ۇلتتىق بانك باسشىسى دانيار اقىشيەۆ تەڭگە باعامىنىڭ قۇبىلۋىنا قاتىستى تۇسىنىكتەمە بەردى، دەپ حابارلايدى Qamshy.kz اقپارات اگەنتتىگى.

دانيار اقىشيەۆ ۇلتتىق بانك 2015 جىلدان بەرى تەڭگە باعامىن رەتتەمەيتىنىن ەسكە سالدى. وسىدان ءۇش جىل بۇرىن قازاقستاندا تەڭگەنىڭ ەركىن ايىرباس باعامى رەجيمى ەنگىزىلگەن ەدى. تيىسىنشە، باعام سۇرانىس پەن ۇسىنىس نەگىزىندە قالىپتاسادى. 

"قازىرگى بولىپ وتىرعان جاعدايدى بارلىق دامىپ جاتقان نارىقتاعى تۇراقسىزدىق ەلەمەنتى دەپ سانايمىز. بۇكىل الەمدە بارلىق دامىپ جاتقان ۆاليۋتالار، وكىنىشكە قاراي، دوللارعا قارسى السىرەپ جاتىر. قازاقستان دا سولاردىڭ قاتارىندا. ءبىز ەكونوميكاسى اشىق ەلمىز، الەمدىك پروسەستەرگە ىقپالداسقانبىز، سوندىقتان الەمنىڭ قارجى نارىقتارىنداعى پروسەسستەر قازاقستانعا دا اسەرىن تيگىزەدى"، — دەدى اقىشيەۆ سەنات وتىرىسىندا. 

ونىڭ ايتۋىنشا، ءقازىر ءىرى مەملەكەتتەر – رەسەي، تۇركيا، ارگەنتينا جانە باسقا ەلدەر ۆاليۋتاسىن بىرتىندەپ ديەۆالۆاسيالاۋدا. بۇل ۇدەرىس تەڭگە باعامىنا دا اسەرىن تيگىزدى. 

"دەسە دە ءبىز تەڭگەنىڭ قۇبىلمالىلىق دارەجەسى الدەقايدا تومەن ەكەنىن كورىپ تۇرمىز"، — دەدى ۇلتتىق بانك باسشىسى.

"باعامعا اسەر ەتەتىن ماكروەكونوميكالىق جانە ىرگەلى فاكتورلار، ەڭ الدىمەن، بۇل ەكپورتتىق تاۋارلاردىڭ باعاسى، بىرىنشىدەن، مۇنايعا، وتە جوعارى بولىپ وتىر. بۇل بىزدە تولەم بالانسى تۇراقتى ەكەنىن كورسەتەدى. ءقازىر تەڭگەنىڭ السىرەۋى ەكى نارسەدەن بولىپ وتىر. ءبىرىنشىسى – بارلىق دامىپ جاتقان نارىقتىڭ السىرەۋى، ەكىنشىسى – ماۋسىمدىق فاكتور"، — دەدى اقىشيەۆ. 

ول ماۋسىم ايىندا شەتەلدىك ۆاليۋتاعا سۇرانىس ۇنەمى ارتاتىنىن اتاپ ءوتتى. ويتكەنى ادامداردىڭ كوبى شەتەلگە ساياحاتتايدى، تيىسىنشە شەتەلدىك ۆاليۋتا ساتىپ الادى. 

"بۇل ولاردىڭ قۇقىعى، قالاعانىنشا ساتىپ الا بەرسىن دەگىم كەلەدى. ال قالعان ازاماتتارعا ۆاليۋتا ايىرباستاۋ بەكەتتەرىنە جۇگىرمەۋگە كەڭەس بەرەر ەدىم. سەبەبى بىلتىر جازدا دا ءدال وسىنداي جاعداي بولعان. سوندا ەستەرىڭىزدە بولسا، تەڭگە باعامى 340 تەڭگەگە دەيىن السىرەپ، كەيىن قايتا 320 تەڭگەگە دەيىن نىعايدى"، — دەدى ۇلتتىق بانك ءتوراعاسى.