وسىدان سەگىز جىل بۇرىن اقتاۋ قالاسىنداعى قاتاڭ تارتىپتەگى كولونيادان 60-تان استام تۇتقىن قاشۋعا ارەكەت جاسادى. سول كەزدە قاراۋىلدا تۇرعان 19 جاستاعى ەربول وتاربايەۆ جالعىز ءوزى 40 قاشقىننىڭ جولىن بوگەگەن بولاتىن.

وسى وقيعانىڭ جەلىسىمەن قازاقستاندىق «ايۋ سينەما» كينوكومپانياسى «حابار» اگەنتتىگى جانە ق ر ۇلتتىق ۇلاننىڭ قولداۋىمەن «التىنشى بەكەت» اتتى كوركەم فيلم ءتۇسىردى.

بۇگىن ءفيلمنىڭ جابىق كورسەتىلىمى ءوتتى. دراما جانرىندا تۇسىرىلگەن كينوتۋىندى ەربول وتاربايەۆتىڭ ەرلىگى توڭىرەگىندە ءوربيدى.

ەربول وتاربايەۆتى اكتەر سانۇرجان سۇلەيمەنوۆ سومدادى. جاۋىنگەرلىك قىزمەت اتقارۋ كەزىندە كورسەتكەن ەرلىگى مەن قايسارلىعى ءۇشىن ءىىى دارەجەلى «ايبىن» وردەنىمەن ناگرادتالعان ەربول وتاربايەۆتىڭ ءوزى ءتۇسىرىلىم كەزىندە سانۇرجانعا وبرازعا كىرۋىنە كومەك كورسەتىپ، كەڭەس بەرگەن.

15 ناۋرىزدان باستاپ كورەرمەنگە جول تارتاتىن «التىنشى بەكەت» كوركەم ءفيلمى دوستىق پەن ماحاببات، قايسارلىق پەن ساتقىندىقتى، جات اعىمنىڭ تاراپىنان تونگەن ءقاۋىپ پەن تۇرمە ءومىرىن سۋرەتتەيدى.

كينوكارتينانىڭ پروديۋسەرى - كينەماتوگرافيست دانيار يبراگيموۆ.  فيلم رەجيسسەرى – Cەرىكبول وتەپبەرگەنوۆ. بۇل ونىڭ رەجيسسەر رەتىندە تۇسىرگەن العاشقى ءىرى جۇمىستارىنىڭ ءبىرى بولدى. سونىمەن قاتار سەرىكبول وتەپبەرگەنوۆ فيلمدە تۇرمە قىزمەتكەرىنىڭ ءرولىن سومدايدى.

«التىنشى بەكەت» كوركەم فيلمىندەگى اكتەرلىك قۇرامنىڭ 80 پايىزى – ناعىز اسكەري قىزمەتشىلەر، ۇلتتىق ۇلان قاتارىندا قىزمەت ەتەتىن جاۋىنگەرلەر. اتالمىش فيلم ارقىلى اسكەري قىزمەتكەرلەر وزدەرىن اكتەرلىك قىرىنان دا كورسەتە ءبىلدى. فيلمدە ۇلتتىق ۇلاننىڭ اسكەري تەحنيكاسى قولدانىلدى.

اكتەرلەر وبرازعا ەنۋ ءۇشىن جالعىز ادامعا ارنالعان كامەرادا وتىرعان.

باستى كەيىپكەر سانۇرجان سۇلەيمەنوۆ كولونياداعى كازارمادا بىرنەشە كۇن تۇرىپ، ساربازدارمەن بىرگە جاتتىعۋلارعا قاتىسقان. ەكىنشى باس كەيىپكەر جاسۇلان ومىربەك قاتاڭ تارتىپتەگى كولونيانىڭ باقىلاۋشىلارىمەن بىرنەشە كۇن جۇمىس ىستەدى.

جابىق كورسەتىلىمنەن كەيىن وتكەن  باسپا ءسوز كونفەرەنسياسىندا ءسوز العان پروديۋسەرى دانيار يبراگيموۆ ءفيلمدى تۇسىرۋدەگى ماقساتىن ايتىپ بەردى.

-«التىنشى بەكەت»  شىنايى وقيعالارعا نەگىزدەلگەن فيلم. ەل تىنىشتىعىن كۇزەتكەندەردىڭ ەرلىگى جايىندا شاعىن ورتا عانا بىلەدى. ءبىز فيلم ارقىلى بۇل جاعدايدى وزگەركىمىز كەلدى، - دەدى پروديۋسەر.