جاڭا مەكەمەنىڭ اشىلۋىنا ءوڭىر باسشىسى التاي كولگىنوۆ، قالا اكىمى مۇرات مۇقايەۆ قاتىستى.

بۇل ەلىمىز بويىنشا ارنايى باعىتتاعى ون بەسىنشى ورتالىق ەكەن. ورتالىقتا نەگىزىنەن ەكى قىزمەت ءتۇرى كورسەتىلەدى: اۆتوكولىكتەردى تىركەۋ نەمەسە قايتا تىركەۋدەن وتكىزۋ جانە جۇرگىزۋشى كۋالىگىن تابىستاۋ. قىزمەت كورسەتۋ ورتالىعى جاڭگىر حان كوشەسى،160 مەكەن جايىندا ورنالاسقان. جاڭا نىساننىڭ اۋماعى 2500 شارشى مەتردى قۇرايدى.

قالا اكىمى مۇرات مۇقايەۆتىڭ ايتۋىنشا، شاھار بويىنشا 103 000 اۆتوكولىك تىركەلگەن.

ورتالىقتا ازاماتتاردىڭ قۇجاتتارىن قابىلداۋ ءۇشىن 15 ۇستەل بار. سونىمەن قاتار كولىك جۇرگىزۋشىلەرىنە ايىپپۇلدار مەن سالىقتاردى وزدىگىنەن تولەۋگە مۇمكىندىك بەرەتىن «Connection point» جۇيەسى جۇمىس ىستەيدى.

- ارنايى حالىققا قىزمەت كورسەتۋ ورتالىعىندا بارلىق جاعداي جاسالعان. ەندى ازاماتتارعا مەملەكەتتىك باجدى تولەۋ ءۇشىن ەكىنشى دەڭگەيلى بانكتەرگە بارۋىنا تۋرا كەلمەيدى. بۇندا قۇجاتتاردى راسىمدەۋ ەكى ساعاتتاي عانا ۋاقىت الاتىن بولادى. ماسەلەن، اۆتوكولىك تىركەۋ 90 مينۋت ىشىندە جۇزەگە اسسا، 2 ساعاتتىڭ ىشىندە كولىك جۇرگىزۋشىسى كۋالىگىن الا الاسىز. ورتالىقتا كولىك جۇرگىزۋشىسى كۋالىگىن الۋ ءۇشىن تەوريالىق ەمتيحان تاپسىراتىن سىنىپ بار. سونىمەن قاتار كۇتۋ زالى، مەديسينالىق كابينەتتەر، پراكتيكالىق ەمتيحاندى تاپسىرۋعا ارنالعان اۆتودروم دا بار، - دەيدى "ازاماتتارعا ارنالعان ۇكىمەت" مەملەكەتتىك كورپوراسياسىنىڭ ءتوراعاسى ا.وسپانوۆ.

ايتا كەتەيىك، جىل سوڭىنا دەيىن وسىنداي ورتالىق اتىراۋ قالاسىندا اشىلادى.