بۇگىن استانادا «Radisson» قوناق ۇيىندە قازىرگى بەسسايىستان الەم كۋبوگى فينالىنا ارنالعان باسپاسوز-كونفەرەنسياسى ءوتتى، دەپ جازادى Qamshy.kz اقپارات اگەنتتىگى.

ب ا ق وكىلدەرىمەن كەزدەسۋگە قازىرگى بەسسايىس حالىقارالىق وداعىنىڭ پرەزيدەنتى كلاۋس شورمان، قازاقستاننىڭ قازىرگى بەسسايىس فەدەراسياسى پرەزيدەنتى، قازىرگى بەسسايىس حالىقارالىق وداعىنىڭ ۆيسە-پرەزيدەنتى  بەرىك يماشيەۆ، ق ر مادەنيەت جانە سپورت ءمينيسترى ارىستانبەك مۇحامەدي ۇلى، قازىرگى بەسسايىستان ق ر ۇلتتىق قۇراماسىنىڭ باس جاتتىقتىرۋشىسى ۆاديم چۋدنوۆسكيي، سپورتشى لەسۋن الەكساندر جانە قازاقستاندىق بەسسايىسشى، الەم كۋبوگى فينالىنىڭ قولا جۇلدەگەرى، ازيا چەمپيونى  پاۆەل يلياشەنكو. 

ءوز سوزىندە، ق ر مادەنيەت جانە سپورت ءمينيسترى ارىستانبەك مۇحامەدي ۇلى اتالعان سپورتتىڭ ەلىمىزدە قارقىندى دامىپ كەلە جاتقاندىعىن اتاپ ءوتتى.

«ق ر مادەنيەت جانە سپورت مينيسترلىگى اتىنان بارلىق قاتىسۋشىلار مەن جارىستىڭ قوناقتارىنا قازاقستانعا قوش كەلدىڭىزدەر دەگىم كەلەدى.  قازاقستان العاش رەت قازىرگى بەسسايىستان الەم كۋبوگى فينالىپ قابىلداپ جاتىر. ءوز اتىمنان حالىقارالىق وداققا ۇلكەن العىسىمدى ايتقىم كەلەدى. سوڭعى ۋاقىتتا بەسسايىس ەلىمىزدە قارقىندى دامىپ كەلەدى. قازىرگى ۋاقىتتا قازاقستان رەسپۋبليكاسى سپورتشىلارىنىڭ قورجىنىندا زاماناۋي بەسسايىس بويىنشا ازيا چەمپيوناتىنىڭ التىن مەدالى، جاستار اراسىنداعى الەم چەمپيوناتىنىڭ كۇمىس مەدالى، UIPM الەم كۋبوگىنىڭ فينالىنىڭ قولا جۇلدەسى مەن ازيا چەمپيوناتىنىڭ كۇمىس مەدالى بار. مەن وسى جارىستا جاڭا ەسىمدەر پايدا بولادى دەگەن سەنىمدەمىن. بارلىق سپورتشىلارعا ساتتىلىك تىلەيمىن»،-دەدى ارىستانبەك مۇحامەدي ۇلى.

        ءوز كەزەگىندە، زاماناۋي بەسسايىستان حالىقارالىق وداق پرەزيدەنتى كلاۋس شورمان، زاماناۋي بەسسايىستان الەم كۋبوگى فينالىن وتكىزەتىن مەملەكەتتى تاڭداۋدا قانداي نەگىزدەرگە سۇيەنگەندەرىن ايتىپ بەردى. 

ۇلتتىق قۇرامانىڭ باس باپكەرى ۆاديم چۋدنوۆسكيي قازاقستاندىق سپورتشىلاردىڭ باستى باسەكەلەستەرى مەن الەم كۋبوگىنە جالپى دايىندىق تۋرالى ايتتى.

ايتا كەتەيىك، قازىرگى بەسسايىستان الەم كۋبوگىنىڭ فينالى ماۋسىمنىڭ 21-24 ارالىعىندا «سارىارقا» ۆەلوترەگى، «بارىس ارەنا» سپورت كەشەنى، «قازانات» اتشابارى بازالارىندا وتەدى. شارا استانا قالاسىنىڭ 20-جىلدىعىنا ارنالىپ وتىر. فينالعا الەمنىڭ ەڭ ۇزدىك سپورتشىلارىنىڭ تىزىمىنە ەنگەن 36 ەر جانە 36 ايەل سپورتشى كەلە جاتىر. 

        قازاقستان تاريحىندا زاماناۋي بەسسايىستان ەل ابىرويىن قورعاعان مىقتى سپورتشىلار بارشىلىق. اتاپ ايتقاندا، 1996 جىلى اتلانتادا وتكەن وليمپيادا ويىندارىندا الەكساندر پارىگين قازاقستاننىڭ قورجىنىنا التىن مەدال سالىپ بەرگەن بولاتىن.

انىقتاما ءۇشىن: وزدەرىڭىز بىلەتىندەي، بەسسايىس — بۇل بەس سپورتتىڭ جيىنتىعى: سەمسەرلەسۋ، ءجۇزۋ، كونكۋر، لازەرران  (اتۋ جانە جۇگىرۋ). الەم كۋبوگىندە قازاقستان نامىسىن ەرلەر جانە ايەلدەر ۇلتتىق قۇرامالارى قورعايتىن بولادى.