«تويىڭ تويعا ۇلاسسىن»، «قازاقتىڭ تويى بىتپەسىن». بۇل – قازاقتىڭ قۇلاعىنا ابدەن سىڭگەن سوزدەر. بار جيعان-تەرگەنىن تويعا جۇمسايتىن قازاقتار ونى تەگىن جاساسا قالاي بولار ەدى؟ رەجيسسەر قاناعات ءمۇستافيننىڭ باستاماسىمەن تۇسىرىلگەن «توي ليۋبوي سەنوي» كومەديالىق فيلمىندە قازاق وتباسى ۇزاتۋ تويىن جاساۋ ءۇشىن قالتاسىنان ءبىر تيىن دا شىعارمايدى.

بۇگىندە كەز كەلگەن كينوتەاترعا كىرسەڭ، وتاندىق فيلمدەر اراسىندا اجەپتاۋىر تاڭداۋ تۇرادى. ءبىر كۇنگە بىرنەشە قازاق ءفيلمىنىڭ ءتىزىلىپ تۇرعانىن كورگەندە كەۋدەڭدى قۋانىش كەرنەيدى. سول ءتىزىمنىڭ قاتارىنا 21 ناۋرىزدان باستاپ «توي ليۋبوي سەنوي» ءفيلمى قوسىلاتىن بولادى. كەشە بۇل فيلم جۋرناليستەرگە كورسەتىلدى.

فيلم جەلىسى بويىنشا جەرگىلىكتى تەلەارنادا جۇمىس ىستەيتىن ماقسات قارىنداسىنىڭ ۇزاتۋ تويىنا ارنالعان اقشانى تاكسيدە ۇمىتىپ كەتەدى. الايدا وتباسىن رەنجىتىپ الماس ءۇشىن توي قامىن تولىقتاي ءوز موينىنا الادى. سەبەبى تويعا ءبىر كۇن قالعان. بۇل ۋاقىت ناۋرىز مەيرامىنا سايكەس كەلگەندىكتەن، تەلەارنا رەجيسسەرى قىزمەتكەرلەرگە مەرەكەلىك شوۋ-باعدارلاما جاساۋدى تاپسىرادى. مۇنى پايدالانعان ماقسات ءبىر وقپەن ەكى قوياندى اتادى. تەلەارنا ستۋدياسىندا ءبىر جاعىنان قارىنداسىنىڭ ۇزاتۋ تويىن جاساسا، ەكىنشى جاعىنان توي تىكەلەي ەفيردەن باعدارلاما رەتىندە كورسەتىلەدى.

فيلم سوڭىندا تاكسيشى جوعالعان اقشانى يەسىنە قايتارىپ، ال جىگىت سۇيگەنىمەن قاۋىشادى. ال ۇستىنە شاپان كيگەن تاكسيشىنىڭ قىدىر اتا ەكەنى بەلگىلى بولادى. «ناۋرىزدا تەك عاجايىپ ورنايدى» دەگەن يدەيانى العا تارتقان كينو كورەرمەننىڭ كوڭىلىن بىردەن باۋرادى. مۇنى كورسەتىلىم بىتكەننەن كەيىنگى حالىقتىڭ پىكىرىنەن بايقادىق.

«قازاق كينوسىنا ادەمى كومەديا كەلدى. بيىل تۇسىرىلگەن كومەديالىق فيلمدەردىڭ ىشىندە قازاقتىڭ ءسالت-داستۇرىن جاڭا ۇلگىدە كورسەتىپ، ونى كەرەمەت جەتكىزە ءبىلدى»، - دەپ اسەرىمەن ءبولىستى ءبىر كورەرمەن.

رەجيسسەر قاناعات مۇستافين بۇل جوبانىڭ 5-6 جىل بۇرىن دايىندالعانىن ايتتى. «باستى ماقسات – ءتول مەرەكەمىز ناۋرىزدى ناسيحاتتاي وتىرىپ، حالىقتىڭ كوڭىلىن كوتەرۋ»، - دەيدى رەجيسسەر.

قاناعات مۇستافينمەن قوسا رەجيسسەر ايدىن ساماحان دا اتالمىش جوبا اياسىندا جۇمىس ىستەدى. العاشىندا ءفيلمنىڭ اتاۋى «جاڭا باقىت» دەپ اتالعان، كەيىن «ەرەكشە توي» دەپ اتالدى. اقىر سوڭىندا جوبا اۆتورلارى كەلىسىپ، «توي ليۋبوي سەنوي» دەگەن اتاۋدى ءجون ساناعان.

فيلم ورىس تىلىندە تۇسىرىلگەنىمەن، رەجيسسەرلەر قازاق تىلىندە دۋبلياج بولاتىنىنا سەندىردى.

ايتا كەتەيىك، ماقساتتىڭ رولىندە ءشارىپ سەرىك، قارىنداسىنىڭ رولىندە اقبوتا-نۇر سەيتماعامبەت وينادى. ال ولاردىڭ اتا-اناسىنىڭ ءرولى ونەرلى جۇپ داناگۇل جانە ازات سەيتمەتوۆتەرگە بۇيىردى.