ەلباسى نۇرسۇلتان ءابىش ۇلى نازاربايەۆتىڭ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا ارنالعان "پرەزيدەنتتىڭ بەس الەۋمەتتىك باستاماسى" اتتى ۇندەۋىن تىكەلەي ەفيردەن تىڭدادىم. ءوزىم ۇستاز بولعاندىقتان ويىما بىردەن كەلگەنى – ءدارىس بەرىپ جۇرگەن الىس جانە تاياۋ شەتەلدەن كەلگەن قازاق جاستارىنىڭ وقۋعا تۇسۋىنە مۇمكىندىك جاساۋ. كەلەسى كۇنى ءال-فارابي اتىنداعى قازاق ۇلتتىق ۋنيۆەرسيتەتى جوو-عا دەيىنگى ءبىلىم بەرۋ فاكۋلتەتىندە وقيتىن تىڭداۋشىلارىما ەلباسىمىزدىڭ ۇندەۋىندەگى ءۇشىنشى باستاماسى: "جوعارعى ءبىلىم الۋدىڭ قول جەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ" دەپ اتاپ كورسەتكەنىن ايتىپ تۇسىندىرە وتىرىپ، جىل سايىن بولىنەتىن 54 مىڭ گرانتقا قوسىمشا 2018-2019 وقۋ جىلىنا تاعى 20 مىڭ گرانت بولىنەتىنىن ۇندەۋدى تانىستىرۋ بارىسىندا جەتكىزدىم. ونىڭ 11 مىڭى تەحنيكالىق ماماندىقتار بويىنشا باكالاۆرلىق ءبىلىم بەرۋگە تيەسىلى ەكەندىگىنە تىڭداۋشىلارىم قۋاندى. ويتكەنى ولار جاراتىلىس پانىمەن دايىندالىپ جاتىر. ەلباسىمىزدىڭ جاستارعا سەنەتىنىن جانە جوعارى ءبىلىم الۋ جاھاندىق ءۇردىس، جوعارعى بىلىكتى ماماندارسىز ەلىمىزدىڭ وزىق 30 ەل قاتارىنا قوسىلۋ مۇمكىن ەمەستىگىن تىڭداۋشىلار ءتۇسىنىپ،تاڭداعان جوعارعى وقۋ ورنىنا ءتۇسىپ، جاقسى مامان يەسى بولىپ، قازاقستاننىڭ ءبىر كىرپىشىن قالايتىندارىن قۋانىشپەن جەتكىزدى.

جوعارى وقۋ ورنىنا تۇسكەن ستۋدەنتتەردىڭ جوعارى ءبىلىم الۋىنىڭ ساپاسىن ارتتىرۋدىڭ تاعى ءبىر جولى – شالعايدان كەلگەندەردى جاتاقحانامەن قامتاماسىز ەتۋ كەرەك. جاس كەزىنەن پاتەر جالداپ، بىرەۋدىڭ بوساعاسىن جاعالاماي، زاماناۋي سالىنعان جاتاقحانادا ەشبىر الاڭسىز ءبىلىم الىپ، العان ءبىلىمىن عىلىممەن ۇشتاستىرىپ، سونىمەن قاتار جان-جاقتى مامان بولۋىنا جول اشىلادى.

بۇل باستاما – ءتورتىنشى ونەركاسىپتىك ريەۆوليۋسيا جاعدايىندا قاجەت بولاتىن مىڭداعان جاڭا مامانداردى ازىرلەپ شىعۋعا ۇلكەن مۇمكىندىك بەرەدى.

ا.ك.بەگالييەۆا،

ءال-فارابي اتىنداعى قازاق ۇلتتىق ۋنيۆەرسيتەتى

جوو-عا دەيىنگى ءبىلىم بەرۋ فاكۋلتەتى،

جوو-عا دەيىنگى دايىندىق كافەدراسىنىڭ

اعا وقىتۋشىسى