باس پروكۋراتۋرا الەۋمەتتىك جەلىدە «قازاقستاننىڭ دەموكراتيالىق تاڭداۋى» ەكسترەميستىك ۇيىمىنىڭ ارانداتۋ حابارلامالارى مەن بەينەروليكتەرىنىڭ تاراعانىن انىقتادى، دەپ حابارلايدى Qamshy.kz اقپارات اگەنتتىگى ق ر باس پروكۋراتۋرانىڭ باسپا ءسوز قىزمەتىنە سىلتەمە جاساپ. 

وندا اتالعان ۇيىمنىڭ باسشىسى مۇحتار ءابليازوۆ پەن ونىڭ سىبايلاستارى قازاقستان ازاماتتارىن 2018 جىلعى 23 ماۋسىمدا ميتينگكە شىعۋعا شاقىرادى.

«دۆك-نىڭ» يدەيالارى مەن ميتينگتەردى ۇگىتتەۋ ءۇشىن ءابليازوۆقا شەتەلدە قازاقستاندىق سوت تورەلىگىنەن جاسىرىنىپ جۇرگەن جانار احمەتوۆا، بوتا دجاردەمالي جانە باسقا ادامدار كومەكتەسۋدە.

ولاردىڭ ءىس جۇزىندەگى ماقساتى – قىلمىستىق قۋدالاۋدى ساياساتتاندىرىپ، قازاقستاندا اۋىر جانە اسا اۋىر قىلمىستاردى جاساعانى ءۇشىن جاۋاپكەرشىلىكتەن جالتارۋ.

جاريالانعان بەينەروليكتەردى ءتۇسىرۋ ءۇشىن ءابليازوۆتىڭ اقشاسىنا كييەۆ قالاسىندا جارنامالىق اگەنتتىك جانە ازياتتىق كەلبەتتى كاسىبي اكتەرلار مەن مودەلدەر جالعا الىنعان.

ولار قازاقستان رەسپۋبليكاسىنىڭ ازاماتتارى ەمەس.

بەينەروليكتەردىڭ مازمۇنى شىندىققا جاناسپايدى جانە قازاقستاندىق قوعامدا الەۋمەتتىك الاۋىزدىق پەن ارازدىقتى تۋدىرۋعا باعىتتالعان.

ۇستىمىزدەگى جىلدىڭ 12 ماۋسىمىندا Youtube كانالىندا «مۇعالىمدەر ءابليازوۆتىڭ ميتينگىسىنە شىعادى» دەگەن بەينەروليكتە «قازاقستاندىق جاس ءمۇعالىم» ءرولىن كييەۆ قالاسىندا تاڭدالعان اكتريسا ويناعان. 

Youtube-تىڭ باسقا بەينەماتەريالىندا قازاقستاندا جۇمىس ىستەيدى دەگەن جانە حالىقتى 23 ماۋسىمدا ميتينگكە شىعۋعا شاقىرعان جاس جىگىت - ءابليازوۆتىڭ تۋعان جيەنى ايدار امانگەلدييەۆ. ول قازاقستاننان 2009 جىلى كوشىپ كەتكەن.

قازىرگى ۋاقىتتا ول شوتلانديانىڭ قىمبات ۋنيۆەرسيتەتتەرىنىڭ ءبىرى - «گلازگوۋ كالەدونيانىڭ» ستۋدەنتى. بۇل ۋنيۆەرسيتەتتە جىل سايىنعى وقىپ تۇرۋ تولەماقىسى 20 مىڭ ستەرلينگ فۋنتتى نەمەسە 9 ملن تەڭگەنى قۇرايدى.

سوتپەن 2018 جىلعى 13 ناۋرىزدان باستاپ قازاقستان رەسپۋبليكاسىنىڭ بارلىق اۋماقتارىندا  «دۆك-نىڭ» ىس-ارەكەتىنە تىيىم سالىنعانىن ەستەرىڭىزگە سالامىز.

باس پروكۋراتۋرا «دۆك-نىڭ» كەز كەلگەن ەكسترەميستىك ارەكەتىنە  قاتىسۋ جانە ونى قارجىلاندىرۋ ءۇشىن قازاقستان رەسپۋبليكاسى قىلمىستىق كودەكسىنىڭ 258 جانە 405-باپتارىنا سايكەس قىلمىستىق جاۋاپتىلىققا تارتىلاتىنىن قايتالاپ تۇسىندىرەدى.

ميتينگكە شىعۋعا ۇگىتتەۋ - «بەيبiت جينالىستار، ميتينگiلەر، شەرۋلەر، پيكەتتەر جانە دەمونستراسيالار ۇيىمداستىرۋ مەن وتكiزۋ ءتارتiبi تۋرالى» زاڭنىڭ ەرەجەلەرىن بۇزادى.

اشىق اكسيالاردى وتكىزۋ ءۇشىن 10 كۇن بۇرىن ءتيىستى ارىز بەرە وتىرىپ، جەرگىلىكتى اتقارۋشى ورگاننىڭ رۇقساتىن الۋ قاجەت.

بۇگىنگى تاڭدا اكىمدىكتەرگە ۇستىمىزدەگى جىلدىڭ 23 ماۋسىمىندا ميتينگ وتكىزۋ تۋرالى ارىزدار تۇسپەگەن.

وسىعان بايلانىستى، ميتينگتەر زاڭسىز بولىپ تابىلادى، ولاردى ۇيىمداستىرۋ مەن وعان قاتىسقانى ءۇشىن قازاقستان رەسپۋبليكاسى اكىمشىلىك قۇقىق بۇزۋشىلىقتار تۋرالى كودەكسىنىڭ 488-بابىنا سايكەس جاۋاپتىلىق، ونىڭ ىشىندە 15 تاۋلىككە قاماۋعا الۋ كوزدەلگەن.

"پروكۋراتۋرا تۋرالى" زاڭمەن كوزدەلگەن وكىلەتتىكتەردى پايدالانىپ، بارلىق  ازاماتتاردى زاڭدىلىقتى جانە قولدانىستاعى قازاقستاندىق زاڭنامانىڭ تالاپتارىن قاتاڭ ساقتاۋعا، ارانداتۋشىلىققا جانە قۇقىق بۇزۋشىلىققا جول بەرمەۋگە شاقىرامىز"، - دەلىنگەن ۆەدومستۆا حابارلاماسىندا.