ءال-فارابي اتىنداعى قازۇۋ رەكتورى، اكادەميك عالىم مۇتانوۆ باستاعان قازاقستاندىق دەلەگاسيا «سكولكوۆو» يننوۆاسيالىق جۇيەلەرىنە ساپارمەن بارىپ قايتتى. يننوۆاسيالار، عىلىم مەن جوعارى تەحنولوگيالاردى ورتاق دامىتۋ تۋرالى كەلىسىم ءىس-ساپاردىڭ باستى ناتيجەسى بولىپ تابىلدى، دەپ جازادى Qamshy.kz اقپارات اگەنتتىگى. 

دەلەگاسيا «سكولكوۆو» قورى جانە ايماقتىق دامۋ دەپارتامەنتىنىڭ باسشىلىعىمەن، سونداي-اق تەحنوپاركتىڭ باس ديرەكتورى جانە ونىڭ تۇرعىندارىمەن كەزدەستى. كەزدەسۋ بارىسىندا ەكىجاقتى ىنتىماقتاستىقتى دامىتۋ جانە ورتاق يننوۆاسيالىق جوبالاردى جۇزەگە اسىرۋ ماسەلەلەرى تالقىلاندى.

قازۇۋ-دا يننوۆاسيالىق جانە مەديسينالىق-بيولوگيالىق كلاستەردى، سونداي-اق جۇڭگو ۇكىمەتى تاراپىنان الىناتىن سۋپەركومپيۋتەر نەگىزىندە جاڭا جىبەك جولى ۋنيۆەرسيتەتتەرى اليانسىنىڭ ىت-تەحنوپاركىن قۇرۋ جوبالارى رەسەي ارىپتەستەرىنىڭ ەرەكشە قىزىعۋشىلىعىن تۋدىردى.

«سكولكوۆو» وكىلدەرى ەنەرگوتيىمدىلىك جانە ەنەرگيانى ۇنەمدەۋ، يادرولىق جانە كوسموستىق تەحنولوگيالار، تەلەكوممۋنيكاسيا جانە بيومەديسينا، ءىت تەحنولوگيا جانە باعدارلامالىق جاساقتاما سياقتى باسىم باعىتتار بويىنشا ورتاق جۇمىستار جۇرگىزۋگە دايىندىقتارىن ءبىلدىردى.

تاراپتار سونىمەن قاتار جيناقتالعان تاجىريبەنى ورتاق كوممەرسيالاۋ جانە ولاردى ەكى مەملەكەت ەكونوميكاسىنىڭ ناقتى سەكتورىنا ەنگىزۋگە دايىندىقتارىن جەتكىزدى.

ماسساچۋسەتس تەحنولوگيالىق ينستيتۋتىنىڭ (اقش) قاتىسۋىمەن جانە ءوزارا سەرىكتەستىكتە قۇرىلعان سكولكوۆو عىلىم جانە تەحنولوگيا ينستيتۋتىنا ساپار بارىسىندا جوعارى بىلىكتى مامانداردى، سونداي-اق زەرتتەۋشىلەر مەن كاسىپكەرلەردىڭ جاڭا بۋىنىن دايىنداۋ ماسەلەلەرى تالقىلاندى.

«سكولكوۆو» قۇرامىندا يننوۆاسيالىق ورتالىق، ارنايى قور، عىلىم جانە تەحنولوگيا ينستيتۋتى («سكولتەح»)، شامامەن ەكى مىڭعا جۋىق تۇرعىندار بار. ولار كوممەرسيالاۋدىڭ جالپى دەڭگەيىنىڭ 124 ملرد. رۋبلدەن اساتىن عىلىمي-زەرتتەۋ جانە كاسىپكەرلىك قىزمەتتەرىن اتقارادى.