سوڭعى كەزدەرى قان الدىرتۋمەن مەديسينالىق ساۋاتى جوق ادامدار اينالىسا باستاۋىنا بايلانىستى حيدجامانىڭ قاۋىپتىلىگى كۇشەيدى. اسىرەسە، ءدىن جولىندا جۇرگەندەر بۇل ماڭىزدى ءىستى قوسىمشا تابىس كوزىنە اينالدىرىپتى، دەپ حابارلايدى Qamshy.kz اقپارات اگەنتتىگى kazislam.kz سايتىنا سىلتەمە جاساي وتىرىپ.
ال قاتە جاسالعان تىلىكتەن ادام ءتىپتى ءولىپ كەتۋى مۇمكىن. سوراقىسى سول كاسىپتىڭ بۇل تۇرىمەن اينالىسقاندار نە مەملەكەتتىك ورىنداردىڭ، نە يمامداردىڭ باقىلاۋىندا ەمەس. نۇربول نيتقالييەۆ كۇنىنە ون شاقتى ادامنان قان الادى. كليەنتتى ءدال وسىلاي ءۇي جاعدايىندا قابىلداپ، ەم جۇرگىزەدى. ياعني، حيدجاما كەزىندە دەنەنى الماسپەن ءتىلىپ، قاندى سورىپ الادى. مەديسينالىق ءبىلىمى جوق بولسا دا ءوز بەتىمەن حيدجاما جاساۋدى ۇيرەنىپ، اپپاراتىن ساتىپ الىپتى. بۇرىن يمامدىق قىزمەت اتقارعان ەمشى، دۇرىس جاسالماعان دەنە تىلىكتەرى ادام ولىمىنە دە اپارۋى مۇمكىن دەيدى. وسىلاي دەپ قان الۋدىڭ قاۋىپتىلىگىن ايتقانىمەن، تابىس كوزىنە اينالدىرعان كاسىبىن ءوزى تاستاماق ەمەس.
نۇربول نيتقالييەۆ، ەمشى: – حيدجاما دۇرىس سالىنباسا، دۇرىس كەسىلمەسە، نۇكتەلەرگە دۇرىس قويىلمايتىن بولسا، ءسوزدىڭ شىنى كەرەك ادام ءولىپ كەتۋى دە مۇمكىن. كەيبىر باۋىرلار بانكالاردى باسىنان اياعىنا دەيىن تولتىرىپ سالىپ تاستايدى. ادامنىڭ جاعدايىنا بايلانىستى ونىڭ باسى اينالىپ، تالاتىن بولسا بانكالاردى الام دەگەنشە ادام كوماعا كەتىپ قالۋى مۇمكىن. ءبىر قىزىعى قاتەلىك كەتسە ادام ولىمىمەن اياقتالۋى مۇمكىن ەمدى ءقازىر كەز كەلگەن ادام جاساپ ءجۇر. ول ءۇشىن تىلىك سالۋدى ۇيرەنىپ، كاسىپكەر بولىپ تىركەلسە جەتكىلىكتى. بۇل ەمدى اركىمنىڭ جاساپ جۇرگەنىنە ءدىن قىزمەتكەرلەرى دە الاڭداپ وتىر.
نۇرلىبەك كۇزەنبايەۆ، اقتوبە وبلىستىق «نۇر عاسىر» مەشىتىنىڭ نايب يمامى: – حيدجاما الاتىن ادامدى ءبىز تاعايىندامايمىز، ونى قاداعالامايمىز. كەز كەلگەن نارسەدە ءوز مامانىنا بارۋ كەرەك. حيدجامانى دا كەز كەلگەن ادام الۋعا بولمايدى. ال بۇل جاعدايدىڭ ءقاۋىپتى ەكەنىن ايتقان دارىگەرلەر ءدىندارلار جاسايتىن حيدجاماعا تۇبەگەيلى قارسى. سۆەتلانا اعزاموۆا، دارىگەر: – ءۇي جاعدايىندا قان الدىرۋعا ءبىز قارسىمىز. ەمدىك جاعىنان گورى ورگانيزمگە كەرى اسەرلەرى كوپ. اشىق بولعاننان كەيىن ول جەرگە بىرىنشىدەن ينفەكسيا جينالادى. قانعا ينفەكسيا تۇسكەننەن كەيىن ءارتۇرلى اسقىنۋلار بولۋى مۇمكىن. مەديسينادان بولەك جەردە قان الدىرىپ، ەم جاساماعان دۇرىس. ادام بويىنداعى قاندى سورىپ، ەم جۇرگىزەتىندەردىڭ دەنى الەۋمەتتىك جەلى جانە تامىر تانىستارى ارقىلى ەمشى اتانعاندار. سوندىقتان، مۇنداي ادامداردىڭ جۇرگىزگەن ەمىنە جاۋاپكەرشىلىك المايتىنى ايان.
