اۋىلدىق مەديسينالىق ۇيىمدار الداعى ءۇش جىل ىشىندە، ياعني 2021 جىلعا دەيىن كەزەڭ-كەزەڭمەن قاعازسىز جۇمىس فورماتىنا كوشىرىلەدى. بۇل تۋرالى بۇگىن ۇكىمەت وتىرىسىنىڭ قورىتىندىسى بويىنشا وتكەن بريفينگتە دەنساۋلىق ساقتاۋ ءمينيسترى ەلجان ءبىرتانوۆ ءمالىم ەتتى، دەپ حابارلايدى Qamshy.kz اقپارات اگەنتتىگى. 

ەل حالقىنىڭ دەنساۋلىعى ماسەلەلەرىن رەتتەيتىن سالا باسشىنىڭ ايتۋىنشا، وڭىرلەردەگى مەديسينالىق ۇيىمداردى قاعازسىز جۇيەگە اۋىستىرۋ ماقساتىندا جەرگىلىكتى اتقارۋشى ورگاندارمەن بىرلەسىپ ارنايى ءىس-شارالار جوسپارى ەنگىزىلىپ جاتىر. ەڭ الدىمەن، ول ءۇشىن اۋداندىق جانە وبلىستىق دەڭگەيلەردەگى مەديسينالىق مەكەمەلەردى ينتەرنەت جەلىسىنە قوسۋ قاجەت.

«سونىمەن قاتار، دارىگەرلەر مەن مەيىربيكەلەردىڭ جۇمىسىن كومپيۋتەرلىك تەحنيكامەن قامتاماسىز ەتۋ جانە وعان ارنايى مەديسينالىق باعدارلامالار مەن اقپاراتتىق جۇيەلەردى ەنگىزۋ كەرەك. ءقازىر ينتەرنەت جەلىسىنە قوسۋ ءۇشىن تەحنيكالىق جانە گەوگرافيالىق ماسەلەلەرگە بايلانىستى قيىندىقتار تۋىنداپ جاتىر»، — دەدى مينيستر.

ەلىمىز بويىنشا اۋدان ورتالىقتارىنداعى بارلىق مەديسينالىق ۇيىمدار عالامتورعا قوسىلعان.

«اۋىلدارداعى مەديسينالىق ۇيىمدار مەن پۋنكتتەرگە كەلسەك، ولاردىڭ بارلىعىن 2021 جىلعا دەيىن، ءۇش جىل بويى كەزەڭ-كەزەڭمەن سيفرلىق جۇمىس فورماتىنا كوشىرۋ كوزدەلگەن. ياعني، وسى جىلدار ىشىندە اۋىلداردى ينتەرنەتكە قوسۋدى جانە قاعاسىز جۇيەگە كوشىرۋدى 100 پروسەنتكە جەتكىزۋ جوسپارلانىپ وتىر»، — دەدى مينيستر ە. ءبىرتانوۆ.

ە. ءبىرتانوۆ مينيسترلىكتىڭ مەديسينالىق ساقتاندىرۋدى ەنگىزۋدى پىسىقتاپ، ونى ەنگىزۋ ءۇشىن قارقىندى دايىندىق جۇمىستارىن جۇرگىزىپ جاتقانىن باياندادى. مەديسينالىق ۇيىمداردى مەديسينالىق ساقتاندىرۋدى ەنگىزۋگە ازىرلەۋ ءۇشىن قاعازسىز جۇمىس فورماتىنا كوشىرۋ جۇمىستارىن بيىلعى جىلدىڭ سوڭىنا دەيىن اياقتاۋ كوزدەلگەن. قازىرگى كەزگە دەيىن بۇل ءتورت وڭىردە ەنگىزىلە باستاعان، ولار: قاراعاندى، اقمولا، قوستاناي جانە باتىس قازاقستان وبلىستارى. وسى جوبا اياسىندا بۇرىن نورماتيۆتىك اكتىلەرمەن تالاپ ەتىلگەن 120-دان استام قاعاز فورمالارى جويىلادى.

