كۇنى كەشە Qamshy.kz اقپارات اگەنتتىگى ەمشىدەن زورلىق كورگەن ايەلدىڭ حاتىن جاريالاعان ەدى. اتىراۋ وبلىسى قىزىلقوعا اۋدانىنىڭ تۇرعىنى ەلميرا ەسىمدى كەلىنشەك حاتىندا دەرتىنە داۋا تابامىن دەپ باسىنىڭ بالەگە قالعانىن، كورگەن قورلىعىن بۇكپەسىز بايانداپ بەرگەن. ايەلدىڭ حاتىن «ەمشىگە بارسام، جازىلىپ كەتەمىن» دەگەن ويداعى ازاماتتاردىڭ نازارىنا ۇسىنعان ەدىك. ءتۇرلى ەمشىلەرگە الدانىپ قالعان ايەلدەردىڭ سانىندا شەك جوق كورىنەدى. ءبىرى زورلىق كورسە، ەندى ءبىرى ميلليونداعان قاراجاتىنان ايىرىلىپ وتىر. شىمكەنتتە بالا كوتەرە الماي جۇرگەن ءبىر توپ كەلىنشەك كەشە «الاياق ەمشىگە الداندىق» دەپ شۋ شىعاردى. بۇل تۋرالى كتك ارناسى حابارلادى.

سايرام اۋىلىندا تۇراتىن ەمشىگە ايەلدەر كەلىپ، 250 مىڭنان باستاپ ميلليون تەڭگەنىڭ اراسىندا اقشا بەرگەن. ال، ءتاۋىپ ءوز كەزەگىندە ولارعا بالا كوتەرەسىڭ دەپ كەپىلدىك بەرىپتى. ءبىراق، بالا تۋماق تۇگىلى كەلىنشەكتەر جارىمجان بولىپ جاتىر ەكەن. ال، ەمشى بولسا كەرىسىنشە ءوزىن الاياق ايەلدەردىڭ قۇربانىمىن دەپ وتىر.

ارىسى اقتاۋ مەن اتىراۋدان، ءبىرى سەمەي وڭىرىنەن كەلگەن بۇل كەلىنشەكتەر ءجۇزىن كورسەتكىلەرى كەلمەيدى. بارلىعى دا ءبىر پەرزەنتكە زار بولىپ، كورىنبەگەن دارىگەرى مەن ەمشىسى قالماعاندار. شىمكەنتتىك ۇنسىناي ماسكەيەۆانىڭ بەدەۋ ايەلدى دەمدە ەمدەيدى ەكەن دەگەندى ەستىپ، الىپ-ۇشىپ كەلگەن ولاردى ەمشى ەش كىدىرمەستەن قابىلداپتى. بارلىعىنا ءبىر دياگنوز قويىپ، ءبىر عانا ەمدىك شارا جۇرگىزىپتى. بىرنەشە كۇننەن كەيىن كوتەردىڭ دەپ قوماقتى سىيلىق اكەلۋدى بۇيىرادى.

"30-شى مامىردا كۇنى كوتەردىڭ دەپ شىقتى. تەست قىزارىپ شىقتى. ۋزي-عا بارساق ەشقانداي بالا جوق. مەن 700 مىڭ تەڭگە تولەدىم 35 كۇنگە. 700 مىڭعا كىرەتىنى تامپون مەن ءبىر مايى بار ۋقالايتىن. ءبىراق مەنىڭ جاتىرىم كىشىرەيىپ قالدى. وسىنى ايتىپ بارعانىمدا مەن قورقىتتى كادىمگىدەي"، - دەيدى جابىرلەنۋشى.

وزدەرى ۇنسىناي اپا دەپ اتاعان ەمشى شىتىرلاتىپ اقشا العانىمەن قويماي، تەز كوتەرۋ ءۇشىن جاتقان جەرىن تازالاۋدى بۇيىرادى دەيدى كەلىنشەكتەر. ياعني، مەديسينالىق ورتالىقتىڭ ەدەنىن جۋىپ، شاڭىن سۇرتسەڭ بالا كوتەرۋگە مۇمكىندىك كوبەيەتىن كورىنەدى. الداندىق دەگەندەردىڭ ارىزىن تىڭداعان قۇقىققورعاۋشى ايگۇل ورىنبەك، ءقازىردىڭ وزىندە وپىق جەگەندەر سانى 40-تان اسقانىن ايتادى.

"قازاقستاننىڭ ءار تۇكپىرىنەن وتە كوپ. اتىراۋ جاقتان ءوزىنىڭ ماتكاسىنان ايرىلىپ جاتقان قىزدار بار، الماتى جاقتان 2 ترۋبكاسىنان ايرىلىپ جاتقان قىزدار بار. ياعني بۇل كىسى ۋزي-عا تۇسپەيسىڭ دەپ قىزداردىڭ سەنىمىنە كىرىپ، پسيحولوگيالىق تۇرعىدان قىسىم كورسەتىپ دەنساۋلىعىنا زاقىم كەلتىرىپ وتىر عوي. ياعني، ءقازىر رەانيماسيادا جاتقان قىزدار بار"، - دەيدى قۇقىق قورعاۋشىايگۇل ورىنبەك.

ەمشىنىڭ ەمىنەن سوڭ ەڭىرەگەندەرمەن بىرگە مەديسينالىق ورتالىققا بارعانبىز. تەك، الدىمىزدان شىققان كومەكشىلەرى اۋەلى ەمشى ايەلدى جوق دەپ، كەلگەندەردى بەتتەن السا، ارتىنشا تىلشىلەردى عانا ىشكە كىرگىزدى. 55 جاستاعى ايەل ءار پاسيەنتتەن كۇندىگىنە 4 مىڭنان ارتىق العان ەمەسپىن دەپ اقتالادى. جۇرتقا جاقسىلىق جاسايمىن دەپ ءوزىم قوقان-لوققى ەستىپ جاتىرمىن دەيدى.

"اقشامدى قايتار دەپ كۇن سايىن تەلەفون ارقىلى قورقىتىپ جاتىر. 2 ميلليون، 3 ميلليون بەرگەنبىز دەپ وتىرىك سوعىپ جاتىر. ءولتىرىپ كەتەمىز دەپ جاتقاندارى دا بار"، - دەيدى ەمشى ۇنسىناي ماسكەيەۆا.

ءجابىر كوردىم دەگەن ەمشى ءقازىر 4 ادامعا قاتىستى تەرگەۋ ورگاندارىنا ارىز ءتۇسىرىپتى. ءوز كەزەگىندە ۇنسىناي ماسكەيەۆاعا الداندىق دەگەن ايەلدەر دە جاپپاي پوليسياعا شاعىم جازىپ جاتىر. ەمشىدەن كوڭىلى قالعان كەلىنشەكتەر بۇل ىسكە ەلوردالىق شەنەۋنىكتەر نازار اۋدارسا دەيدى. سەبەبى، قۇرىعى دا ۇزىن قالتاسى دا قالىڭ ەمشى كۇنگەيدە جازاسىز قالۋى مۇمكىن دەپ قورقادى.