قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي  جۇمىس كوميتەتىنىڭ  مەملەكەتتىك تاپسىرماسى بويىنشا ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ ۇيىمداستىرۋىمەن استانادا  2018 جىلدىڭ 18 مامىرىندا «تەرمينجاسام قاعيداتتارى جانە ۇلتتىق تەرمينولوگيا ماسەلەلەرى» اتتى رەسپۋبليكالىق عىلىمي-تەوريالىق كونفەرەنسيا وتەدى.

كونفەرەنسيانىڭ ماقساتى – قازىرگى   جاھاندىق  عىلىمي-تەحنيكالىق  دامۋ  ۇدەرىستەرىندە عىلىم، ءبىلىم، تەحنيكا مەن ەكونوميكا، قوعامدىق-الەۋمەتتىك سالالارىنداعى  تەرميندەر مەن تەرمين سوزدەردى جەتىلدىرۋ، تولىقتىرۋ جانە  بىرىزدەندىرۋ ماقساتىندا تەوريالىق جانە پراكتيكالىق  ىزدەنىستەردى  ساراپتاۋ جانە تالقىلاۋ.

كونفەرەنسيادا قازىرگى ۇلتتىق تەرمينولوگيانىڭ  جاي-كۇيى جانە كەلەشەگى، تەرمينجاسام  قاعيدالارى مەن  ۇلتتىق تەرمينولوگيا مىندەتتەرى، قازاق ءتىلىن  لاتىن گرافيكاسىنا كوشىرۋگە بايلانىستى تۋىندايتىن  تەرمينولوگيالىق  مىندەتتەر، تەرمينجاسام  قۇرىلىمىن دامىتۋ، تەرميندى بەكىتۋ، بىرىزدەندىرۋ جانە ستاندارتتاۋدى  ىسكە اسىرۋدىڭ مەملەكەتتىك تەتىكتەرىن دامىتۋ، ۇلتتىق تەرمينقوردىڭ ەلەكتروندىق بازاسىن جاساۋدىڭ عىلىمي-تاجىريبەلىك نەگىزدەرى باعىتىندا ءسوز قوزعالادى.

جيىندا ۇلتتىق تەرمينولوگياداعى ماسەلەلەر جونىندە  ق ر ۇعا كوررەسپوندەنت مۇشەسى، ف.ع.د.، پروفەسسور شەرۋباي قۇرمانباي ۇلى، نازاربايەۆ ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى سارقىت ءالىسجان جانە ت.ب. تەرمينولوگ-عالىمدار بايانداما جاسايدى.

عىلىمي-تەوريالىق كونفەرەنسياعا قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق مەملەكەتتىك تەرمينولوگيالىق كوميسسيا مۇشەلەرى، ق ر مادەنيەت جانە سپورت مينيسترلىگىنىڭ جاۋاپتى قىزمەتكەرلەرى،  تەرمينولوگ-عالىمدار، دوكتورانتتار مەن ماگيسترلەر،  ورتالىق جانە جەرگىلىكتى اتقارۋشى  مەملەكەتتىك ورگانداردىڭ  قىزمەتكەرلەرى، ۇلتتىق كومپانيالاردىڭ وكىلدەرى،   سونداي-اق قوعامدىق ۇيىمدار مەن زيالى قاۋىم، ب ا ق وكىلدەرى  قاتىسادى.