«ەۆوليۋسيانىڭ 15 جىلى: قۇبىلمالى دۇنيە جانە بىزگە وزگەرىس اكەلگەن الەم»  دەگەن تاقىرىپتا ءوتىپ جاتقان ەۋرازيا مەديا فورۋمىنىڭ العاشقى كۇنى اياقتالدى، دەپ حابارلايدى Qamshy.kz اقپارات اگەنتتىگى فورۋمنىڭ باسپا ءسوز ورتالىعىنا سىلتەمە جاساپ.

قارۋلى قاقتىعىستار، ۇرىس قيمىلدارى، تەررورعا قارسى وپەراسيالار. وسىنداي جانتۇرشىگەرلىك وقيعالار اسكەري تىلشىلەردىڭ كۇندەلىكتى جۇمىسىنىڭ ءبىر بولىگى بولىپ تابىلادى. «وتتى ايماق» تاقىرىبى بويىنشا، اسكەري جۋرناليست، دوكۋمەنتاليست، بريتاندىق ۆۆس كورپوراسياسىندا  14 جىل قىزمەت ەتكەن شاحيدا تولەگەنوۆا (ۇلىبريتانيا) ءوزىنىڭ مول تاجىريبەسىمەن ءبولىستى. «قاقتىعىس اۋماعىنان رەپورتاج» تاقىرىبى بويىنشا شەبەرلىك ءدارىسىن وتكىزگەن ول  وسى جۇمىس بارىسىندا تۇراقتى ارميا جانە قارۋلى توپتارمەن جۇمىس، اسكەري رەپورتاجدىڭ  ءوز ەرەكشەلىگى، جەكە باسقا ءقاۋىپ، پسيحولوگيالىق جاراقات جايلى ايتىپ بەردى.

«ءبىرجاقتىلىقتى ۇستانۋ ءارقاشان وڭاي. ال ءبىزدىڭ باستى ماقساتىمىز – مۇنداي جاعدايدى بولدىرماۋ. مەن جۋرناليستەرگە ۇنەمى: تەك قانا ءوز كوزىڭمەن كورگەن دۇنيەڭدى ايتۋعا ءتيىسسىڭ دەپ ايتامىن. سوعىس تاكتيكاسى مەن قارۋلى قاقتىعىس، نەگىزىنەن ءبىزدىڭ جۇمىسىمىز ەمەس. ءبىز تەك قانا ادامدار جايلى ايتۋىمىز قاجەت»، - دەپ سانايدى  شاحيدا حانىم.

ال كەلەسى سپيكەر ءوز ءسوزىن «بۇگىن يۋسۋف ومار بايانداعانداي، اقپاراتتىق تەحنولوگيانىڭ دامۋىنا بىردەن ءبىر سەبەپكەر -  سپۋتنيك»، - دەپ باستادى . جالپى، اسپان الەمى تۋرالى ءوز تاجىريبەسىمەن بولىسكەن جۋرناليست - كورولدىك استرونوميالىق قوعامنىڭ مۇشەسى، لوندونداعى عىلىم مۇراجايىنىڭ ەلشىسى تيرا شۋبارت بولاتىن.

«قازىرگى تاڭدا عارىش ايلاعىندا قوقىستار وتە كوپ. عارىشكەرلەر قولعابىنان باستاپ، ەسكى اپپاراتتاردىڭ سىنىقتارىنا دەيىن بار. كەز كەلگەن، ءتىپتى مايدا سىنىقتار سكافاندردى نەمەسە سىرتقى قاپتامانى زاقىمداۋى مۇمكىن.  مونەتانىڭ ولشەمىندەي سىنىق ەۋروپا سپۋتنيگىنىڭ كۇن پانەلىنە اسەر ەتىپ، ناتيجەسىندە ءوز وربيتاسىنان شىعىپ قالعان. ءقازىر NASA گرەيپفۋرت ولشەمىندەي سىنىقتاردى تاۋىپ، ولاردى وربيتادان شىعارۋ ءۇشىن جۇمىس جاساپ جاتىر. ءبىراق، وكىنىشكە وراي بۇل ارەكەتتەر ءارقاشان وڭ ناتيجەلى بولماۋى مۇمكىن»، - دەدى سپيكەر.

