تاياۋدا ءبىز ءبىر دەمالىسىمىزدى پايدالانىپ، استانا ماڭىنداعى سىلەتى وزەنىنە قارماق سالدىق. جاعالاۋدا «الابۇعا، اق بالىق – قارماعىمدى قاپ، بالىق!» دەپ وتىرعاندا، سول جەردەگى ۇشقات تۇبىنەن قازىپ العان جاۋىنقۇرتىمىزدىڭ ءدامىن ساۋساقتاي مايشاباقتار عانا تاتىپ كوردى. ودان باسقا تۇك جوق. ۇشەۋىن ۇستاپ، سۋعا قايتا جىبەرە سالعاننان كەيىن بازاردان ساتىپ الا شىققان ءداۋ سازانىمىزدى قۋىرىپ جەپ، كەرى قايتۋىمىزعا تۋرا كەلدى.

سودان كەيىن ەسىل وزەنىنىڭ ماكسيموۆكا اۋىلى جاعىندا اعىپ جاتقان تۇسىنا بارىپ توقتادىق. بۇندا دا سول... شاباق اۋلاپ، سازان جەپ قايتقاننىڭ ەش قىزىعى جوق ەكەن، ءتايىرى!

استاناداعى قىمبات كولىكتەردىڭ كوبىسى سول جەردە تۇر. ورىندىققا جايعاسقان ورىستار مەن تولارساقتان ساز كەشكەن قازاقتاردىڭ ءارقايسىسىندا كەمىندە 3-4 قارماقتان بار. كۇمىسشە جالتىراعان اق شاباقتاردى بىرىنەن سوڭ ءبىرىن ءىلىپ الىپ، شەلەكتەرىنە شولپ-شولپ ەتكىزۋدە. ءوسىپ-ونسىن دەگەن اياۋشىلىقتان ادا ەكەن شەتتەرىنەن!

ال ءبىزدىڭ جاعداي بەلگىلى... تاعى دا ۇرتى قاناعان ءۇش شاباقپەن «كەلەسى جىلى كەزدەسكەنشە» دەپ قوشتاسا سالدىق. عايىپتان تايىپ الابۇعا، كوكسەركە، شورتان، تۇقى سىندى بالىقتاردىڭ ىرىلەۋ بىرەۋى كەزىگە قالسا، سول تۇرعان جەرىمىزدە كىشىگىرىم توي جاساپ جىبەرۋگە ءازىر ەدىك. بولمادى. جالاڭداعان جالماۋىز قارماقتار كوككە شانشىلىپ، كۇنگە شاعىلىسىپ، وزەننىڭ وزەگىن تىنتە تىمىسكىلەۋدەن ءبىر تىنباسا، مىنا مايشاباقتاردىڭ ءوزى قۇرىپ كەتۋى مۇمكىن سياقتى كورىندى. قاتارىمىزعا سول اۋىلدان قوسىلعان جول باستاۋشىمىز: «انەۋگۇنى وسىنداي شاباقتاردىڭ جارتى قابىن العانبىز»، – دەپ قويادى. انە، كەرەك بولسا! ءار اۋلاۋشى ءسويتىپ قاپ-قابىمەن وڭگەرىپ اكەتە بەرسە، ەلوردانىڭ سۋ قويمالارىنا بىلتىر جىبەرىلگەن 41 ميلليون شاباقتىڭ نەسى قالادى-ەي؟!.

ءيا، بىلتىر اۋىل شارۋاشىلىعى مينيسترلىگىنىڭ باستاماسىمەن ەسىل وزەنىنە قالا ىشىندەگى جاعاجايدان 41 ميلليون تۇقى بالىعىنىڭ شاباقتارى جىبەرىلگەن. ەلىمىزدىڭ «قىزىل كىتابىنا» ەنىپ كەتكەن بۇلاردىڭ ءبارى – «مايبالىق» كۇتىمباعىنىڭ «تۇلەكتەرى». سول ساتتە: «اقمولا وبلىسىنىڭ نەگىزگى سۋ كوزدەرى – نۇرا مەن ەسىل وزەندەرى جانە ۆياچەسلاۆ سۋ قويماسىنا وسى كەزگە دەيىن تۇقى شاباعىنىڭ 50 ميلليوندايى جىبەرىلدى»، – دەدى اشم اقمولا وبلىستىق ينسپەكسيا جەتەكشىسىنىڭ ورىنباسارى نىعمەت قاۋاشيەۆ. وتكەندە قاراساق، مىجىرايعان ءبىر شال قارماق قالتقىسىنىڭ دىرىلىنەن ءۇمىت كۇتىپ، تۇقىلاردىڭ تۋرا سول قاۋاشيەۆتىڭ ايالى الاقانىنان سۋسىعان تۇسىندا وتىر. ەەە دە!

سونداي-اق، استانا قالاسى اكىمدىگىنىڭ «جاس نۇر» وندىرىستىك-شارۋاشىلىق كاسىپورنى 2013 جىلى «قوياندى» سۋ قويماسىنا رەپۋس بالىعىنىڭ شاباقتارىن جىبەرىپ ەدى. سوندا سول مەكەمەنىڭ مامانى جارىلقاسىن ابدىكەرىموۆتىڭ بىزگە زاڭسىز بالىق اۋلاۋشىلىقتىڭ الدىن الاتىندارىن ايتقانى ەسىمىزدە. ءار وزەننەن ءۇش شاباقتى الىپ-سالىپ ۇيرەنە باستاعان قايران باسىمىز وتكەندە ول سۋ قويماسىنىڭ دا جاعالاۋىن شيىرلاپ ۇلگەردى. وندا دا تىيىم-سىيىمنىڭ ءبىر رەتتىك ىرىمى بايقالمادى. ءتىپتى، سۋ جاعاسىندا سوندا كەلىپ دەمالاتىن قالانىڭ سالاق تۇرعىندارىنان قالعان قوقىستار ىبىرسىپ جاتىر...

ەڭ سوراقىسى، بيىلعى ناۋرىزدا استانا ىرگەسىندەگى سارقىراما توعانىندا مايدا شاباقتار جاپپاي قىرىلا باستادى. سۋ بەتىنە قالقىپ شىققان ولارعا ءقاۋىپتىڭ قايدان كەلگەنى بەلگىسىز. سەبەبىن انىقتاۋ ءۇشىن ەكولوگتار سۋدان سىناما الىپ، زەرتحاناعا جونەلتتى. ازىرگە ونىڭ ناتيجەسى جاريالانعان جوق. ءبىر بىلەتىنىمىز، اقمولا وبلىسىنىڭ سەلينوگراد اۋدانى بويىنشا وسىنداي قاراۋسىز جاتقان 16 توعان بار. ولاردىڭ ءبارىنىڭ جاعدايىن باقىلاپ وتىرۋعا جەرگىلىكتى بيلىكتىڭ قاۋقارى دا، قاراجاتى دا جەتپەيتىن كورىنەدى. بۇل دەگەنىڭىز – بالىق شارۋاشىلىعىمەن اينالىسامىن دەۋشىلەرگە تاپتىرماس مۇمكىندىك. ءبىراق، ءقازىر وعان دا قۇلشىنىپ وتىرعان ءبىر ادام بايقالمايدى.

ايتەۋىر، كەلەشەكتەگى كەي اڭگىمەمىزدى «شاباققىرعان زاماندا» دەپ باستاپ وتىرماساق جارار ەدى...

ەركەعالي بولات ۇلى