«وڭتۇستىك» ايماقتىق ينۆەستيسيالىق ورتالىعىنىڭ شاقىرۋىمەن ەسكاتو بۇۇ دەپارتامەنت باسشىسى، نوبەل سىيلىعىنىڭ لاۋرەاتى راە كۆون چۋنگ وڭتۇستىك قازاقستان وبلىسىنا جۇمىس ساپارىمەن كەلدى. ساپار اياسىندا وبلىس اكىمىنىڭ ورىنباسارى ە.تاسجۇرەكوۆ جانە «وڭتۇستىك» ايو باسقارما ءتوراعاسى ق.بايتورەمەن كەزدەسۋلەر ۇيىمداستىرىلدى. كەزدەسۋ بارىسىندا ايماقتىق ينۆەستيسيالىق ورتالىق ۇسىنعان تۇركىستان قالاسىنداعى «جاسىل تەحنولوگيالار» نەگىزىندەگى جوبالاردى ىسكە اسىرۋ بارىسى تالقىلاندى. بۇل جايىندا Qamshy.kz اقپارات اگەنتتىگى وقو اكىمدىگىنىڭ باسپا ءسوز قىزمەتىنە سىلتەمە جاساپ حابارلايدى.

وڭتۇستىك قازاقستان وبلىسىنا ينۆەستيسيا تارتۋ جانە «جاسىل تەحنولوگيالار» نەگىزىندە جوبالاردى ىسكە اسىرۋ ماسەلەلەرىن تالقىلاۋ بارىسى م.اۋەزوۆ اتىنداعى وقمۋ قابىرعاسىندا راە كۆون چۋنگ مىرزانىڭ قاتىسۋىمەن وتكىزىلگەن عىلىمي-تاجىريبەلىك دوڭگەلەك ۇستەلدە جالعاسىن تاپتى. ايتا كەتۋ كەرەك، راە كۆون چۋنگ ۇزاق ۋاقىت بويى بۇۇ باس حاتشىسى پان گي مۋننىڭ كليماتتىڭ وزگەرۋ ماسەلەلەرى بويىنشا باس كەڭەسشىسى قىزمەتىن اتقارعان.

دوڭگەلەك ۇستەلدە راە كۆون چۋنگ قازاقستان رەسپۋبليكاسى پرەزيدەنتىنىڭ «جاسىل» ەكونوميكاعا كوشۋ جونىندەگى ساياسي شەشىمىنىڭ ماڭىزدى ءرولىن اتاپ ءوتتى. اۆتوماتتاندىرۋدى ەنگىزۋ بارىسىندا ر.چۋنگ كوپتەگەن جۇمىس ورىندارىنىڭ جابىلۋىن اتاپ ءوتتى. وسى كەزەڭدە «جاسىل دامۋ» جۇيەسىنە كوشۋ جاڭا جۇمىس ورىندارىن قۇرۋعا مۇمكىندىك بەرەتىنىن جەتكىزدى.

سونىمەن قاتار، شارا بارىسىندا شىمكەنت قالاسى اكىمىنىڭ ورىنباسارى ت.بايمۇحانوۆ تانىستىرعان «شىمكەنت قالاسىن كوگالداندىرۋ» تاقىرىبىنداعى جوباسى جانە «وڭتۇستىك» ايو باسقارما ءتوراعاسى ق.بايتورە تانىستىرعان تۇركىستان قالاسىندا «قاتتى قالدىقتاردى قايتا وڭدەۋ» جوبالارى ازىرلەنۋ ساتىسىندا ەكەندىگى ايتىلىپ، ىسكە اسىرۋ مەرزىمى وسى جىلعا جوسپارلانعاندىعى بەلگىلى بولدى.

ايتا كەتۋ كەرەك، جوعارىدا اتالعان جوبالاردى جۇزەگە اسىرۋ 500-دەن استام جوعارى ساپالى جۇمىس ورىندارىن قۇرۋعا مۇمكىندىك بەرەدى.

عىلىمي-پراكتيكالىق دوڭگەلەك ۇستەل ۇيىمداستىرۋشىلارى جاقىن بولاشاقتا قازاقستان رەسپۋبليكاسىنىڭ «جاسىل ەكونوميكاعا» كوشۋى جونىندەگى تۇجىرىمداما اياسىندا جوعارىدا اتالعان جوبالاردى جۇزەگە اسىرۋعا كىرىسپەك.