2600 جىلى ەنەرگيانى شامادان تىس تۇتىنۋدىڭ سالدارىنان جەر بەتى وتتى شارعا اينالادى، سول كەزدە ادامزات تۇگەلدەي جويىلادى. بۇل تۋرالى بريتاندىق فيزيك ستيۆەن حوكينگ بەيجىڭدە وتكەن Tencent WE ءسامميتىنىڭ قاتىسۋشىلارىنا ۆيدەو بايلانىس ارقىلى مالىمدەدى، دەپ جازادى Qamshy.kz اقپارات اگەنتتىگى.

–حالىقتىڭ تىعىزدىعى جەر بەتىنە ايتارلىقتاي ءقاۋىپ ءتوندىرىپ تۇر. بۇگىننەن باستاپ ادامدار بەلگىسىز الەمگە قاراي بەت الا بەرگەن ءجون، جاڭا پلانەتالاردى اشۋ كەرەك، - دەپ كەلتىردى عالىمنىڭ ءسوزىن New York Post باسىلىمى.

سونداي-اق حوكينگ سامميتكە قاتىسۋشىلاردى عارىش كەمەسىنىڭ قۇرىلۋىنا ارنالعان ءوزىنىڭ Starthour Breakthrough جوباسىن قولداۋعا شاقىردى. ول كەمەمەن جەرگە جاقىن ورنالاسقان الفا سەنتاۆرا جۇلدىزىنا ۇشىپ بارۋعا بولادى. بۇل جارىقتىڭ جىلدامدىعىنان 1/5 جىلدامدىقپەن قوزعالاتىن كۇن پارۋسى بار كىشكەنە عانا بارلاۋ اپپاراتى.

–ول مارسقا كەمىندە 1 ساعاتتا جەتىپ بارادى. پلۋتونعا جەتۋ ءۇشىن ءبىر كۇن كەتۋى مۇمكىن. ال الفا سەنتراۆاعا ۇشۋ 20 جىلعا جۋىق ۋاقىتتى الادى، - دەدى عالىم.

ونىمەن قوسا، كۇننىڭ اينالاسىنداعى جۇلدىزداردىڭ تىرشىلىككە جارامدى ەكەنىن ايتتى. حوكينگتىڭ ويىنشا، سول جۇلدىزداردىڭ بىرىندە ادامزات تاعى ميلليونعا جۋىق جىل ءومىر سۇرە الادى.

بۇدان بۇرىن يتالياندىق عالىمدار اي مەن مارستىڭ تىرشىلىككە جارامدىلىعىن زەرتتەپ، ءوز جوبالارىن ۇسىنعان.