مەنينگوكوكك ينفەكسياسىن جۇقتىرۋدىڭ شىڭىراۋى ارتتا قالدى جانە سەيىلىپ كەلەدى. بۇل تۋرالى ق ر دسم قوعامدىق دەنساۋلىق ساقتاۋ كوميتەتىنىڭ باسشىسى جانداربەك بەكشين مالىمدەدى، - دەپ حابارلايدى Tengrinews.kz. 

"بۇگىندە ناۋقاستانۋ سەيىلىپ كەلەدى. جالپىلاي رەسپۋبليكا بويىنشا ءبىر اپتادا عانا 13 جاعداي تىركەلگەن. ۇدەمەلى كەزەڭنەن وتتىك جانە بۇگىنگى تاڭدا الماتىدا ءتورت تاۋلىكتە ۆيرۋس جۇقتىرۋدىڭ جاڭا جاعدايلارى تىركەلمەگەنى قۋانتادى. مەنينگيتكە شالدىققان 14 ادام جازىلىپ شىقتى، بۇل وبەكتيۆ ساندار ناۋقاستانۋدىڭ سەيىلىپ كەلە جاتقاندىعىن كورسەتەدى"، - دەيدى بەكشين وكق-دا وتكەن بريفينگ بارىسىندا. 

ول ەل بويىنشا 24 ادامنىڭ ءالى دە ەمدەلىپ جاتقانىن ايتا كەتتى. ونىڭ ىشىندە 12 ادام الماتىدا. 

"ءۇش بالا ءالى دە جانساقتاۋ بولىمىندە - الماتى وبلىسى جانە استانادا. الماتىدا مەنينگيتپەن جانساقتاۋ بولىمىندە جاتقاندار جوق. بۇگىندە الماتىدا ءوز ەركىمەن 360 ادام ەكپە سالدىردى"، - دەپ اتاپ ءوتتى ول. 

سونىمەن قاتار، كوميتەت باسشىسى call-ورتالىقتاردىڭ جۇمىسى جايلى دا ايتا كەتتى. ونىڭ سوزىنشە، الدىن الۋعا قاتىستى العاشقى تاۋلىكە 4،5 مىڭ سۇراق قويىلعان، ال ەكى كۇندە - 8 مىڭ. 

قازىردە قازاقستان بويىنشا مەنينگوكوكك ينفەكسياسىنان 13 ادامنىڭ كوز جۇمعانى راستالىپ وتىر.