ماجىلىستەگى ۇكىمەت ساعاتىندا دەپۋتات ناتاليا جۇمادىلدايەۆا ق ر ءبىلىم جانە عىلىم ءمينيسترى ەرلان ساعادييەۆتىڭ ەلەكتروندىق جۋرنالداردى جۇرگىزۋ ءتارتىبى تۋرالى بۇيرىعىن سىنعا الدى، دەپ حابارلايدى قازاقپارات.
ءتيىستى بۇيرىققا سايكەس، سىنىپ جۋرنالىن جۇرگىزۋ ءاربىر ءمۇعالىم ءۇشىن مىندەتتى سانالادى. مەكتەپ ەلەكتروندىق جۇيەگە قوسىلعان جاعدايدا سىنىپ جۋرنالى تەك ەلەكتروندىق فورماتتا تولتىرىلادى. ياعني، قاعاز تۇرىندە تولتىرىلمايدى. دەگەنمەن دە ەلەكتروندىق جۋرنال ءاربىر توقساننىڭ قورىتىندىسى بويىنشا قاعازعا باسىلىپ، نومىرلەنىپ، مەكتەپتىڭ مورىمەن بەكىتىلەدى.
«ياعني، ءمۇعالىم قاعاز جۋرنالدىڭ قولدان جاسالعان كوشىرمەسىن قۇرادى. ەرلان كەنجەعالي ۇلى، ەلەكتروندىق جۋرنالدىق جانە ونىڭ قاعاز نۇسقاسىنا تىيىم سالۋدىڭ ءمانى نەدە؟»، - دەدى ءماجىلىس دەپۋتاتى مينيسترگە قاراتىپ ايتقان ساۋالىندا.
مينيستر ەرلان ساعادييەۆتىڭ سوزىنە قاراعاندا، بۇل ۋاقىتشا شارا. مۇعالىمدەر مالىمەتتەردىڭ ساقتالۋىنا سەنىمدى بولۋى ءۇشىن وسىنداي ۇسىنىس جاساعان.
«بولاشاقتا مۇعالىمدەر وقۋشىلاردىڭ العان باعالارى ءقاۋىپسىز تۇردە ساقتالعانىنا كوزدەرى جەتكەننەن كەيىن، ءبىز بۇيرىقتى اۋىستىرىپ، وسى پۋنكتىڭ كۇشىن جويا الامىز»، - دەدى ءبىلىم جانە عىلىم ءمينيسترى.
پىكىر قالدىرۋ