«مەن ءومىردى سۇيەمىن. ءومىر – اللا تاعالانىڭ بەرگەن ەڭ كەرەمەت سىيى. ونى باعالاۋ كەرەك، تەك العا جۇرۋگە تالپىنۋ كەرەك»، - دەيدى قاتەرلى ىسىككە شالدىققان اينۇر سۇلەيمەنوۆا.

ال ءسىز ءۇشىن ءومىر دەگەن نە؟ ومىرگە قانشالىقتى قۇشتارسىز؟ كەي ساتتەردە بارىنەن ءتۇڭىلىپ، قولىڭىزدى ءبىر سىلتەپ، الەمنەن باز كەشىپ كەتۋدى اڭسايسىز، سولاي ما؟ دەنىڭىز ساۋ، باۋىرىڭىز ءبۇتىن بولا تۇرا ومىردەن جالىعاسىز. ايتۋعا تۇرمايتىن قيىندىققا شىداي الماي، ءولىپ كەتۋگە دەيىن باراسىز. الايدا بۇل ويلارىڭىزدىڭ ءبارىن 360 گرادۋسقا بۇرىپ، ءسىزدى ومىرگە تالپىندىراتىن، ونىڭ شىن مانىسىندە عاجاپ ەكەنىن سەزدىرەتىن جاندار بار. تەك سىزدەن ايىرماشىلىعى، ولاردىڭ باسىنا تۇسكەن قيىندىق الدەقايدا اۋىر. بۇگىنگى كەيىپكەرىمىز اينۇر وسىدان جارتى جىل بۇرىن ءوزىنىڭ قاتەرلى ىسىككە شالدىققانىن بىلەدى. دارىگەرلەردىڭ قاتەلىگىنەن جاس كەلىنشەك ىسىگىن اسقىندىرىپ الدى، دەرتتىڭ ەڭ اۋىر ساناتىنا شالدىققان. «ءۇمىت ءۇزىلدى-اۋ» دەپ ويلادى تۋىستارى، «ەمدەي المايمىز» دەدى ماماندار. ءبىراق... ءبىراق... «بەرىلمە، بىرگە جەڭەمىز» دەدى كۇيەۋى، «اناشىم، سەن جانىمىزعا ورالاسىڭ» دەدى بالالارى، «مەن ءومىر سۇرەمىن» دەدى اينۇر.

«دياگنوزدى دۇرىس قويماعان»

دەنساۋلىعىم سىر بەرسە، بىردەن اۋرۋحاناعا قارالاتىن اداممىن. وسىدان جارتى جىل بۇرىن دا سولاي ىستەدىم. بىلتىر كۇزدە كەۋدە تۇسىم اۋىرىپ ءجۇردى. دارىگەرلەرگە جۇگىندىم، تەكسەرىلدىم. ولار ماعان «فيبروزدى-كيستوزدى ءسۇت بەزىنىڭ اۋرۋى» دەگەن دياگنوز قويدى. قاراشادان اقپان ايىنا دەيىن اتالعان دياگنوز بويىنشا ەمدەلىپ ءجۇردىم. الايدا جاعدايىم كۇن ساناپ ناشارلاي بەردى. ءتىپتى ءوز بەتىمشە ءجۇرىپ-تۇرۋدان قالدىم. تەحنولوگيا دامىعان زامان عوي، ينتەرنەتتىڭ دە كومەگىنە جۇگىندىم. مەنىڭ جاعدايىمدا نە ىستەۋگە بولادى، ءبارىن وقىدىم. بيوپسيا الۋ كەرەك ەكەن. ودان دا ءوتتىم، كەۋدەمنىڭ اينالاسىنا ءتۇرلى جارالار شىعىپ، ىرىڭدەۋ باستادى. دارىگەرلەر ءىرىڭدى سورىپ الماق بولىپ، ءسۇت بەزىن تەسكەن ساتتەن باستاپ، جاعدايىم كۇردەلەنە ءتۇستى. تەرىم دە ابدەن زاقىمدانعان.

بىردە ۇيقىمنان تۇرسام، كوكىرەگىمنىڭ ءبىر جەرگە قاراي قيسايىپ قالعانىن بايقادىم. ينتەرنەتتەن مۇنىڭ دا سەبەبىن بىلۋگە تىرىستىم. ونكولوگيانىڭ العاشقى بەلگىسى ەكەن. كۇيەۋىم ەكەۋمىز مەنى ەمدەپ جۇرگەن دارىگەرلەردەن كۇدىكتەنە باستادىق. بىلىكتى مامان ىزدەۋ ءۇشىن قازاقستاندى ارالادىق.

