قازاقستان جازۋشىلار وداعىنىڭ جاڭا ءتوراعاسى ۇلىقبەك ەسداۋلەت وداقتاعى جۇمىسىنا قاتىستى جوسپارىن ايتتى، دەپ حابارلايدى Qamshy.kz اقپارات اگەنتتىگى. 

- بىردەن قيراتىپ تاستايمىز، ادەبيەتتى وركەندەتىپ جىبەرەمىز دەپ ايتا المايمىن. ۇلكەن-ۇلكەن، بيىك ۋادەلەردى بەرە المايمىن. "ارىق ايتىپ، سەمىز شىق" دەگەن ءسوز بار. جازۋشىلار وداعى باتىپ وتىرعان شىعىنداردان قۇتىلۋىمىز كەرەك. التى اي بويى جازۋشىلار وداعىنىڭ قىزمەتكەرلەرى ايلىق دەگەندى كورگەن جوقپىز. سالىق پەن جالاقىنى تولەي الماي وتىرعان جازۋشىلار وداعىنا مەنى ءتوراعا ەتىپ سايلاپ، ۇلكەن جاۋاپكەرشىلىك جۇكتەپ قويدى. بۇعان قاتتى قۋانارلىقتاي جاعدايىم جوق. مەن يىعىما ءتۇسىپ تۇرعان اۋىر جۇكتى سەزىپ تۇرمىن. ەندىگى ماقسات -  جازۋشىلار وداعىنىڭ جاعدايىن تۇزەتۋ. جازۋشىلاردىڭ جاعدايىن جاساۋ سەكىلدى ماسەلە سونىمەن قوسا جۇرەدى. "رۋحاني جاڭعىرۋعا" بايلانىستى جاڭا جوبالار جاساپ، جوعارى جاققا ۇسىنساق دەگەن ويىمىز بار. قالاي بولعاندا دا بويىمىزداعى بارلىق كۇش-جىگەرىمىزدى، بار تالانتىمىزدى، تاجىريبەمىزدى، جاستارىمىزدا بار لاپىلداعان وتتى، ولاردىڭ جاڭاشا ويلاۋ قابىلەتىن جازۋشىلار وداعىن جاڭا دەڭگەيگە كوتەرۋگە جۇمسايمىز. ادەبيەتتىڭ يگىلىگى، دامۋى ءۇشىن جۇمىس ىستەيمىز، - دەدى ۇلىقبەك ەسداۋلەت.