توكۋرو وۋچي ەسىمدى جاپون جىگىتى وتانىندا الپامىس باتىر جانە ماناس ەپوستىق داستاندارىن ءوز انا تىلىندە وقىپ، قازاق پەن قىرعىزدىڭ ءداستۇرى مەن مادەنيەتىنە قىزىققانىن ايتادى.
وسى اۋەستىگى ونىڭ قازاقستانعا كەلىپ ءبىلىم الۋىنا سەبەپ بولعان. تاكۋرو ءقازىر ءال-فارابي اتىنداعى قازۇۋ-دا جوعارعى وقۋ ورنىنا دەيىنگى ءبىلىم بەرۋ فاكۋلتەتىندە قازاق ءتىلىن مەڭگەرىپ جاتىر. بۇل تۋرالى ول وسى وقۋ ورداسىنىڭ قابىرعاسىندا وتكەن «شەتەل ستۋدەنتتەرىنىڭ قازاقستانعا كوزقاراسى» اتتى قازاقستاندىق تەلەكوپىر بارىسىندا بايانداپ بەردى.
– مەن جاپونيادا جۇرگەندە قازاق حالقىنىڭ «الپامىس باتىر، قىرعىز حالقىنىڭ «ماناس» ەپوستىق جىرلارىن جاپون تىلىندە وقىدىم. بۇل ەپوستىق جىرلار مەنى قاتتى قىزىقتىردى. جاپون تىلىندە باسقا ەپوستىق جىرلار جوق ەكەن. سوندىقتان ادەبيەتتىڭ وسى جانرىن زەرتتەگىم كەلدى. قازاقستانعا كەلىپ، ءال-فارابي اتىنداعى قازۇۋ-گە وقۋعا ءتۇسۋىمنىڭ باستى سەبەبى دە وسى"، - دەيدى تاكۋرو.
جيىندا قازاق تىلىندە تازا سويلەگەن تاكۋرو ءوزىن قازاقتىڭ تاريحى دا قاتتى قىزىقتىراتىنىن اتاپ ءوتتى.
– ءقازىر وسى وقۋ ورنىندا قازاق ءتىلىن مەڭگەرىپ جاتىرمىن. قازاق ءتىلىن ۇيرەنۋمەن قاتار، وسى ەلدىڭ مادەنيەتىمەن، تاريحىمەن، سالت-داستۇرىمەن تانىستىم. اسىرەسە، ايشا ءبيبى مەن قاراحان بابا جايىنداعى اڭىزدى وقىعاننان كەيىن ەكەۋىنىڭ اراسىنداعى ماحاببات وقيعاسى مەنى قاتتى قىزىقتىردى. قىسقى دەمالىستا تاراز قالاسىنا ارنايى بارىپ، تاريحي ەسكەرتكىشتەردى ءوز كوزىممەن كورىپ قايتتىم، - دەدى ستۋدەنت.
سونىمەن قاتار تاكۋرو قازاقستاندا ءبىر جىلدان بەرى جۇيەلى ناتيجەلەر بەرىپ جاتقان «رۋحاني جاڭعىرۋ» باعدارلاماسىمەن دە ءۇش تىلدە تانىسىپ شىعىپتى.
ءىس-شارا بارىسىندا ەلىمىزدىڭ ءار وڭىرىندەگى وقۋ ورىندارى تەلەكوپىر ارقىلى بايلانىسىپ، شەتەلدىك ستۋدەنتتەر قازاقستانداعى ءبىلىم بەرۋ سالاسى تۋرالى ويلارىن ورتاعا سالدى. «رۋحاني جاڭعىرۋ» باعدارلاماسىنىڭ ءبىر جىلدىعى اياسىندا وتكەن ءىس-شاراعا يتاليادان كەلىپ وقىپ جاتقان داريو كۋاگليا، فيليپپيندىك ەنن روۋز مەندوزا ەسىمدى ستۋدەنتتەر قاتىستى.
بۇگىندە قازاق ادەبيەتىندەگى ەپوستىق داستانداردى جاتتاپ، ءتول مۇرامىزدىڭ قادىر-قاسيەتىن باعامدايتىن جاستار نەكەن-ساياق. ءدال وسى جانردان جانىنا ازىق الىپ، ەلىمىزدىڭ ءداستۇرى مەن مادەنيەتىن باتىرلار جىرىنىڭ مازمۇنىنان تانىعان شەتەلدىك ستۋدەنتتەر كەيبىر قازاق جاستارىنا ۇلگى بولسا دەگەن تىلەك بار.
ارايلى جاقسىلىق
