مىندەتتى مەديسينالىق ساقتاندىرۋ جۇيەسىنە قاتە نەمەسە ارتىق تولەنگەن اۋدارىمدار سوماسى مەن جارنانى كەرى قايتارۋعا بولادى. بەلگىلى ءبىر سومانى قايتارۋدى جەكە تۇلعالار ءۇشىن اۋدارىمدار جاسالعان تىزىمدە نەمەسە تولەۋشى جەكە دەرەكتەردى تولتىرعان كەزدە قاتە جىبەرگەن جاعدايدا رەتتەۋگە بولادى. جەكە كاسىپكەرلەردىڭ وزدەرى جانە ازاماتتىق-قۇقىقتىق سيپاتتاعى كەلىسىمشارت بويىنشا جۇمىس ىستەيتىن جەكە تۇلعالار ءۇشىن جارنا تولەۋ 2020 جىلعا دەيىن شەگەرىلگەندىكتەن، قاتە نەمەسە ارتىق تولەم جاساۋ دەرەكتەرى جىل باسىنان بەرى بىرنەشە مارتە كەزدەستى.   

–قاراجاتتاردى قايتارۋ ءراسىمى ق ر دەنساۋلىق ساقتاۋ ءمينيسترىنىڭ №478 بۇيرىعىمەن رەتتەلگەن. جارنا تولەۋشى بەلگىلەنگەن ۇلگى بويىنشا قايتارۋعا ءوتىنىش جازىپ، «ۇكىمەت – ازاماتتار ءۇشىن» مەملەكەتتىك كورپوراسياسىنا تاپسىرۋى كەرەك، – دەيدى استانا قالاسى بويىنشا «ءامسق» كەاق فيليالىنىڭ ديرەكتورى ن.قابدىقاپاروۆ.

ەگەر قاتە اۋدارىمدار جاسالعان جەكە تۇلعالار تىزىمىندە جىبەرىلگەن بولسا، بۇل جاعدايدى راستاۋ انىقتاماسى قوسا بەرىلەدى. تولەۋشىلەر قولما-قول اقشامەن تولەم جاساعان جاعدايدا، راستاۋ انىقتاماسىنىڭ ورنىنا اۋدارىم نەمەسە جارنا تولەۋ تۋرالى تولەم قۇجاتىنىڭ كوشىرمەسى ۇسىنىلادى.

مەملەكەتتىك كورپوراسيا ءوتىنىش تۇسكەن كۇننەن باستاپ، بەس وپەراسيالىق كۇننىڭ ىشىندە اۋدارىمنىڭ، جارنانىڭ نەمەسە ءوسىمپۇلدىڭ ەسەپكە الىنعانىن تەكسەرەدى. ارى قاراي ءوتىنىش بەرىلگەن تولەم بويىنشا بارلىق دەرەكتەمەلەردى راستايتىن قوسىمشالارمەن بىرگە الەۋمەتتىك مەديسينالىق ساقتاندىرۋ قورىنا جىبەرىلەدى

–قور ءوتىنىشتى قاراستىرعاننان كەيىن مت-102 فورماتىنداعى تولەم تاپسىرماسىن وڭدەپ، تولەۋشىنىڭ ءوتىنىشى قورعا تۇسكەن كۇننەن باستاپ، جەتى وپەراسيالىق كۇننىڭ ىشىندە اقشانى مەملەكەتتىك كورپوراسيانىڭ بانك شوتىنا اۋدارادى. كورپوراسيا تۇسكەن قارجىنى تولەۋشىنىڭ شوتىنا اۋدارادى. قور  قايتارىلمايتىن سومالار بويىنشا مەملەكەتتىك كورپوراسياعا اقشانى قايتارۋدان باس تارتۋدىڭ سەبەپتەرىن كورسەتە وتىرىپ، اقپارات جىبەرەدى، – دەپ ءتۇسىندىردى ن.قابدىقاپاروۆ.

مەملەكەتتىك كورپوراسيا قور رەەسترى نەگىزىندە تولەم تاپسىرماسىن وڭدەپ، ءۇش وپەراسيالىق كۇننىڭ ىشىندە تولەۋشىگە كۇشى جويىلعان تولەم سوماسىن اۋدارادى. مەملەكەتتىك كورپوراسيا، ەگەر قاراجات قايتارىلمايتىن بولىپ تانىلسا، تولەۋشىگە ونىڭ سەبەپتەرى تۋرالى تولىق اقپارات بەرەدى.