قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ  اتىنداعى «قازاقفيلم» اق  تۇسىرگەن «پاسانى زوۆۋت ەگو باتيا» دەرەكتى ءفيلمى سيەۆاستوپول قالاسىندا وتەتىن XIV حالىقارالىق دەرەكتى فيلمدەرگە ارنالعان «پوبەديلي ۆمەستە» كينوفەستيۆالىندە قازىلار القاسى تاعايىنداعان «جاڭا تۇلعانىڭ وبرازىن اشقانى ءۇشىن» جۇلدەسىنە يە بولدى، دەپ حابارلايدى Qamshy.kz اقپارات اگەنتتىگى «قازاقفيلم»ء-نىڭ باسپا ءسوز قىزمەتىنە سىلتەمە جاساپ.

كينوتۋىندى زاپاستاعى پولكوۆنيك، اۋعان سوعىسى ارداگەرى، چەرنوبل اەس اپاتى زاردابىن جويۋ جۇمىستارىنا بەلسەنە قاتىسقان، «لەگيون» اسكەري-پاتريوتتىق كلۋبىنىڭ نەگىزىن قالاۋشى ءارى جەتەكشىسى باتۋر ابدۋسالاموۆتىڭ ءومىرى مەن قىزمەتى تۋرالى باياندايدى.  رەجيسسەرى – اينۇر احمەتجانوۆا.

XIV حالىقارالىق دەرەكتى فيلمدەرگە ارنالعان «پوبەديلي ۆمەستە» كينوفەستيۆالىنىڭ باس جۇلدەسى مارتا پرۋس ەسىمدى پولشالىق رەجيسسەردىڭ «زا گرانيۋ ۆوزموجنوگو» فيلمىنە بۇيىردى. «ەڭ ۇزدىك قىسقا مەتراجدى دەرەكتى فيلم» جۇلدەسىنە رەسەيلىك پاۆەل فاتتاحۋتدينوۆتىڭ «پيسما س ۆوينى» ءفيلمى قول جەتكىزسە، «ۇزدىك دەرەكتى فيلم» جۇلدەسىن ارميان رەجيسسەرى ارمەن حاچاترياننىڭ «پوسلەدنەە جەلانيە» كارتيناسى جەڭىپ الدى.

بيىل فەستيۆالعا 30 ەلدەن 100-دەن استام دەرەكتى فيلمدەر مەن سەريالدار ۇسىنىلدى. فەستيۆال بارىسىندا نەگىزگى بايقاۋمەن قاتار،  شىعارماشىلىق كەشتەر، فيلمدەردىڭ كورسەتىلىمى جانە باسقا دا ءىس-شارالاردان قۇرالعان كونكۋرستان تىس باعدارلامالار جۇرگىزىلدى.

اتالعان فەستيۆال ەكىنشى دۇنيەجۇزى سوعىسىنا قاتىسقان قالالاردىڭ قۇرمەتىنە قىرىمدا تۇراتىن كەڭەس وداعى باتىرلارىنىڭ ۇسىنىستارى بويىنشا اشىلعان. فەستيۆالدىڭ باستى ماقساتى – ەۋرازيا كەڭىستىگىندە، سونىمەن قاتار باسقا دا ەلدەردىڭ كينوكومپانيالارى مەن تەلەارنالارى جارىققا شىعارعان وزەكتى ماسەلەلەرگە ارنالعان دەرەكتى فيلمدەردى ءبىر شاڭىراق استىنا جيناپ، ولاردى تانىستىرۋ. فەستيۆالدىڭ پرەزيدەنتى، رەسەيدىڭ حالىق ءارتيسى ۆلاديمير مەنشوۆ.