مەديسينالىق قىزمەتتەرگە تاپسىرىستاردى ورنالاستىرۋ بيىل العاش رەت مىندەتتى الەۋمەتتىك مەديسينالىق ساقتاندىرۋ جۇيەسى شەڭبەرىندە وتكىزىلىپ جاتىر دەپ حابارلايدى Qamshy.kz اقپارات اگەنتتىگى. مەديسينالىق كومەكتىڭ قولجەتىمدىلىك قاعيداسىن قامتاماسىز ەتۋ جانە دەنساۋلىق ساقتاۋ مەكەمەلەرى اراسىندا باسەكەلەستىكتى دامىتۋ ءۇشىن، مەنشىك تۇرلەرى تاۋەلدىلىگىنەن تىس، ءبىرىڭعاي قىزمەت كورسەتۋشىلەر بازاسى قالىپتاستىرىلدى. 

ەلىمىزدە مەملەكەتتىك تاپسىرىستى ورنالاستىرۋعا 1600 استام دەنساۋلىق ساقتاۋ نىسانى ءوتىنىم ءبىلدىردى. ونىڭ 45 پايىزدان استامى – جەكە مەنشىك كلينيكالار.

- ءمامس جانە تەگىن مەديسينالىق كومەكتىڭ كەپىلدەندىرىلگەن كولەمى شەڭبەرىندە مەملەكەتتىك كلينيكالارعا دا، جەكە مەنشىك اۋرۋحانالار مەن ەمحانالارعا دا تەڭدەي جاعدايدىڭ جاسالۋى ءوز ناتيجەسىن اكەلىپ جاتىر. استانا قالاسىندا مەملەكەتتىك تاپسىرىستى ورنالاستىرۋ بويىنشا 73 دەنساۋلىق ساقتاۋ سۋبەكتىسى قۇجاتتارىن تاپسىردى. ولاردىڭ 36- مەملەكەتتىك، 37 – جەكە مەنشىك مەديسينالىق ۇيىمدار مەن ورتالىقتار. بۇل 2017 جىلعى كورسەتكىشتەن ەكى ەسە كوپ، - دەيدى استانا قالاسى بويىنشا «ءامسق» كەاق فيليالىنىڭ ديرەكتورى ن.قابدىقاپاروۆ.

بۇل دەرەكتەرگە سۇيەنە وتىرىپ، جەكە مەنشىك كلينيكالار قوردىڭ باستاماسىن قولداپ، مەديسينالىق قىزمەتتەردى ورنالاستىرۋعا قۇجات وتكىزۋ جۇمىستارىنا بەلسەندى تۇردە قاتىسىپ جاتىر دەۋگە بولادى. سونداي-اق، بيىل تۇڭعىش رەت پروسەسكە ءىرى-ىرى جەكە مەنشىك كومپانيالار قاتىسىپ وتىر.

تەگىن مەديسينالىق كومەكتىڭ كەپىلدەندىرىلگەن كولەمىنە بولىنگەن بيۋدجەتتىك قاراجات ستاسيونارلار، ەمحانالار، جانە دە قىزمەتتىڭ جەكەلەگەن تۇرلەرىن كورسەتەتىن قوسىمشا اتقارۋشىلار اراسىندا بولىنەتىن بولادى.

 «الەۋمەتتىك مەديسينالىق ساقتاندىرۋ قورى» كەاق باسقارۋشى ديرەكتورى ەرىك ءبايجۇنىسوۆتىڭ ايتۋى بويىنشا، مسق بارلىق تۇسكەن وتىنىشتەردى جەلتوقسان ايىنىڭ ورتاسىنا دەيىن ساراپتايدى. مەديسينا ۇيىمدارىن بىرنەشە كورسەتكىش بويىنشا باعالاۋ جوسپارلانىپ وتىر. ولاردىڭ اراسىندا كادرلار قۇرامى مەن ماتەريالدىق-تەحنيكالىق جابدىقتالۋ دەڭگەيى، سوڭعى 3 جىلدا اتقارعان قىزمەتىنە قاتىستى نەگىزگى كورسەتكىشتەر، راستالعان، نەگىزى بار شاعىمدار ت.ب. كورسەتكىشتەر بار.

- ساراپتاما ناتيجەسىندە قانداي مەديسينا ۇيىمدارىنىڭ ءتيىستى دەڭگەيدە قىزمەت كورسەتە الاتىنىن، قايسىلارىنىڭ وعان شاماسى جەتپەيتىنىن انىقتاۋعا بولادى. ىرىكتەۋدەن وتپەگەن سۋبەكتىلەرىمەن مسق كەلىسىمشارت بەكىتپەيدى، - دەيدى «الەۋمەتتىك مەديسينالىق ساقتاندىرۋ قورى» كەاق باسقارۋشى ديرەكتورى ەرىك ءبايجۇنىسوۆ.

دەنساۋلىق ساقتاۋ جۇيەسى رەفورماسىنىڭ اياسىنداعى قوردىڭ باستى ماقساتى – تۇرعىنداردى قولجەتىمدى جانە ساپالى مەديسينالىق كومەكپەن قاماتاماسىز ەتۋ. سوندىقتان رەسپۋبليكالىق جانە ايماقتىق كوميسسيالار ءاربىر ءوتىنىشتى مۇقيات قاراستىرادى. كوميسسيالاردىڭ قۇرامىنا مەملەكەتتىك ەمەس ۇيىمدار، بەدەلدى ەكسپەرتتەر جانە باسقا دا ۋاكىلەتتى تۇلعالار كىردى.