ليۆيادا ادامداردى قۇلدىققا ساتىپ جاتقان ۆيدەونى CNN تەلەارناسى جاريالادى دەپ حابارلايدى Qamshy.kz اقپارات اگەنتتىگى.

 «800، 900، 1000، 1100.  1200-گە ساتىلدى (ليۆيالىق دينار، ورتا ەسەپپەن 800 اقش دوللارى)»، — دەيدى اۋكسيوندى جۇرگىزىپ وتىرعان ادام.

كادردەن ساتىلىمعا تۇسكەن قارا ءناسىلدى جىگىتتى فەرمادا جۇمىس ىستەۋگە جارايتىنداي دەنساۋلىعى مەن كۇشى بار ادام رەتىندە تانىستىرعانىن بايقاۋعا بولادى.

ليۆيادا ادام ساۋدالايتىن قارا بازاردىڭ بارىن كوشى-قون جونىندەگى حالىقارالىق ۇيىم ساۋىردە حابارلادى. ۇيىمنىڭ مالىمەتىنشە، ليۆيادا جۇزدەگەن ادام قۇلدىققا ساتىلعان.

ورتالىق افريكادان ەۋروپاعا قاشپاق بولعانداردى ءتىرى تاۋار رەتىندە ليۆيانىڭ بىرنەشە قالاسىندا ساتىپ وتىرعان.

ميگرانت تاسىمالداۋشىعا ەۋروپانى ارالاتۋعا اقشا بەرەدى. ولار ليۆياعا جەتكەندە بەرگەن قارجىسى جەتكىلىكسىز ەكەنىن ايتادى. ەگەر ول كەلىسىم بويىنشا ءجۇرۋىن تالاپ ەتسە ونى ۇرىپ-سوعىپ، زورلايدى. ودان كەيىن ساۋداعا سالادى.

ءبىزدى قوراپقا سالعانداي تىعىنداپ تاستايدى. ۇيىقتاي المايمىز. كوبى ءتۇرلى اۋرۋمەن اۋىرادى. بىزگە تاماق جەتىسپەيدى. ءبىزدىڭ دۋش قابىلداماعانىمىزعا  بىرنەشە اي بولدى. ەگەر ءبىز بۇل جەردەن قاشىپ شىقپاساق، بارلىعىمىز ولەمىز. ادام قالدىعىمەن بىرگە تۇنشىعىپ ەدەندە جاتامىز» دەپ قۇلدىقتا بولعانداردىڭ ءبىرى جاعدايدى بايانداپ بەردى.

كۇزەتشىلەر ۇنەمى بوسقىنداردى سوققىعا جىعادى. ولار ەلەكتروشوكەردى دە پايدالاناتىن بولعان. تاماق، سۋ سۇراعان ادامداردى سونىمەن جازالايدى.

ايەل بوسقىنداردىڭ  ءبىرى ونى بەلگىسىز ءبىر ۇيگە الىپ كەتكەنىن جانە ول جەردە ءۇش ەر ادامنىڭ بولعانىن ايتادى. ولاردىڭ اراسىندا كوشى-قون ماسەلەسىمەن اينالىساتىن قىزمەتكەر دە بار. «ولار مەنى زورلادى» دەيدى قۇلدىقتا بولعان ايەل.

ليۆيالىق شەنەۋنىكتەر ۇتىمدى بيزنەس جۇرگىزىپ وتىر. پارا بەرگەندەردى قۇلدىقتان بوساتادى. ميگرانتتار تيەلگەن كەمە نەيترالدى زوناعا شىققاندا ليۆيانىڭ جاعاجاي كۇزەتشىلەرى قايىقتى باسىپ الىپ، ميگرانتتاردى قايتا لاگەرگە اكەلەدى.

بۇۇ باقىلاۋشىلارى ايدىڭ باسىندا تريپوليدەگى  ميگرانتتاردى ورنالاستىرۋ  ورتالىقتارىنىڭ بىرنەشەۋىنە باس سۇققان ەدى. ولار سوندا كورگەن سۇمدىقتاردى سوزبەن جەتكىزۋ مۇمكىن ەمەس ەكەنىن ايتادى.

«مىڭداعان جۇدەۋ تارتقان جارالى ەر ادامدار، ايەلدەر مەن بالالار. ولاردى انگارعا قاماپ قويعان. قاراپايىم ادامعا قاجەتتىنىڭ ءوزى جوق. ولاردى ادامدىق ابىرويدان ايىرۋ ءۇشىن بارلىعىن جاساعان» دەلىنگەن بۇۇ بايانداماسىندا. 

«بۇل جاعداي ناعىز اپاتقا اينالدى. حالىقارالىق قاۋىمداستىقتار بۇعان كوز جۇما قاراي المايدى» دەدى ادام قۇقىعى جونىندەگى كوميسسار زەيد رااد ال-حۋسەين بريۋسسەلدەگى پرەسس-كونۆەرەنسيادا.