تەك كوز الدايتىن، ۋاقىتشا عانا قىزمەت اتقارماۋى كەرەك. سوندىقتاندا جىل بويى، ءتىپتى 24 ساعات تەحنيكالىق قولداۋدى، بىرنەشە ءتىل ماماندارى مەن پروگرامميستەردىڭ بىرلەسە جۇمىس جاساۋىن قاجەت ەتەدى.

14) ءار مەكەمەنىڭ ارحيۆىندە مىڭداعان قۇجات بار ەكەنىن ەسكەرسەك، ءبىز ايتىپ وتىرعان كونۆەرتەر ءبىر مەزەتتە بىرنەشە ءجۇز قۇجاتتى كونۆەرتيزاسيا جاسايتىن مۇمكىندىگى بولۋى ءتيىس. بۇل مەملەكەتتىك قىزمەتكەرلەردىڭ جۇمىسىن جەڭىلدەتىپ، قىزمەت ونىمدىلىگىن ارتتىرادى.

15) بولاشاقتا بۇل كونۆەرتەر ارقىلى ءارىپتى دىبىستايتىن، دىبىستى تاڭبالايتىنپروگراممادا قاتارعا قوسىلۋى قاجەت.

پارلامەنتتەگى باياندامادان كەيىن مادەنيەت جانە سپورت ءمينيسترى ارىستانبەك مۇحاممەديۇلىمەن كەزدەسىپ، پىكىرلەسۋدىڭ ءساتى ءتۇستى. اسىرەسە «ءالىپبيدىڭ كونۆەرتەرى» جونىندە كوپ اڭگىمەلەستىك. «كونۆەرتەرگە» قويىلاتىن جوعارىداعى تالاپتاردى اتاي وتىرىپ، «Attila group» پروگرامميستەرىنىڭ كونۆەرتەر جاساۋعا ەسەپتەگەن «سمەتاسىن» ۇسىندىم. پروگرامميستەردىڭ ەسەپتەۋىنشە،  ءبىر مەزەتتە 100 مىڭ قولدانۋشىنىڭ پايدالانۋىنا قاۋقارلى، ۇيالى تەلەفوندارعا، كومپيۋتەرگە، سايتتارعا باعىتتالعان، 24 ساعات قىزمەت كورسەتەتىن  كونۆەرتەر جاساۋ ءۇشىن ءتىپتى 80 ميلليون تەڭگە قارجى قاجەت ەكەن. 

ءبىزدىڭ ۇسىنىسىمىزدان كەيىن مينيستر ارىستانبەك مۇحاممەدي ۇلى وسى باعىتقا 2018 جىلعا 56 ميلليون تەڭگە قارجى قاراستىرىپ جاتقان كورىنەدى. ارينە ۇلتتىق ءالىپبيدى وزگەرتۋ سىندى «تاعدىر شەشتى» بەتبۇرىس ءۇشىن بۇل قارجى دا ازدىق ەتەدى. دەگەنمەن ناتيجەلى جۇمىستارعا ناقتى قادامدار جاسالىپ جاتقانى قۋانتارلىق جايت. 

ءبىلال قۋانىش، «Attila group» كومپانياسىنىڭ وكىلى