تولەبي اۋدانى، زەرتاس اۋىلىنداعى ەسكى زيراتتا جەرلەنگەن مايىتتەردىڭ ءقابىرى اشىلىپ، سۇيەكتەرى جارتاستا شاشىلىپ جاتىر. ماڭىنداعى بۇلاق پەن وزەن سۋىنا اعىپ كەتكەندەرى دە بار، دەپ جازادى Otyrar.kz. ال سۋدى پايدالاناتىن توعىس، ەلتاي، قاراتاس، سايرام ەلدى مەكەندەرىنىڭ حالقىنا ءقاۋىپ ءتونىپ تۇر. ءدال وسىلاي دابىل قاققان اۋىل بەلسەندىسى بيلىكتەن اراشا سۇرايدى.

ماياتاس اۋلىنىڭ تۇرعىنى تۇيمەباي بازاروۆ بىلتىر قازاندا قازا بولعان 65 جاستاعى قۇداشاسىن وسى زەرتاس اۋىلىنداعى زيراتقا جەرلەگەنىن ايتقان.  قۇداشاسىنىڭ ءمايىتىن ۇرپاقتارى ۋاقىت وتە تاپپاي قالا ما دەگەن قورقىنىشىن دا جەتكىزگەن.

ەسكى زيراتتىڭ ءبىر بولىگىن سۋ شايعان. جارتاستاعى تومپەشىكتەردەگى قابىرلەر اشىلىپ، سۇيەكتەرى شاشىلعان. بەلسەندى ازامات بۇل سۋدى ەل پايدالانىپ وتىر دەپ تە دابىل قاعادى. جان ايقايىمدى بيلىكتەگىلەر ەستىسە دەيدى.

 زەرتاس اۋىلىنىڭ تۇرعىنى رازيا پەرنەبايەۆا بىلتىر قورالاستار جيىندا ءدال وسى ماسەلە كوتەرىلگەنىن ايتادى. قورالاس رۋىنىڭ ءبيى زيرات اۋماعىن ساقتاپ قالۋ ماقساتىندا سۋدىڭ بويىنا اعاشتار ەگىپتى.

زەرتاس اۋىلى اكىمدىگىندەگىلەر زيراتتاعى جاعدايدان حاباردار. قانداي دا ءبىر جۇمىس اتقارۋعا اۋدانداعى باسشىلاردىڭ قارجى بولگەنىن كۇتىپ وتىر. ال اۋىلدىقتار تەز ارادا شارا كورىلمەسە، زيراتتى سۋ شايىپ كەتەتىنىنە سەنىمدى.