«ارسىز بولماي اتاق جوق» نەمەسە «اتىڭ شىقپاسا، جەر ورتە». ءقازىر ونىڭ ورنىنا «حايپ» دەگەن تەرميندى قولدانا باستادىق. ەلگە تانىلۋدىڭ ەرسىلەۋ جولىن تاڭداعاندار ەلىمىزدە كوپ-اق. ءبىرى «جەزوكشەلەرگە» قامشىسىن الا جۇگىرسە، ەكىنشىسى مىڭداعان كورەرمەننىڭ كوزىنشە توسەك توڭىرەگىن شيىرلاپ الەك. ۇلتتىڭ قان تازالىعىن ساقتايمىن دەپ، قازاق قىزدارىنىڭ ءجۇرىس-تۇرىسىن اڭديتىندار دا پايدا بولدى. ولار كىم؟ نەنى ماقسات تۇتادى؟ Qamshy.kz اقپارات اگەنتتىگى داڭق پەن داقپىرتتىڭ ارا-جىگىن اجىراتپايتىن جۇلدىزداردى ءبىر تىزىمدەپ كوردى.
جان احمادييەۆ. جۋىردا «زاماناۋي جىراۋ» كوشەدەگى «جەزوكشەلەردى» قامشىمەن ساباپ، حايپتىڭ كوكەسىن كورسەتتى. الەۋمەتتىك جەلىدەگى وقىرمان پىكىرى قاق جارىلدى. بىرەۋلەر جان احمادييەۆتىڭ ارەكەتىن قولداپ، «ناعىز قازاقتىڭ ەر ازاماتى»، «نەگە بارلىق قازاق جىگىتتەرى احمادييەۆتاي بولمايدى ەكەن؟» دەپ جارىسا جازسا، بۇلارعا قارسى توپ بارلىق ادامنىڭ قۇقىعى تەڭ ەكەنىن العا تارتىپ، رەپەردىڭ ءىسىن قىلمىسقا بالادى.
«جەزوكشەلەردى ساباعانىنا نەگە نامىستاناسىڭدار؟ ولارعا زاڭ جوق ەكەن، دەمەك ءوزىمىز شارا قولدانۋىمىز كەرەك. اقشاعا ارىن ساتقانداردىڭ ءسوزىن سويلەگەندەر – اقشاعا ارىن ساتاتىندار. كوشە كەزىپ، ءتانىن ساتىپ اقشا تاباتىنداردى ءوز باسىم ادام قاتارىنا جاتقىزا المايمىن. قانداي جاعداي بولسا دا، جەزوكەشەلىكپەن اينالىساتىنداي جاعدايعا جەتكەندەر ادام اتىنان ايىرىلعان»، - دەگەن پىكىر ءبىلدىردى جەلى قولدانۋشىسى رىسگۇل ايداروۆا.
ال جان احمادييەۆتىڭ بۇل ارەكەتىن زاڭعا قايشى دەپ باعالاعان زارينا اداسبايەۆا ەسىمدى قولدانۋشى: «جەزوكشەلىك ءۇشىن سوتتامايدى، ال ءسىزدى ادامدى ساباعانىڭىز ءۇشىن تۇرمەگە جابۋ كەرەك. ۇياتسىز! سەن سياكتى ارسىزدار قازاق قىزدارىنىڭ نامىسىن قورعاماي-اق قويسىنشى!»، - دەپ جازدى.
ۋاقىت وزدىرماي جان احمادييەۆتىڭ «كوشەدەگى قىزداردى» قامشىمەن ساباعان ۆيدەوسىن تەكسەرۋگە الماتى قالالىق ءىىد كىرىستى. ءىس ناسىرعا شابادى دەپ قورىقتى ما، الدە اقيقاتىن ايتىپ اعىنان جارىلعىسى كەلدى مە – كوپ ۇزاماي جان احمادييەۆ بار شىندىقتى مويىندادى. «جەزوكشەلەر رولىندە ويناعان – مەنىڭ ايەلىم مەن تانىستارىم»، - دەپ ات-تونىن الا قاشتى.
وتىرىگى شىققان رەپەر: «قامشى – حايپ، قامشى – لايك» دەپ اندەتىپ ءجۇر. دەگەنمەن جان احمادييەۆتى قولدايتىن حالىق از ەمەس كورىنەدى. جەلىدەگى جارىسا جازىلعان پىكىرلەرگە سۇيەنسەك، حالىققا جان احمادييەۆ سەكىلدى جىگىتتەر كەرەك. باسقالار وسىدان كەيىن اياقتارىن اڭداپ باساتىن بولادى.
بىلتىر «تەمىر قاتىن» دەگەن بەينەبايانىنا سىرت كەلبەتى بايان ەسەنتايەۆاعا ۇقساس قىزدى ءتۇسىرىپ، حالىقتان ماقتاۋ ەستىگەن ەدى. الايدا قارسى پىكىرلەر دە ايتىلدى. «وزگەنىڭ باسىنا تونگەن قارا بۇلتتى قارا باسىنىڭ قامى ءۇشىن پايدالانىپ وتىر»، - دەپ ايىپتاعاندار دا تابىلدى.
