اتىراۋداعى الماگۇل مولتەك اۋدانىنداعى 16 قاباتتى ۇيدە ىستەن شىققان ءليفتتىڭ شاحتاسىنا ەكى بىردەي ءجاسوسپىرىم قۇلاپ، قايتىس بولدى، دەپ حابارلايدى Qamshy.kz اقپارات اگەنتتىگى mgorod.kz پورتالىنا سىلتەمە جاساپ.

- رەسمي مالىمەتتەرگە سايكەس 21 مامىردا تۇنگى 23:30-دا جۇك تاسىمالداۋعا ارنالعان ءليفتتىڭ شاحتاسىنا بايقاۋسىزدا 14 جاستاعى بالا قۇلاپ، كوز جۇمعان. وبلىستىق اۋرۋحانانىڭ جانساقتاۋ بولىمىندە تۇنگى ساعات 01:08 دە ەكىنشى ءجاسوسپىرىمنىڭ جۇرەگى توقتادى. جۇك تاسىمالىنا ارنالعان ليفت ىستەن شىعىپ، قولدانىسقا جاراماي تۇرعانىنا ءبىراز ۋاقىت بولعان. قازىرگى تاڭدا وقيعا بويىنشا تەرگەۋ جۇمىستارى جۇرگىزىلىپ جاتىر،-دەپ مالىمدەدى اتىراۋ قالاسىنىڭ ازاماتتىق قورعاۋ باسقارماسى.

كۋاگەرلەردىڭ ايتۋى بويىنشا ليفت جۇمىس ىستەمەيدى. كابيناسى جوق ليفتكە ەكى ءجاسوسپىرىمنىڭ كىرىپ كەتكەندىگى تۇسىنىكسىز بولىپ وتىر. شاحتاعا قۇلاعان بالالار قالاداعى 34 مەكتەپتىڭ وقۋشىلارى ەكەن.

- بۇل جەردەگى ليفتتە كابينا جوق. تەك شاحتاسى عانا بار. بۇرىن جوبا بويىنشا ەكى ليفت بولعان. ءبىرى جۇك ءليفتى. بارلىعى ءبىزدىڭ قاراجاتىمىزعا جاسالدى. ەكىنشى ءليفتتى الىپ تاستادى. ەسىكتەرىنىڭ بارلىعىن دانەكەرلەدى. ءبىراق شاحتاسى سول كۇيى قالىپ قويعان. 15ء-شى قاباتتاعى ءليفتتىڭ ەسىگى نەلىكتەن اشىق قالعانىن تۇسىنە الار ەمەسپىن. بالالار وسى ەسىكتەن قۇلاپ كەتكەن،-دەدى 19-شى ءۇيدىڭ تۇرعىنى نۇرگۇل ءاجىعۇلوۆا.

الماگۇل مولتەك اۋدانىنىڭ 22-23 ۇيلەرىنىڭ تۇرعىندارى ءبىر ايدان بەرى «كاسپيي ليفت» ج ش س قىزمەت كورسەتەتىن ليفتكە شاعىمدانىپ كەلگەن. ىستەن شىققان 23ء-شى ءۇيدىڭ ءليفتى قوسالقى بولشەگىنىڭ جوقتىعى كەسىرىنەن ءبىر ايدان اسا جۇمىس ىستەمەي، تۇرعىندار ابىگەرگە تۇسكەن.

ەستەرىڭىزگە سالا كەتەيىك، اقتوبە قالاسىندا دا ىستەن شىققان ليفت جۋرناليست ايەلدىڭ وقىستا كوز جۇمۋىنا سەبەپشى بولعان ەدى.