الماتىداعى «بورالداي ساق قورعاندارى» ارحەولوگيالىق پاركىندە «ۇلى دالا – كوشپەندىلەر الەمى» حالىقارالىق ەتنو-مادەني فەستيۆالى ءوتىپ جاتىر، دەپ جازادى qamshy.kz ءتىلشىسى. كوشپەندىلەر وركەنيەتىن پاش ەتەتىن بيىلعى شارا استانانىڭ 20 جىلدىعىنا ارنالىپ، «رۋحاني جاڭعىرۋ» باعدارلاماسىمەن ءوتىپ جاتىر.

فەستيۆال اياسىندا القا-قوتان اق ۇيلەر تىگىلگەن. الماتى قالاسىنىڭ اكىمى باۋىرجان بايبەك، ورىنباسار اكىم ارمان قىرىقبايەۆ پەن ءبىرقاتار دەپۋتاتتار فەستيۆالدىڭ اشىلۋىنا قاتىستى.  اشىلۋدا ەڭ الدىمەن كوش شەرىندە ماجارستان، موڭعوليا، ۋكراينا، وزبەكستان، باشقۇرتستان، تىۆا، داعىستان، ساحا، التاي رەسپۋبليكاسى، قالمىق، بۋرياتيا ەلدەرىنەن كەلگەن اسكەري ونەر مەن ۇلتتىق ءداستۇرىن جەتىك بىلەتىن ونەرپازدار ءجۇرىپ ءوتتى. اتالعان ەلدەردەن 100-گە تارتا وكىل كەلگەن. ال فەستيۆالدى كورۋگە كەلگەن قوناقتار سانى 7 مىڭنان اسادى. قوناقتارعا «سازگەن سازى» ەتنو- فولكلورلىق ءانسامبلى ،«ۇلىتاۋ»، «الاش ۇلى»، «سامراد» توپتارى ۇلتتىق مۋزىكادان كۇمبىرلەگەن كۇي شاشۋ شاشىپ، انگە بولەدى.

قازاق ەلى وكىلدەرى كوش شەرۋدە الدىمەن «التىن ادام» بەينەسىندەگى جاۋىنگەر باستاعان اتتى جاساقپەن باستاپ،  جاياۋ جاساق، ساداقشىلار قوسىنى، تۇيەلى كوش،  ات قۇلاعىندا وينايتىن شاباندوزدار، بيشىلەر قامتىلعان سالتاناتتى ءجۇرىس جاسادى. كوكپار، اۋدارىسپاق، قىز قۋۋ داستۇرلەرى كورسەتىلدى. قوناقتار بۇركىت ۇستاپ، تاز ەرتكەن ساياساتشىلارعا، قازاقتىڭ ءىرى دەنەلى، باتىر تۇلعالى جىگىتتەرىنە تاڭعالىپ سۋرەتكە ءتۇسىپ جاتتى. ۇلتتىق قولونەردىڭ كورمەسى قوناقتاردى كوزايىم ەتسە، ءدامى ءتىل ۇيرەتىن ۇلتتىق تاعامدارعا تاڭداي قاقتىردى.

فەستيۆال اياسىندا اكروباتيكالىق كورىنىستەر، ساداق اتۋ، بايگە، بالۋان كۇرەس، ءتىپتى اساۋ ۇيرەتۋ داستۇرلەرى كورسەتىلدى. ەتنو شارا ەرتەڭ دە جالعاسىن تابادى. كورەرمەندەر اراسىندا «ەڭ ادەمى ۇلتتىق كيىم» بايقاۋى ۇيىمداستىرىلىپ، جەڭىمپازدارعا باعالى سىيلىقتار تابىستالاتىنىن ۇمىتپاڭىز.

ەسكە سالساق، وتكەن جىلعى 24-25 ماۋسىمدا دا الماتىدا ەتنوفەستيۆال «ۇلى دالا رۋحى» دەگەن اتپەن وتكەن ەدى. وندا 10 مەملەكەتتەن ونەرپازدار قاتىسقان بولاتىن.