شۋدىڭ ءشوبى يسپانياعا نە ءۇشىن قاجەت؟

/uploads/thumbnail/20170708150908179_small.jpg

 

ۇلان-بايتاق جەرىمىزدىڭ  استى-ۇستىندەگى  قازىناسىن «توناپ» جاتقاندار از ەمەس.     شەتەلدىك ينۆەستورلاردىڭ  ەندىگى قۇنىققانى   – شۋ  وڭىرىندە  وسەتىن  «داڭقتى»  ءشوپ.  ميلليون  دوللار  قاراجات تاباتىن قۋرايدىڭ  جاڭا  يەلەرى −  يسپاندىقتار.

شۋ ءوڭىرى  كۇنى  بۇگىنگە  دەيىن الىس-جاقىن  شەتەلدەرگە «شۋ القابى» (چۋيسكايا  دولينا) دەگەن  اتاۋمەن  كەڭ  تانىمال. سەبەبى  مۇندا  ناشانىڭ   تابيعي،  تازا  ءارى اسا  قۋاتتى، پسيحوتروپتى  اسەرى  جوعارى،  كوپجىلدىق  جابايى    ءتۇرى  وسەدى.  شۋ  ءوڭىرى – اناشانىڭ ورتا  ازياداعى اۋعانستاننان كەيىنگى   ەكىنشى   ءىرى  ايماعى  بولىپ  ەسەپتەلىنەدى.    ءقازىردىڭ  وزىندە  140 مىڭ گەكتار  اناشا  القابىنان جىل سايىن شامامەن  5 مىڭ  تونناداي ءشوپ جينالادى.  ناشانىڭ  شۋ  القابىندا  ناقتى  قاي  كەزدەن  باستاپ  وسە  باستاعانى  تۋرالى  ناقتى مالىمەت جوق.   كەيبىر  دەرەكتەرگە  قاراعاندا،  XVIII عاسىردا   تۇركىستان  وبلىسىنىڭ گەنەرال-گۋبەرناتورى كولپاكوۆسكيي  قۇمدى  تەجەۋ  ءۇشىن  ءۇندى ناشاسىنىڭ تۇقىمىن اكەپ  وتىرعىزعان. ءسويتىپ ورىس ساياساتىنىڭ  سالدارىنان قازاقتىڭ   سورى  ەسەلەنىپتى. ەلىمىزدىڭ زاڭنامالارى  بويىنشا   شۋدىڭ  اناشاسى ناركوتيكتىك  زاتقا  بالانادى.  سوندىقتان اناشا  جيناۋ  جانە  ونى  وتكىزۋ،  تاسىمالداۋ   بويىنشا  ەلىمىزدە  قانشاما قىلمىستىق ءىس  قوزعالىپ، القاپ  ورتەلىپ، دەفوليانمەن  جويۋ  جۇمىستارى  تۇراقتى  جۇرگىزىلىپ كەلەدى. ءبىراق ەش ناتيجە بەرەر ەمەس.  سەبەبى  جۇمىسسىزدىق پەن  قىلمىس جايلاعان  قوعامدا  ناشانىڭ  جولىن كەسۋ مۇمكىن  بولماي  وتىر. الايدا، سوڭعى  جىلدارى  ناشانى  فارماسيەۆتيكاعا  پايدالانۋ  ءىسى  قولعا  الىنىپ  كەلەدى.  يسپانيانىڭ  جانە  اقش-تىڭ  عالىمدارى  قۋراي  قۇرامىنان  تەتراگيدروكاننابيول (تگك) اتتى قاتەرلى ىسىك  پەن قانت  ديابەتىن  ەمدەيتىن  زات  الىناتىنىن  دالەلدەدى.  وسىعان بايلانىستى  ناشانىڭ  ناعىز  وشاعى سانالاتىن  شۋ ءوڭىرىنىڭ  ءونىمىن  ساتىپ،   ميلليون  دوللار كولەمىندە يسپانيادان  ينۆەستيسيا تارتۋ  كوزدەلىپ  وتىر.    