ىمىرت ۇيىرىلگەن كەزدەن باستاپ ستۋدەنتتەر قالاشىعىنداعى جاستار  كوشەگە شىعۋعا قورقاتىن. سەبەبى جارتى جىل ىشىندە بۇل جەردە زورلانىپ، ولتىرىلگەن 3 قىزدىڭ ءمايىتى تابىلعان.

بۇل كەڭەس وداعى ىدىراپ جاتقان كەز ەدى. رەسپۋبليكاداعى ءىرى ۋنيۆەرسيتەتتەردىڭ بىرىندە ايەلدەر مەن قىزدار اراسىندا، ستۋدەنتتەر اراسىندا قورقىنىش پايدا بولدى.

بارلىعى ءبىر اۋىزدان قالاشىقتا پايدا بولعان «مانياك» تۋرالى ايتا باستادى.

ءبىرىنشى قۇرباننىڭ ءمايىتىن كىشكەنتاي بالالار ۋنيۆەرسيتەتكە كورشىلەس كوپقاباتتى ۇيلەردىڭ بىرىنەن كورىپ قالعان.  باۋىزدالعان قىزدى كورگەن التى جاستاعى بالا ءبىراز ۋاقىتقا دەيىن سويلەي الماي قالىپتى.  جاس قىز زورلانىپ،  سومكەسى تونالعان. باستاپقىدا پوليسيا قانداي دا ءبىر «مانياكتىڭ»  پايدا بولعانى تۋرالى ويلاماعان دا.

قىزدىڭ مايىتىنىە ساراپتاما جاساي كەلە، قىلمىسكەردىڭ قانىنىڭ توبىن انىقتاۋ مۇمكىن بولعان. قانى ەكىنشى توپقا جاتاتىنىن بىلگەن سوڭ، پوليسيا وسى بەلگى بويىنشا بۇرىن-سوڭدى جاۋاپقا تارتىلعانداردى تەكسەرەدى. الايدا ول ناتيجە بەرمەيدى.

ءبىر اي وتكەن سوڭ الماتىنىڭ ءىىب قىزمەتكەرلەرى ىىم-نەن كومەك سۇرايدى. سەبەبى تاعى ءبىر قىز ءىز-تۇسسىز  جوعالادى.

جاتاقحاناعا كەشكە قاراي كەلەمىن دەگەن قىز ءىز-تۇسسىز جوعالىپ كەتكەن. قازۇۋ توڭىرەگىن شارلاعان پوليسيا ەشتەڭە تاپپاي قۇر قول قايتادى. ءدال وسى كەزدە پوليسيا بۇل قىلمىستارعا «مانياك»، قانىشەردىڭ قاتىسى بار ەكەنىن تۇسىنەدى.

قانىشەردىڭ كىم ەكەنىن انىقتاۋ، بۇل ىستەگى ەڭ قيىن ءارى ۇزاققا سوزىلعان پروسەسس بولادى. پوليسيا ۋنيۆەرسيتەت رەكتوراتىنان بۇرىنعى ستۋدەنتتەر مەن وقۋدان شىعارىلعانداردىڭ ءتىزىمىن قاراپ، زەرتتەيدى. ۋنيۆەرسيتەت وقىتۋشىلارى مەن قىزمەتكەرلەرىنە دەيىن كۇدىككە ىلىنەدى. پوليسيا 7000-عا جۋىق مەديسينالىق كارتالاردى تەكسەرىپ شىققان.

باستى بەلگىلى نارسە – قىلمىسكەردىڭ ۋنيۆەرسيتەت ماڭايىندا تۇراتىندىعى جانە ونىڭ اۆتوكولىگى جوق ەكەندىگى بولدى.

ءتىپتى، پوليسيا مىناداي قيتۇرقى ارەكەتكە بارعان. بەس ايەل پوليسەيلەردى اشىق كيىندىرىپ، بەتىن ارلەپ ۋنيۆەرسيتەت ماڭايىندا «قىدىرىپ» كەلۋدى تاپسىرعان. وسى ءتاسىل ارقىلى قىلمىسكەردى ۇستاماقشى بولعان. الايدا قىلمىسكەر بۇل كەزدە دە ۇستالمايدى.