راس، بايان ەسەنتايەۆانىڭ اتىن اۋزىنا العان ادامنىڭ اتاعى شارىقتاپ كەتەتىن تۇستا احمادييەۆ اقپارات كەڭىستىگىندە جارق ەتە قالدى. بۇل جولى دا سولاي بولۋىن كۇتتى مە ەكەن؟! كىم ءبىلسىن...
جانىبەك ءيمانمازىر – وزگە ۇلت وكىلدەرىمەن قولتىقتاسىپ جۇرگەن قىزدارعا ەسكەرتۋ جاساپ، ودان قالسا بالاعاتتاپ، قول كوتەرۋگە دەيىن بارىپ جۇرگەن ادام. ءوزىنىڭ ارەكەتى تۇسىرىلگەن ۆيدەولاردى جەلىگە سالىپ، حالىقتىڭ قىزۋ تالقىسىنا شىعارادى.
ينتەرنەتتە تاراعان ۆيدەولارىن جانىبەكتىڭ ءوزى «حالىقتى وياتۋ» دەپ تۇسىندىرەدى. قولدارىنداعى نەكە ساقيناسىنا قاراماستان، قازاق قىزى مەن وزگە ۇلت وكىلىنىڭ تۇرمىس قۇرعانىنا سەنبەي قويعانى بار.
جەلى قولدانۋشىلاردىڭ اراسىندا: «جانىبەك ءيمانمازىر قازاق قىزدارىن قۇتقارىپ ءجۇر»،- دەپ قولداۋ بىلدىرەتىندەر ءبىرسىپىرا. ولار قازاق قىزدارىنىڭ وزگە ۇلتتىڭ جەتەگىندە كەتپەگەنىن قالايتىندارىن جازىپ، جانىبەككە جاقتاسادى.
ونىڭ ءىسىن قىلمىس دەپ باعالايتىندار دا كەزدەسەدى. «قازاق جىگىتتەرى قازاق قىزدارىن ءوزىنىڭ جەكەمەنشىك زاتىنداي كورىپ، جابايىلىق تانىتۋىن قويۋ كەرەك»، - دەيتىندەر دە بار.
«قوعامداعى جەر مەن سۋدىڭ اڭگىمەسى كوتەرىلگەندە جانىبەك ءيمانمازىردىڭ اتى دا، ءتىپتى ءيىسى دە شىقپايدى. بۇل ۇلتشىلدىقتىڭ، ۇلتجاندىلىقتىڭ قاي ءتۇرى؟ -دەپ جازدى ەلدار ايمۇحامبەت اتتى قولدانۋشى.
ءتانىن كورسەتۋ — حايپتىڭ ءوتىمدى ءتۇرى. ول جاعىنان ءوزىمىز جان-جاقتان داتتاپ، جاپپاي جارنامالاعان ايجان بايزاقوۆا كوش باستاپ تۇر. كوكىرەگىن اشىپ، جارتىلاي جالاڭاشتانعان ونىڭ سۋرەتتەرى ينتەرنەتتى كەزىپ كەتتى. بايزاقوۆا تۇسكەن كەز كەلگەن بەينەبايان بىردەن كوپشىلىكتىڭ نازارىنا ىلىگىپ، تالقىسىنا تۇسەدى. وعان Alem Band توبىنىڭ سوڭعى بەينەبايانى بىردەن-بىر دالەل.
قارا پيارمەن تانىمال بولماققا تالپىنعانداردىڭ قاتارىنا جۋرناليستەر دە قوسىلىپتى. «كەشكى كەزدەسۋ» باعدارلاماسىنىڭ جۇرگىزۋشىسى امان تاسىعان Youtube جەلىسىندە TalkLike ۆيدەوبلوگىن جۇرگىزىپ، ەل اۋزىنداعى ادامدارعا بەلدەن تومەن سۇراق قويادى.
ول سۇحباتتارىنىڭ بىرىندە: «مەنىڭ بەلدەن تومەن سۇراق قوياتىن سۇحباتىمنىڭ وزىندىك سىرى بار»، - دەپ جاۋاپ بەرىپ ءجۇر. ال وعان دەيىن امان تاسىعان وتكىر ءتىلدى جۋرناليست اتانعان ەدى. بىرەۋلەر مۇنداي ساۋالداردى قالىپتى قابىلداپ، «ۇلى سوزدە ۇياتتىق جوق» دەگەننىڭ اياسىنا سىيدىرسا، ەندى بىرەۋلەر «بۇل – قازاقتىڭ مەنتاليتەتىنە جات نارسە» دەپ جەردەن الىپ، جەرگە سالادى.