كەلەسى شەبەرلىك ءدارىسى اقپاراتتىق تەحنولوگيا دامىعان زامانداعى مەدياەتيكانىڭ ءمان-ماڭىزى حاقىندا بولدى. سەميناردىڭ نەگىزگى تاقىرىپتارى:  بۇرمالانعان اقپاراتتىڭ قوعامعا تەرىس اسەرى مەن فەيك-جاڭالىقتاردىڭ ءتۇرلى جولدارمەن تارالۋى، سونداي-اق  باق-تاعى  وتىرىك پەن ونىڭ جاڭا تەحنولوگيالار ارقىلى كوپتەپ تارالۋى.  سەمينار ادىستەمەسى مەدياەتيكا بويىنشا كەيستەردى زەرتتەۋگە نەگىزدەلگەن بولاتىن. بۇل شەبەرلىك سىنىبىنىڭ اۆتورلارى: «New Eastern Europe» جۋرنالىنىڭ باس رەداكتورى يۆونا رايحاردت جانە  عالىم-ساياساتتانۋشى، الەكساندر كۆاسنيەۆسكيي اتىنداعى «Amicus Europea Foundation» قورىنىڭ وكىلى بارتوش رىدلينسكي.

ال، «Select Communication Group» باسقارۋشى ديرەكتورى قازاقستاندىق ۆيكتور ەليسەيەۆتىڭ اۆتورلىق شەبەرلىك ءدارىسى مەديا سالاسىنداعى ماڭىزدى تەندەنسيالاردىڭ ءبىرى – ب ا ق «ديجيتاليزاسياسى» جانە اۋديتورياعا قاجەت  اقپاراتتىق ءونىمدى قۇرۋدىڭ جاڭا تاسىلدەرىن قالىپتاستىرۋ جونىندە بولدى. ول قازىرگى جۋرناليستيكانىڭ تالعامى دا، تالابى دا باسقا دەگەن تۇجىرىمعا كەلدى. سونداي-اق، «بۇعان دەيىن اعا بۋىن كولەمدى ماقالالار وقۋ ارقىلى اقپارات ايدىنىندا جۇرسە، قازىرگى جاستار ءتىپتى ەكى جولدىڭ ءوزىن وقۋى ەكىتالاي. ولار ۋاقىت ۇنەمدەۋدى جاقسى بىلەدى. سوندىقتان، اقپاراتتاندىرۋدىڭ  ەڭ تانىمال فورماتى – ۆيدەو»، - دەدى ول.

«جاڭالىقتار الەمىنىڭ كەلەشەگى» دەگەن تاقىرىپقا توقتالعان كەلەسى سپيكەر: CNN تەلەارناسى حالىقارالىق  جوبالار بويىنشا  شىعارۋشى رەداكتور رايان سميت. ول اۋديتوريا نازارىن وزىنە اۋدارىپ، قالاي سەنىمدى اقپارات كوزىنە اينالۋعا بولاتىنا تۋرالى باياندادى.

«بۇقارالىق اقپارات قۇرالدارى ايەل مەن قىز بالالارعا قاتىستى زورلىق-زومبىلىققا جول بەرەتىن الەۋمەتتىك ستەرەوتيپتەردى، نورمالار مەن ءجۇرىس-تۇرىس ۇلگىلەرىن قالىپتاستىرۋدا دا، سونداي-اق ولارعا قارسى كۇرەستە  تە ماڭىزدى ءرول اتقارادى»، - دەگەن پىكىرمەن  «بۇۇ-ايەلدەر» قۇرىلىمدارى قوعاممەن بايلانىس جونىندەگى ۇيلەستىرۋشىسى گيزەم ياربيل گۇرو شەبەرلىك ءدارىسىن قورىتىندىلادى.

جۋرناليستەرگە تەگىن شەبەرلىك دارىستەرىن وتكىزۋ فورۋمنىڭ الەۋمەتتىك سەرىكتەسى - «Samruk-Kazyna Trust» الەۋمەتتىك جوبالاردى دامىتۋ قورىنىڭ قولداۋىمەن جۇزەگە اسىپ وتىر.

فورۋم ءوز تاريحىندا 6000 اسا شەتەلدىك قاتىسۋشىلاردى، ولاردىڭ قاتارىندا تانىمال جۋرناليستەر، بەلگىلى ساياساتكەرلەر، مىقتى ەكونوميستەر، نوبەل سىيلىعىنىڭ لاۋرەاتتارى، قوعام قايراتكەرلەرى، عالىمدار مەن كاسىپكەرلەردى قازاقستانعا جينادى.

ەسكە سالا كەتەيىك، فورۋم بارىسىندا 300-دەن اسا شەتەلدىك جانە وتاندىق ب ا ق وكىلدەرى فورۋم جاڭالىقتارىن شارتاراپقا تاراتۋدا.