– قىزىم، جاسىڭ نەشەدە؟

–23-تە...

–تۇرمىس قۇرعانسىڭ با؟

–جوق.

–تۇرمىس قۇرعىڭ كەلە مە؟

–دايىن تۇرعان جىگىتىڭىز بار ما ەدى؟

–بار بولعاندا قاندا-ا-اي! پەندە ەمەس، پەرىشتە...

تانىس ديالوگ پا سىزگە؟ وردالى وتىزدان اسقان ۇلىن ۇيلەندىرە الماي جۇرگەن تانا شەشەي. تاقياسىن باسىنان تاستامايتىن گەوگرافيا ءپانىنىڭ ءمۇعالىمى، مىنەزى ۇياڭ تايلاق. ەسىڭىزگە ءتۇستى مە؟ ءيا-يا... بالا كۇنىمىزدە ءسۇيىپ تاماشالاعان «تاقيالى پەرىشتە» كينوفيلمىنەن ديالوگ قوي. ءبىر قىزىعى، ءار باسقان قادامىندا قىزدارعا ءوزى بارىپ ءبىرىنشى قادام جاساپ، ۇلىن ۇيلەندىرمەك بولىپ جانتالاساتىن انالار بۇگىن دە بار.

سالتانات اپاي جارى تالعات مىرزامەن

سالتانات اپايدىڭ جاسى ەلۋدەن اسىپ بارادى. وتىزعا تاياپ قالعان ۇلى شاڭىراق كوتەرمەي ءبىراز ءجۇردى. تىم جۇمىسباستى بولدى ما الدە ۇيالشاق پا ەدى، ول جاعى ءتىپتى اتا-اناسىنا بەيمالىم. جوق، نەمەرە ءسۇيۋ كەرەك، قولىن جىلى سۋعا ماتىرىپ، شايىن دەمدەپ، كوڭىلىن اۋلاپ جۇرەتىن كەلىن كەرەك. بۇلاي بولمايدى دەدى دە سالتانات اپاي ىسكە ءوزى-اق كىرىسىپ كەتتى. جولىندا كەزدەسكەن جاس قىزدارعا ءبىرىنشى بولىپ سالەم بەرىپ، تانىسىپ، ءمان-جايىن سۇراساتىن. بىرىمەن دۇكەندە تانىستى، ەندى بىرىمەن اۋرۋحانادا، باسقاسىمەن اۆتوبۋستا نە تاكسيدە.

1ء-بولىم. تاكسيدەگى تانىستىق

سالتانات اپايدىڭ وتباسى جامبىل اۋدانى قارعالى اۋىلىندا تۇرادى. بالالارى ەلدار مەن ەلدانانىڭ سول اۋىلدا كىندىك قانى تامىپ، توپىراعىنا اۋناپ وسكەن. سالتانات اپاي ءار دەمالىسىندا رايىمبەك تاس جولى بويىنداعى «التىن وردا» بازارىنان ۇيگە قاجەتتى ازىق-تۇلىك وتىراتىن. «بولاشاق كەلىنىن ءدال سول بازار ماڭىنان كەزدەستىرىپ قالامىن با؟» دەپ ويلادى ما ەكەن؟!

«بىردە التىن وردادان شىعىپ بارا جاتىپ، تاكسيگە وتىردىم. ىشىندە ءجۇزى جىلى، ءوزى سۇلۋ ءبىر قىز وتىر ەكەن. ادەپكى ادەتىمە باسىپ، قىزدىڭ اتىن سۇرادىم. سوسىن جاسىن، كەيىن تۇرمىس قۇرعان-قۇرماعانىن دا بىلۋگە تىرىستىم. ەسىمى – ايىم ەكەن. 1993 جىلعى ءارى تۇرمىس قۇرماعان. سونداي بيازى، يناباتتى بولىپ كورىندى. ءبىزدىڭ قارعالى اۋىلىنا العاش رەت قوناق بولىپ بارا جاتىر ەكەن. ءجۇزى جاقسىدان تۇڭىلمە دەگەن ويمەن «قىزىم، ارالاسىپ جۇرگەن دوسىڭ بار ما؟» دەپ سۇراق قويدىم. ايىم ۇيالىپ قالدى. مەن اڭگىمەمدى جالعاستىردىم. «مەنىڭ ەلدار دەگەن بالام بار. ءقازىر جۇمىس ىستەيدى. ءبىراق جۇمىسباستىلىعىنىڭ كەسىرىنەن بە، ءالى ءبىر قىز كەزدەستىرە الماي ءجۇر. ءوزىڭ سونداي جاقسى قىز كورىنەسىڭ. اقىرى جىگىتىڭ جوق ەكەن، مەنىڭ ۇلىممەن تانىسۋعا قالاي قارايسىڭ» دەدىم دە ءنومىرىن سۇرادىم. كەلىنىم ۇزاق ويلاندى دا، ءنومىرىن بەرۋگە كەلىستى. مەن ونى بالاما بەردىم. ءارى قارايعىسىن وزىنە تاپسىردىم»، - دەدى سالتانات مولداعۇلوۆا.