  ءبىر كۇنى پوليسيا تاعى ءبىر قۇرباننىڭ ءمايىتىن وقيعا ورىنىندا تەكسەرىپ جاتقان كەزدە قىزمەتكەرلەرگە قاراپ تۇرعان ءبىر ەر ادامدى بايقايدى. ول بۇرىن  زورلاۋ بويىنشا سوتتالعان ەر ادام بولىپ شىعادى. الايدا ونىڭ قان توبى قىلمىسكەردىڭ قان توبىمەن سايكەس كەلمەگەندىكتەن، پوليسيا ونى كۇدىكتى رەتىندە قاراستىرا المايدى.

كەيىن بەلگىلى بولعانداي، قىلمىسكەر سەرگەي مانجيكوۆ ەسىمدى ەر ادام بولعان. بىرنەشە كۇن وتكەن سوڭ س.مانجيكوۆ پوليسيانى ءوزىنىڭ تۇرعىلىقتى جەرىنە شاقىرىپ، ءبىر جاعىمسىز ءيىستىڭ مازالايتىنىن ايتادى. ونىڭ ۇيىنە كەلىپ جەتكەن قۇقىق قورعاۋ قىزمەتكەرلەرى تۇرعىن ۇيدەن ەشقانداي ءيىستىڭ شىقپايتىنىن انىقتاپ،  مانجيكوۆتىڭ اقىل-ەسى كەم دەگەن ويعا كەلەدى.

وسى ۋاقىت ارالىعىندا تاعى ءبىر قىلمىس بولادى. ادەتتەگىدەي، تاعى ءبىر قىز زورلانىپ، ولتىرىلگەن. ءبىراق ەشقانداي  ايعاق تابىلمايدى.

ءسويتىپ جۇرگەندە پوليسياعا ءبىر جۇپ حابارلاسادى. ولاردىڭ ايتۋىنشا، بەلگىسىز ەر ادام ەكەۋىنە شابۋىل جاساعان. كەزدەسۋگە كەشىگىپ كەلگەن جىگىت ءوزىنىڭ قۇربىسىنا بەلگىسىز ەر ادامنىڭ  ءتيىسىپ جاتقانىن كورگەن. ارادا توبەلەس ورناپ، كۇدىكتى جىگىتتى پىشاقتاپ، قاشىپ كەتكەن. ءزابىر كورگەن قىز وزىنە شابۋىلداعان ەر ادامدى سۋرەتتەپ بەرگەندە پوليسيا ونى بىردەن تانيدى. قىلمىسكەر – پوليسيانىڭ كوز الدىندا جۇرگەن سەرگەي مانجيكوۆ ەدى.

ونىڭ مەكەن-جايىن بىلگەن پوليسيا بىردەن قىلمىسكەردى ۇيىنەن ۇستاپ الادى. باستاپقىدا ءوزىنىڭ كىناسىن مويىنداماعان ول، تەك قان توبى قىلمىسكەردىكىمەن سايكەس كەلەتىندىگى انىقتالعان سوڭ عانا بارلىق شىندىقتى جايىپ سالادى.

قىلمىسكەردى قان توبى سايكەس كەلمەگەندىكتەن، ۇزاق ۋاقىت ۇستاي الماي كەلگەن. مانجيكوۆتىڭ قان توبى 2-ەمەس، 3-بولىپ شىققان. ساراپتاما دۇرىس جاسالماۋى سەبەبىنەن، تاعى بىرنەشە قىز قۇبھربان بولىپ، ەر ادام اۋىر جارالاندى.

قانىشەردىڭ ۇيىندە ىزدەستىرۋ جۇرگىزگەن پوليسيا قىزمەتكەرلەرى ول ولتىرگەن قىزداردىڭ زاتتارىن، اشەكەيلەرىن تاپقان. قىلمىسكەر ءتىپتى ءوز قۇرباندارىنىڭ اشەكەيلەرىن اپكەلەرى مەن سۇيىكتىسىنە سىيلاعان.

تەرگەي اياقتالعان سوڭ، سەرگەي ماجيكوۆ كەشىرىم سۇراپ، جىلاپ جالبارىنعان كورىنەدى. الايدا، سوت وعان قاتىستى ەڭ قاتاڭ جازا – ءولىم جازاسىن تاعايىندادى.