قاراعاندىدا اۋىزاشاردان شىققان 20 ادام استان ۇشىنىپ، اۋرۋحاناعا ءتۇستى. جاعدايى اۋىر ۇشەۋىن ءتىپتى، جانساقتاۋ بولىمىنە جاتقىزۋعا تۋرا كەلگەن. اۋىزاشار بەرگەن ءۇيدىڭ يەلەرى بولسا بازاردان الىنعان ەتتەن ۇشىندىق دەگەندى ايتادى. ءقازىر ولاردىڭ جەگەن استارى زەرتحانادا تەكسەرىلىپ جاتىر دەپ مالىمدەدى كتك تەلەارناسى.

وسىدان 3 كۇن بۇرىن اۋىزىشارعا شاقىرىلعاندار بۇگىن بۇك ءتۇسىپ اۋرۋحانا توسەگىندە جاتىر. بارلىعى دا سول وتىرىستان كەيىن وزدەرىن جايسىز سەزىنىپتى. ەرەسەكتەردىڭ اعزاسى العاشىندا سىر بەرمەسە، كىشكەنتاي بالالاردىڭ بىردەن ءىشى ءوتىپ، ىستىعى كوتەرىلگەن. 

جانساقتاۋ بولىمىندە جاتقان كىشكەنە بالالاردىڭ جاعدايى تۇراقتى تۇردە اۋىر دەپ باعالانىپ وتىر. بارىنە تيىسىنشە ەم-دوم جاسالىپ جاتىر ەكەن. سوندىقتان قاتتى الاڭداۋعا نەگىز جوق، بەتتەرىن بەرى قاراتامىز دەيدى دارىگەرلەر. 

«قاجەتتى ەم-دومنىڭ بارلىعى جاسالىپ جاتىر. جاعدايلار تۇراقتاندى. ءبىر ناۋقاستى ەرتەڭ جانساقتاۋ بولىمىنەن جالپى پالاتاعا شىعارامىز. ناۋقاستاردان قاجەتتى ساراپتامالاردىڭ بارلىعى الىنىپ، زەرتحاناعا جىبەرىلدى»، - دەيدى دارىگەر بوتاكوز جانتاقبايەۆا.

ال ساراپتاما قورىتىندىسى 3-4 كۇندە شىعۋى ءتيىس. ماماندار ءىشتى وتكىزگەن ەت بولعان كۇننىڭ وزىندە دە اۋىزاشار بەرگەندەر ول ەتتى العان جەردى كورسەتىپ، دالەلدەۋى كەرەك. ويتكەنى ەتتىڭ بازاردان ەمەس، باسقادان الىنباعانىنا دا كەپىلدىك جوق دەيدى ولار.