«مەندەگى ىسىك اسقىنعان»

تۇبىندە الماتىدا مۇرات يسا ۇلى دەگەن دارىگەرگە جولىعىپ، ول كىسى ماعان تاعى دا بيوپسيا الۋىم كەرەك ەكەنىن ەسكەرتتى. اقىلى تۇردە بيوپسياعا تاپسىرىپ، 10 كۇننەن كەيىن ءۇشىنشى دارەجەلى ءسۇت بەزى قاتەرلى ىسىگىنە شالدىققانىمدى ءبىلدىم. ءارى مەندەگى ىسىك اسقىنعان ەكەن. دارىگەرلەر وتا جاساۋعا رۇقسات بەرمەدى. ىسىك قانعا ءتۇسىپ كەتەدى ەكەن. ونداي جاعدايدا بارلىق اعزام زاقىمدانادى. تەك حيميوتەراپيادان ءوتتىم. الايدا بەلگىلەنگەن سەگىز حيميوتەراپيانىڭ بەسەۋىن عانا ءوتتىم. قالعانىنا شامام جەتپەگەندىكتەن، ۇزۋگە تۋرا كەلدى. جۇرەگىمە اقاۋ ءتۇستى، اعزالارىم اۋىرا باستادى.

ساۋىردە كورەيادان ماماندار كەلىپ، ماعان ءۇمىت سىيلاپ كەتتى. ىسىكتى الىپ تاستايتىندارىن، ەلدە ونداي مەديسينا دامىعانىن ايتىپ قۋانتتى. ال قازاقستاندا دارىگەرلەر «قاتەرلى ىسىكتى الىپ تاستاعاننىڭ وزىندە ورنىنا جاباتىن تەرى جوق، تەرى بۇزىلعان» دەپ وتا جاساۋدان ات توندارىن الا قاشاتىن.

ءسويتىپ ءجۇرىپ كولىگىمىزدى، كەي دۇنيەلەرىمىزدى ساتىپ قاراجات جينادىق. ءوزىمىز تۇرعىزعان ءۇيىمىزدى ساتىلىمعا قويدىق. رامازان ايىندا قاراجات جيناۋدا قول ۇشىن سوزعانداردىڭ قاتارى كوپ بولدى. قازاقستاندى ارالاپ ءجۇرىپ، ءبىر دارىگەردى تاۋىپ الدىم. ول دا دەرتىمنىڭ اسقىنعانىن ايتتى، ءۇمىت سىيلاپ، ۋادە بەرگىسى كەلمەدى. الايدا قولىنان كەلگەنىن ايانبايتىنىن دا جاسىرمادى. 10 شىلدەدە ماعان العاشقى وپەراسيا جاسالدى. سەيسەنبى كۇنى. ازىرگە اسەرى، ناتيجەسى بەلگىسىز. 10 كۇننەن كەيىن ءبارىن انىقتايتىن بولامىز. تەك دارىگەرىم ەسىمىن جاسىرىن ۇستاۋدى ءوتىندى. ال ماعان ءبىر جاعداي بولىپ قالسا، دارىگەرگە كىنا ارتپايتىنىمىزدى ايتتىق. سەبەبى مەندەگى دەرتتىڭ اۋىرتپالىعىن مەنەن ارتىق ەشكىم بىلمەيدى.

ەندى مەديسينالىق وڭالتۋ پروسەسىنە بارماقشىمىن. قاراجاتىمىز جەتپەسە دە، كۇيەۋىمنىڭ قولداۋىمەن ءومىردىڭ بۇل باسپالداعىنان دا وتەمىز.

بالالارىنىڭ كوڭىلىنە قاياۋ تۇسىرمەس ءۇشىن جاساندى شاشپەن جۇرەدى

«جۇبايىم – قامقورشىم، بالالارىم – قولداۋشىم»

ءومىر سۇرگىم كەلەدى. تالپىنامىن. تىرىسامىن مىقتى بولۋعا، اتا-اناما، بالالارىما قينالىپ جۇرگەنىمدى كورسەتپەۋگە، جانىمنىڭ قاجىعانىن بىلدىرمەۋگە.

كۇيەۋىم ەكەۋمىز 5-سىنىپتان بەرى بىرگە وقيمىز. ءبىر پارتادا وتىرىپ، قول ۇستاسىپ مەكتەپتى بىتىردىك. شاڭىراق كوتەرىپ، بالالى-شاعالى بولدىق. ومىردە تەك باقىت قانا بولادى ەكەن-اۋ دەپ جۇرگەندە، اللا تاعالا باسىمىزعا وسىنداي ءبىر اۋىر سىناق بەرىپ قويدى. ءومىردىڭ اعىمەن قوسا، قاراسىن دا قابىلداۋدى ۇيرەتتى. وسى ساتتەردە جارىم، شاڭىراعىمىزدىڭ وتاعاسى ءاردايىم مەنىڭ جانىمدا بولدى. مەن قينالعاندا، مىقتى بولۋىما سول جان سەپتىگىن تيگىزدى. «ءبارىن بىرگە جەڭەمىز، دەرتىڭنەن قۇلان تازا ايىعاسىڭ، ءالى تالاي باقىتتى كۇندەردى باستان وتكەرەمىز، تەك سەن بەرىلمە» دەگەن سوزدەرى ماعان قانات ءبىتىردى. قالايشا جەڭىلە سالامىن؟!