سالتانات اپاي تۇڭعىشى ەلدارمەن

2ء-بولىم. قولدان جاسالعان تورت

ەلداردىڭ جاسى 29-دان اسىپ بارادى. دوستارى مەن قاتارلاستارىنىڭ ءبارى دەرلىك وتباسىلى، بالا-شاعاسىمەن ۋلاپ-شۋلاپ جۇرگەن باقىتتى جاندار. مۇنداي باقىتقا ەلدار دا بولەنگىسى كەلدى. اتتەڭ، جۇرەگى قالاعان ارۋدى كەزدەستىرە الماي ءبىراز ءجۇردى. اناسى بىرنەشە قىزبەن تانىستىرىپ كوردى، جوق، تۇك شىقپادى. وسى جولى دا سولاي ويلادى. ءبىراق نە دە بولسا، كورەيىن دەدى.

اناسىنان ايىمنىڭ ءنومىرىن العان ەلدار ۇزاققا سوزباي قىزعا حابارلاسادى. ءۇي ىشىنەن جاسىرىن ەكى جاس كەزدەسە باستايدى. ال ەلداردىڭ كوڭىلىن باۋراعان ايىمنىڭ قولىنان جاسالعان تورت بولدى. جاي تورت ەمەس، ەرەكشە ەدى. سەبەبى ول ءتاتتى ەلداردىڭ اتا-اناسىنا ارنالعان.

ايىم مەن ەلدار

«بيىل اتا-انامنىڭ وتاسقانىنا 30 جىل تولعان ەدى. ول كىسىلەرگە ەرەكشە توسىن سىي جاساعىم كەلدى، البەتتە ايىمنان كەڭەس سۇرادىم. ول ەرتەڭىندە جۇمىس جاعىنا كەلىپ كەتۋدى سۇرادى. بارىپ ەدىم، ءوز قولىمەن تورت جاساپ قويىپتى. ءارى تورتتىڭ بەتىنە اكەم مەن انامنىڭ فوتو سۋرەتىن سالعىزعان ەكەن. ەرەكشە قۋانىپ كەتتىم. سىيلىعىم اتا-اناما دا قاتتى ۇنادى. مەن ىزدەگەن ارۋ وسى بولار دەدىم. سەبەبى مەنىڭ نە قالايتىنىمدى ماعان ايتقىزباي-اق ءبىلدى. ءارى قاراي كەزدەسۋدى جالعاستىرا بەردىم. 30 جەلتوقسان ايىمدى ءۇي ىشىممەن تانىستىردىم. 31 جەلتوقسان ۇيلەنۋگە ۇسىنىس جاساپ، ساۋساعىنا ساقينا تاقتىم. سودان بەرى بىرگەمىز»، - دەدى ەلدار.

3ء-بولىم. كوپتەن كۇتكەن قۋانىش

21 ساۋىردە مولداعۇلوۆتار اۋلەتىندە كوپتەن كۇتكەن توي بولدى. ۇزىناعاش اۋىلىنداعى سالتاناتتى سارايدا دۇركىرەپ وتكەن تويعا 300-گە جۋىق ادام جينالدى. ەلداردان بۇرىن سالتانات اپاي مەن جارى تالعات مىرزانىڭ باقىتتان جۇزدەرى بال-بۇل جايناپ ءجۇردى.  

ۇزىناعاش اۋىلى، "باتىر" مەيرامحاناسى، 21.04.2018

بۇگىندە وتباسى قارعالى اۋىلىندا تۇرادى. انا جۇرەگى الداماعان ەكەن. ايىم مەن ەلدار ءبىرىن-بىرى تولىقتىرىپ تۇرعان باقىتتى جاندار، ءتىپتى ءبىر-بىرى ءۇشىن جارالعان با دەرسىڭ. جاس وتباسى ەلداردىڭ اتا-اناسىمەن بىرگە تۇرادى. «كەلىنىم اس ۇيگە كىرگىزبەيتىن بولدى. قولىمدى جىلى سۋعا مالىپ قويىپ، راحاتتانىپ، تەلەديدار كورىپ جاتاتىن كۇنگە دە جەتتىم» دەپ قۋاندى سالتانات اپاي. بالانىڭ قامىن ويلاعان وسىنداي انالار امان بولسىن. Qamshy.kz اقپارات اگەنتتىگىنىڭ ۇجىمى ەكى جاسقا باقىت تىلەيدى.

تويدان ەستەلىك سۋرەت