"قازاتومپروم" اق بۇرىنعى باسشىسى مۇحتار جاكىشيەۆكە ءۇشىنشى توپتاعى مۇگەدەكتىك بەرىلدى، - دەپ حابارلايدى Qamshy.kz اقپارات اگەنتتىگى.
قاراعاندى وبلىسىنىڭ دولينكا كەنتىندە مەديسينالىق-ەڭبەك ساراپتامالىق كوميسسياسىنىڭ كەزدەسۋى ءوتىپ، جاكىشيەۆكە مۇگەدەكتىكتىڭ ءۇشىنشى توبى بەرىلدى. ادۆوكات نۇرلان بەيسەكەيەۆتىڭ مالىمدەۋىنشە، "قازاتومپرومنىڭ" بۇرىنعى باسشىسىنىڭ قان قىسىمى ءجيى كوتەرىلىپ، دەنساۋلىعى ناشارلاعان.
"مەن قۇجاتتاردى كورگەن جوقپىن. مۇگەدەكتىكتىڭ ءۇشىنشى توبى قانداي دياگنوزدىڭ نەگىزىندە بەرىلگەنىن دە ناقتى بىلمەي وتىرمىن. كەلەسى اپتادا كولونياعا بارىپ ماسەلەنىڭ ءمان-جايىن بىلۋگە تىرىسامىن"، - دەيدى ادۆوكات.
قازىرگى ۋاقىتتا مۇحتار جاكىشيەۆ قاراعاندى وبلىسىنىڭ كليماتى قولايسىز دولينكا كەنتىندە جازاسىن وتەپ جاتىر. ادۆوكاتتىڭ ايتۋىنشا، ونىڭ جاعدايى كۇرت ناشارلاعان.
- دەنساۋلىعى ناشار. سوزىلمالى سىرقاتىنا قوسا قان قىسىمى جوعارى. جاعدايىنا قاتىستى قوسىمشا اقپاراتتارمەن بولىسە المايمىن. ءبىراق سىرقاتى شىنىمەن اۋىر،-دەدى ادۆوكات نۇرلان بەيسەكەيەۆ.
ادۆوكاتتىڭ ايتۋى بويىنشا، كولونيادا جاكىشيەۆكە تۇراقتى تۇردە مەديسينالىق قىزمەت كورسەتىلىپ جاتىر. قان قىسىمىن تومەندەتۋگە ەرەكشە نازار اۋدارىلعان. ءقازىر مۇگەدەكتىك بەرىلگەن سوڭ، ەم شارالارى بۇرىنعىدان جيىلەي تۇسكەن.
قازاقستاننىڭ ۋران نارىعىنداعى ءىرى كاسىپورىن "قازاتومپروم" اق بۇرىنعى باسشىسى مۇحتار جاكىشيەۆ 2010 جىلى 14 جىلعا سوتتالدى.
ەستەرىڭىزگە سالساق، 2017 جىلدىڭ 15 اقپانىندا قازاقستاندىق قۇقىق قورعاۋشى باقىتجان تورەعوجينا Facebook-تەگى پاراقشاسىندا پرەزيدەنت نۇرسۇلتان نازاربايەۆتىڭ اتىنا مۇحتار جاكىشيەۆكە راقىمشىلىق جاساۋ تۋرالى جازىلعان ۇندەۋ جاريالادى. ۇندەۋگە بەس مىڭ ادام قول قويىپ، 23 ناۋرىزدا حاتتاردىڭ بارىنە قازاقستاننىڭ باس پروكۋراتۋراسىنان «جوق» دەگەن جاۋاپ كەلدى.