جارى داستانمەن

ءقازىر اۋرۋحانادا جاتىرمىن. كىشى قىزىم ايشا كۇندە تاڭەرتەڭ حابارلاسىپ «اناشىم، قايىرلى تاڭ!» دەپ ايتادى. اللادان مەنىڭ تەزىرەك ساۋىعىپ كەتۋىمدى تىلەيدى، دۇعا ەتەدى. بالالارىم دا قينالىپ جۇرگەندەرىن ماعان كورسەتپەۋگە تىرىسادى، مەنىڭ مىقتى بولۋىما ولار دا سەپتەسىپ ءجۇر. ولاردىڭ وسىنداي اقىلدى، سانالى بولىپ ءوسىپ كەلە جاتقاندارىنا شۇكىر دەيمىن. ولار مەنى كۇتىپ ءجۇر. قالايشا جەڭىلە سالامىن؟!

اينۇردىڭ بالالارى: دانيەل 13-تە، ءيمانالى 6-دا، ايشا 4-تە

تۋىستارىم، تانىستارىم مەندەگى دەرتتىڭ ءۇشىنشى دارەجەلى ەكەنىن بىلگەن سوڭ جاندارى اشىعان ءتۇر كورسەتىپ، مەنەن باس تارتادى. سول ساتتە-اق ولدىگە سانايدى. ال مەن ساۋىعاتىنىما، وتباسىما ورالاتىنىما سەنەمىن. قالايشا جەڭىلە سالامىن؟!

مەنىڭ تىلەۋىمدى تىلەپ وتىرعان اتا-انام بار. اكەم ءۇش قىزىن قاناتتىعا قاقتىرماي، تۇمسىقتىعا شوقتىرماي، بويىمىزعا ناعىز قازاق قىزىنا ءتان قاسيەتتەردى دارىتىپ ءوسىردى. ولاردىڭ كوڭىلدەرىنە قالايشا قاياۋ تۇسىرمەكپىن؟! كەرىسىنشە، بىزگە، ماعان ارتقان ۇمىتتەرىن اقتاپ، قۋانتىپ جۇرۋدەن اسقان قانداي باقىت بار؟ ايتىڭىزشى، قالايشا جەڭىلە سالامىن؟!

«ومىرگە عاشىق بولىڭىز»

باسىنا قيىندىق تۇسكەن جاندارعا ايتار كەڭەسىم: ءومىر قامشىنىڭ سابىنداي قىسقا. باعالاي ءبىلۋ كەرەك. ەشكىمنىڭ باسىنا اقشا بۇلت، تابانىنىڭ استىنا ءتۇبىت توسەپ قويمايدى. السىزدىك تانىتپاڭىز. الەم ادەمى. ادامنىن جان دۇنيەسى، ويى بارلىق دارىدەن مىقتى.

اسپانعا ءبىر كوز سالىڭىزشى... قانداي تاماشا! كەۋدەڭىزدى دەمگە تولتىرىپ، جاراتقانعا شۇكىرشىلىك ەتىڭىز! ءومىر دەگەن كەرەمەتتىڭ ءاربىر ساتىنەن رۋحاني ازىق الىڭىز! ءسىز مىقتىسىز!

قاراڭىزشى، دەرتى اسقىنىپ، ال-دارمەنى تاۋسىلسا دا، اينۇردىڭ رۋحى كۇننەن-كۇنگە كۇشەيىپ كەلەدى. ومىرگە دەگەن قۇشتارلىق ونىڭ ۇمىتىنە ءۇمىت سىيلاپ، مىقتى بولۋىنا سەپتىگىن تيگىزدى. ءتىپتى ونى «ناۋقاس» دەۋگە دە اۋزىڭ بارمايدى ەكەن، جوق اينۇر ناۋقاس ەمەس، ول – مەن بىلەتىن ەڭ جىگەرلى انا، ەڭ باتىل ارۋ. مۇنى ءوزىنىڭ Instagram پاراقشاسىنداعى ءار جازباسى دالەلدەي تۇسەدى. وقىڭىز، ۇلگى الىڭىز، ءسىز دە دۇعادا بولىڭىز. ءومىردى سۇيەتىن جانعا ءومىر سىيلاۋعا اتسالىسىڭىز.

قارجىلاي كومەك ءۇشىن:

كاSPI GOLD كارتاسى: 5169 4931 0085 6007

سۇلەيمەنوۆا اينۇر قابىلقا قىزى ج ش س: 820701401432

سبەربانك كارتاسى: 4424 7710 1226 4095

جارى مىرزاحمەتوۆ داستان ج ش س: 820721300992

سەنتر كرەديت كارتاسى 4667209620942154

حالىق بانك كارتاسى: 4402573556822098