يسپانيالىق  «Xeloria» كومپانياسىنىڭ   ناشانى وڭدەۋگە  ليسەنزياسى  بار  كورىنەدى. ءبىراق   قۋرايدى  جيناۋعا  ءالى رەسمي  رۇقسات الا  الماپتى.  جەرگىلىكتى  كاسىپكەر  ءارى عالىم   مارات  قۇلمانوۆتىڭ  ايتۋىنشا،    ءقازىر   شۋ  قالاسىندا  قۇنى  80 ميلليون  دوللارلىق  زاۋىت  سالىنۋدا.  ناشانى   وڭدەۋگە  بايلانىستى  كەرەمەت  جوبالار  جاسالىنىپ   جاتىر.  ەگەر  جوسپار  ىسكە  اسىپ  جاتسا،  شۋ  وڭىرىندە  مىڭداعان  ادامنىڭ  ءومىرىن  امان  الىپ  قالاتىن شيكىزات  وندىرەتىن  ۇلكەن كاسىپورىن  اشىلماق.   سونداي-اق، بۇل  جوبا  جۇزەگە  اسۋى  ءۇشىن  ەلىمىزدەگى كەيبىر  زاڭداردى  وزگەرتۋ  قاجەت.  ءبىر  ايتا  كەتەتىنى، قۋراي  شەتەلدەرگە  ەكسپورتتالمايدى.   تەك تگك  وندىرەتىن  بولامىز.  جەڭىل  ونەركاسىپ  تە  داميدى. جەڭىل  ونەركاسىپ  دەمەكشى،  ناشادان  دارى-دارمەك قانا  ەمەس،  كەندىر  ءجىپ، تەكستيلدى  ماتەريالدار، دجينسا، كوسمەتيكالىق  زاتتار  الۋعا  بولادى.  وسى  جاعىنان كەلگەندە دە، ناشانى  وڭ ماقساتقا  جاراتۋعا  بولادى. راسىندا،  بۇل  كاسىپتىڭ شىعىنى  از  بولماق. سەبەبى  ەشقانداي ەگىن  القابى  دا، جۇمىس  قولى  دا  قاجەت  ەمەس.  بەل   اۋىرتىپ  ەڭبەكتەنگىسى كەلمەيتىن  قازاق  ءۇشىن  ىزدەگەنگە – سۇراعان. بەيرەسمي  دەرەكتەرگە  قاراعاندا،  وسىدان 5-6 جىل  بۇرىن  شەتەلدىك  ينۆەستيسيالىق  كومپانيا  ناشادان  ءدارى  وندىرەمىز  دەگەن  جەلەۋمەن،  ءشوپتى   توننالاپ  جيناپ  الىپ  تايىپ  تۇرعان.   ول كەزدە  قالا  ماڭىنا  500 شارشى مەتر  زاۋىتتىڭ  دۋالى  سالىنىپ،  اياقسىز قالعان. ايتا  كەتەر  تاعى  ءبىر  جايت،  يسپانيادا  ماريحۋانا    سەكىلدى  ناركوتيكتىڭ  جەڭىل  تۇرلەرىن  تۇتىنۋعا رۇقسات  بەرىلگەن.  ءۇي جاعدايىندا  وسىرۋگە،  دارىگەردىڭ  نۇسقاۋىمەن  نەمەسە ارنايى  كلۋبتاردا كوڭىل  كوتەرۋ  ءۇشىن   قولدانۋعا بولادى. اسىرەسە،  سوڭعى  جىلدارداعى كريزيستىڭ  اسەرىنەن ناشانى قولدانۋ تۋرالى  زاڭدار جەڭىلدەتىلىپ، كلۋبتاردى  زاڭداستىرۋ  جاعى  قاراستىرىلعان.  ال  زاڭدى  ناشا كلۋبتارىندا بۇل زاتتىڭ  جاڭا  اسسورتيمەنتتەرى  قاجەت  بولاتىنى  تاعى  انىق. ءبىزدىڭ قازاق ەندى شۋدان وڭدەلمەگەن ءشوپ ساتىپ، يسپانيادان وڭدەلگەن ماريحۋانا تاسىپ جۇرمەسە بولعانى…

جانيا  ابدىبەك "قامشى"  سىلتەيدى

پىكىر قالدىرۋ

قاتىستى ماقالالار