«ءبىرىنشى كەزەكتە، ول – اۋرۋحانالارداعى ەمدەلۋشىلەردىڭ سىرقاتنامالارى مەن ەمحانالارداعى امبۋلاتوريالىق كارتالارداعى جازبالار»، — دەپ ناقتىلادى مينيستر. 

سونداي-اق جوعارىدا اتالعان العاشقى ءتورت ءوڭىردىڭ تاجىريبەسىن ەسكەرۋمەن، 1 ساۋىردەن باستاپ ەلىمىزدىڭ تاعى 4 ءوڭىرىن وسى جوباعا تارتۋ ۇيعارىلعان، ال 1 شىلدەدەن باستاپ تاعى ءتورت ءوڭىر قامتىلماق. ال ءتورتىنشى توقساندا قالعان 4 ءوڭىر قوسىلادى.

«وسىلايشا، بيىلعى جىلدىڭ سوڭىنا دەيىن بارلىق وڭىرلەر نەگىزگى مەديسينالىق قۇجاتتامالار بويىنشا قاعازسىز فورمات جۇيەسىنە كوشىرىلەدى. ول ءۇشىن ءقازىر وڭىرلەردە ءتيىستى تەحنيكالىق جانە باعدارلامالىق قامتاماسىز ەتۋ جۇمىستارى جۇرگىزىلىپ جاتىر»، — دەدى ە. ءبىرتانوۆ.

سونىمەن قاتار ول ءقازىر بارلىق وڭىرلەردەگى اۋداندىق ورتالىق اۋرۋحانالار مەن ەمحانالار بۇل جۇيەگە قوسىلعانىن جەتكىزدى. بۇدان وزگە، مينيستر قازىرگى تاڭدا مەديسينالىق ساقتاندىرۋدى ەنگىزۋگە قاتىستى جۇمىستاردىڭ جۇرگىزىلۋ بارىسىنا ناقتى توقتالدى. ەسكە سالايىق، وتكەن جىلى ءوزىن-وزى جۇمىسپەن قامتىعان حالىق سانىنىڭ جوعارى بولۋىنا بايلانىستى مىندەتتى الەۋمەتتىك مەديسينالىق ساقتاندىرۋدى ەنگىزۋ مەرزىمدەرى كەيىنگە قالدىرىلعان بولاتىن.

«ءبىز ءوز تاراپىمىزدان مەديسينالىق ساقتاندىرۋدىڭ نەگىزگى ەلەمەنتتەرىن ەنگىزدىك. اقشالاي قاراجاتتىڭ قورعا ءتۇسۋى بۇگىنگى تاڭدا جۇزەگە استى، جۇمىس ىستەيتىن 5 ملن استام ازاماتتان 5 ملرد تەڭگەگە جۋىق قاراجات ءتۇستى. بۇل قاراجات 2019 جىلى ءمامس ەنگىزىلگەن ساتتەن باستاپ ساقتاندىرىلعان ازاماتتارعا جاڭا مەديسينالىق قىزمەتتەردى كورسەتۋگە جۇمسالادى»، — دەپ تۇيىندەدى مينيستر.

ايتا كەتەيىك، قازىرگى تاڭدا دەنساۋلىق ساقتاۋدى سيفرلىق جاڭارتۋ ماقساتىندا 4 وڭىردە مەديسينالىق قۇجاتتاردى پيلوتتىق قاعازسىز جۇرگىزۋ ىسكە قوسىلدى، مەديسينالىق ۇيىمداردى اقپاراتتىق جۇيەلەرمەن قامتۋ 75،5% قۇرادى، كومپيۋتەرلەرمەن جاراقتاندىرۋ 2،5 ەسە ارتتى. مەديسينالىق ۇيىمداردىڭ 56% ءۇشىن ينتەرنەت قولجەتىمدى.