قازىرگى تاڭدا سپورت سالاسىنا كوپ كوڭىل بولىنۋدە. وسى ورايدا باتىس قازاقستان وبلىستىق دەنە شىنىقتىرۋ جانە سپورت باسقارماسىنىڭ باسشىسى ءاسيا امانبايەۆامەن سۇحباتتاسقان ەدىك.
ء-اسيا راحىم قىزى، بقو-داعى وليمپيادالىق جانە بۇقارالىق سپورت تۇرلەرىنىڭ دامۋى مەن بولاشاعى تۋرالى ايتا كەتسەڭىز.
- وڭىردە سپورت سالاسىنىڭ دامۋى كوڭىل قۋانتارلىق. ايتا كەتسەك، بيىل وليمپيادالىق سپورت تۇرلەرى بويىنشا ۇلتتىق قۇرامالار ساپىنا 237 باتىسقازاقستاندىق سپورتشى ىلىكتى. ياعني جازعى وليمپيادالىق سپورتتان 205، قىسقى وليمپيادالىق سپورت تۇرىنەن 32 سپورتشى بولاشاقتا سپورتتىق دودالاردا ونەر كورسەتپەك. بىلتىر ۇلتتىق قۇرامادا 219 سپورتشى بولعان ەدى. وبلىس سپورتشىلارى سپورتتىڭ وليمپيادالىق ەمەس 26 تۇرىنەن، جازعى وليمپيادالىق سپورتتىڭ 24 تۇرىنەن، قىسقى وليمپيادالىق سپورتتىڭ 4، پاراليمپيادالىق سپورتتىڭ 20، ۇلتتىق سپورتتىڭ 8 ءتۇرى بويىنشا سارالاۋدان ءوتتى.اعىمداعى جىلدىڭ بەس ايىندا قازاقستان رەسپۋبليكاسىنىڭ چەمپيوناتتارىندا ب ا ق سىناعان 34 ەرەسەك، 12 جاس، 46 ءجاسوسپىرىم سپورتشى جۇلدەگەر اتاندى. رەسپۋبليكالىق، حالىقارالىق سپورتتىق-بۇقارالىق جانە ساۋىقتىرۋ ءىس-شارالارىنىڭ كۇنتىزبەلىك جوسپارىنا 554 سپورتتىق شارا ەنگىزىلدى. بۇگىنگى كۇنى اتالعان جوسپاردىڭ 83،1 پايىزى ورىندالدى. بۇل كورسەتكىش كۇنتىزبەلىك جوسپاردىڭ ساپالى بەكىتىلگەنىن جانە قارجىنىڭ ءتيىمدى يگەرىلۋدە ەكەنىن كورسەتەدى. قىسقى وليمپيادالىق سپورت تۇرلەرىن، سونىڭ ىشىندە شاڭعى جارىسى، سونداي-اق جەڭىل اتلەتيكا بويىنشا بىلىكتى جاتتىقتىرۋشىلاردىڭ جەتكىلىكسىزدىگىنەن اتالمىش ويىن تۇرلەرىن دامىتۋدا قيىندىقتار كەزدەسىپ وتىر. وبلىستا بالالار-جاسوسپىرىمدەر سپورت مەكتەپتەرىندە وليمپيادالىق سپورت تۇرلەرىنەن ءۇش حالىقارالىق دارەجەدەگى سپورت شەبەرى جانە 25 سپورت شەبەرى، 270 سپورت شەبەرلىگىنە كانديدات بولسا، 327 سپورتشىنىڭ رازريادى بار.
- وڭىردە سپورتتىق كەشەندەر جەتكىلىكتى مە؟ ياعني ماتەريالدىق تەحنيكالىق بازاسى تۋرالى ايتا كەتسەڭىز.
