وتكەن جەكسەنبىدە جول اپاتىنان قازا تاپقان ەسكەندىر سۇلەيمەنوۆتىڭ جاقىن قۇربىسى قىرشىنىنان قيىلعان جاس جىگىتتىڭ ءومىرى جايىندا sputnik.kz سايتىنا سۇحبات بەردى، دەپ حابارلايدى Qamshy.kz اقپارات اگەنتتىگى

ماليكانىڭ ايتۋىنشا، قىركۇيەك ايىندا سۇلەيمەنوۆتەر وتباسىندا ەكى قۋانىش بولۋى ءتيىس ەدى. ەسكەندىر 27 جاسقا تولعان تۋعان كۇنى مەن ۇيلەنۋ تويىن اتاپ ءوتۋدى جوسپارلاپ جۇرگەن.

ەسكەندىردىڭ وتباسىندا ءۇش بالا بار. وزىنەن ءبىر جاس ۇلكەن اپكەسى، ەسكەندىر جانە قارىنداسى. ەسكەندىر جالعىز نەمەرە بولعاندىقتان، ولجاس ومار ۇلى سۇلەيمەنوۆتەردىڭ ءىزىن جالعاستىرسىن دەپ ءوز فاميلياسىن بەرگەن. ەسكەندىر يتاليادا مەكتەپ بىتىرگەن، ەكى جوعارى ءبىلىمى بولعان. ءتورت ءتىلدى جەتىك مەڭگەرىپتى: فرانسۋز، اعىلشىن، يتاليان جانە ورىس ءتىلى. ەلوردالىق كومپانيالاردىڭ بىرىندە اكتيۆتەر دەپارتامەنتىنىڭ مامانى قىزمەتىن اتقارعان.

"ءوزىم بىلەتىن ەڭ كەرەمەت جانداردىڭ ءبىرى ەدى. بارلىق جاعىنان جاقسى ادام، ىشپەيتىن، شەكپەيتىن، سپورتقا قۇمار ەدى. مەيىرىمدى ءارى سالماقتى بولاتىن. ءۇيسىز جانۋارلاردى قامقورلىعىنا الىپ، جاردەمدەسەتىن"، – دەيدى مارقۇمنىڭ جاقىن قۇربىسى Sputnik تىلشىسىمەن سۇحبات بارىسىندا.

ەسكەندىر موتوسيكل تۋرالى باياعىدان ارمانداعان، ءبىراق رولگە وتىرعانىنا كوپ بولماپتى. موتوسيكلدى ۇزاق ايداماعاننان كەيىن جولدا ەرەكشە مۇقيات بولىپ، جىلدامدىقتى اسىرمايتىن، دەپ ەسكە الادى ماليكا.

"جۇرگىزۋشىلىك شەبەرلىگىن ارتتىرۋ ءۇشىن استاناداعى بايكەرلەر كلۋبىنا قوسىلدى. تاعدىردىڭ جازۋى شىعار، كلۋبتاعى جىگىتتەر سۋىت حاباردى ءبىرىنشى ەستىپ، تاراتتى"، — دەيدى سۇحبات بەرۋشى.

ءقازىر ەسكەندىردىڭ اناسى ەۋروپادا تۇرادى، ال اكەسى – الماتىدا، قايعىلى وقيعا كەزىندە ساپاردا جۇرگەن.

اپاتقا ۇشىرار الدىندا ءبىر كۇن بۇرىن ەسكەندىر دوستارىمەن بىرگە "استانا وپەرا" تەاترىندا وپەرا تىڭداپ قايتىپتى. جۇما كۇنى كەشكىسىن دوسىنا بارا جاتقاندا، جانتۇرشىگەرلىك جول اپاتى بولعان.

"باقىلاۋ كامەرالارىنداعى ۆيدەونى كورمەدىك، ەڭ جاقىن تۋىستارىنا، تاتەسىنە عانا كورسەتتى. حاباردى ەستىگەن بويدا، وقيعا ورنىنا جينالدىق. قانعا بويالعان دەنەسىن كوردىم، 12 مەترگە ۇشىپ كەتىپتى. دارىگەرلەردىڭ ايتۋىنشا، بىردەن كوز جۇمعان.  مويىنى ءۇزىلىپ كەتىپ، باسى جارىلعان"، – دەپ ماليكا ەسكە الادى.

پوليسيا بەرگەن مالىمەتكە سۇيەنسەك، جول اپاتىندا كىسى قازا تاپقاندا، قاتىسۋشىلاردى بىردەن الىپ كەتەدى. بۇل جولى دا سولاي بولىپتى. ەسكەندىردىڭ جاقىندارى كەلگەنشە، كولىكتىڭ رولىندە بولعان قىز وقيعا ورنىنان تابىلماعان. دوستارى كولىك پەن جۇرگىزۋشىنىڭ ءنومىرىن سۋرەتكە ءتۇسىرىپ ۇلگەرىپتى.

"وسى ۋاقىتقا دەيىن الگى قىز كەلىپ، اپاتتىڭ قالاي بولعانىن ايتىپ بەرگەن جوق. وتباسى ەشكىمدى كىنالامايدى، تەك ءوزى كەلىپ، بولعان جايتتى تۇسىندىرگەنىن قالايمىز. شۋدى كوتەرگەن ءبىزبىز، ينتەرنەتتىڭ كۇشىن پايدالاندىق. وقيعا ورنىندا تۇسىرىلگەن ۆيدەونى كورسەتەتىن شىعار دەپ ۇمىتتەنەمىز، وعان ەشتەڭە بولمايدى. اتى مەن فاميلياسىن جاريالاۋعا تىيىم سالدى، ءبىراق ول قىزدىڭ قاراپايىم ەمەس ەكەنىن ايتا الامىن. ماسەلە ەسكەندىر ولجاس سۇلەيمەنوۆتىڭ نەمەرەسى بولعانىندا ەمەس. قىرشىنىنان قيىلعان جاس جىگىت. ءبىز بار بولعانى ادىلەتتىلىكتى سۇرايمىز"، – دەپ ويىن جەتكىزدى مارقۇمنىڭ قۇربىسى.

جانتۇرشىگەرلىك جول اپاتى استانادا ماڭگىلىك ەل جانە كەرەي-جانىبەك حاندار كوشەلەرىنىڭ قيىلىسىندا جۇما كۇنى بولعان. كەشە الماتىدا ەسكەندىردى سوڭعى ساپارعا شىعارىپ سالدى. جاس جىگىتپەن قوشتاسۋعا 300-دەن استام ادام كەلگەن.