- بىلتىر «وڭىرلەردى دامىتۋدىڭ 2020 جىلعا دەيىنگى باعدارلاماسى» اياسىندا جەرگىلىكتى بيۋدجەت ەسەبىنەن اۋدانداردا 24 سپورتتىق الاڭ بوي كوتەرسە، ورال قالاسىندا «سامۇرىق قازىنا تراست» الەۋمەتتىك جوبالاردى دامىتۋ قورى جانە «Street Workout» قازاقستان قاۋىمداستىعى ەسەبىنەن 10 سپورتتىق الاڭ سالىنىپ، پايدالانۋعا بەرىلگەن. سونداي-اق بىلتىر قپو ب.ۆ. كومپانياسىنىڭ ەسەبىنەن اقساي قالاسىندا جانە جەرگىلىكتى بيۋدجەت ەسەبىنەن زەلەنوۆ اۋدانىنىڭ ورتالىعىندا 160 ورىنعا ارنالعان دەنە شىنىقتىرۋ-ساۋىقتىرۋ كەشەنى سالىنعان. قازىرگى تاڭدا قپو ب.ۆ. كومپانياسىنىڭ ەسەبىنەن ءبورلى اۋدانىنىڭ ءبورلى اۋىلىندا سپورت كەشەنىنىڭ قۇرىلىسى ءجۇرىپ جاتىر. اتالمىش كەشەن تامىز ايىندا پايدالانۋعا بەرىلمەك. وبلىسىمىز بويىنشا ورال قالاسى مەن ءبورلى اۋدانىندا عانا دەربەس دەنە شىنىقتىرۋ جانە سپورت بولىمدەرى بار. قالعان 11 اۋداندا مادەنيەت، تىلدەردى دامىتۋ، دەنە شىنىقتىرۋ جانە سپورت بولىمدەرى جۇمىس ىستەيدى. اۋىلدىق وكرۋگتەردە سپورت كلۋبتارىنىڭ نۇسقاۋشى-ادىسكەرىنىڭ جوقتىعىنا بايلانىستى بۇقارالىق سپورتتى دامىتۋ جۇمىسىمەن جاستارمەن جۇمىس جونىندەگى رەسۋرستىق ورتالىقتىڭ ماماندارى اينالىسىپ وتىر. بيىلعى وقۋ جىلىندا ايەلدەر كۇرەسى مەن توعىزقۇمالاقتان بولىمشەلەر اشىلدى. وليمپيادا رەزەرۆتەرىن دايارلاۋ ورتالىعىندا اكادەميالىق ەسۋ، بوكس، گرەك-ريم كۇرەسى، ەركىن كۇرەس، ايەلدەر كۇرەسى، ۆەلوسپورت، شورت-ترەك، ساداق اتۋ، تاەكۆوندو، ۆولەيبول، جەڭىل اتلەتيكا، اۋىر اتلەتيكا سەكىلدى سپورت تۇرلەرى دامىتىلۋدا. اتالمىش مەكتەپ-ينتەرناتىندا 247 بالا ءتالىم الىپ، 26 جاتتىقتىرۋشى قىزمەت ەتىپ ءجۇر. جاس سپورتشىلاردىڭ 44ء-ى ۇلتتىق قۇراما كومانداسىنىڭ مۇشەلەرى.
-اق جايىق وڭىرىندە جاسوسپىرىمدەرگە ارنالعان قانشا سپورت كلۋبى بار؟
-وڭىردە 23 بالالار-جاسوسپىرىمدەر سپورت مەكتەبى بولسا، ونىڭ ەكەۋى وليمپيادا رەزەرۆىنىڭ مامانداندىرىلعان مەكتەبى. سونىمەن قاتار وليمپيادا رەزەرۆتەرىن دايارلاۋ ورتالىعى، وبلىستىق جوعارى سپورتتىق شەبەرلىگى مەكتەبى، سپورتتا دارىندى بالالارعا ارنالعان مامانداندىرىلعان وبلىستىق مەكتەپ-ينتەرناتى، 11 سپورت كلۋبى، ونىڭ ىشىندە «اقجايىق» سپورت كلۋبى، «جايىق» ۆولەيبول كلۋبى، «اقجايىق» فۋتبول كلۋبى سەكىلدى كاسىپقوي كلۋبتار جۇمىس ىستەيدى. ءقازىر 12 اۋداننىڭ جەتەۋىندە بۇقارالىق سپورتتى دامىتۋ بويىنشا سپورت كلۋبتارى جۇمىس جاسايدى. ولار اقجايىق اۋدانىنداعى «جىگەر»، بورلىدەگى «اقساي»، قازتالوۆ اۋدانىنداعى «ايبىن»، قاراتوبە اۋدانىنداعى «قاراتوبە»، سىرىمداعى «قايسار»، تاسقالاداعى مادەني-ساۋىقتىرۋ كلۋبى مەن شىڭعىرلاۋداعى سپورت كلۋبى.
