استانادا پوليسەيلەر قىزمەتتىك كولىگىمەن ەكى ءجاسوسپىرىمدى قاعىپ كەتتى. ابىروي بولعاندا ەكى بالا ءدىن امان. ءبىراق، ءتارتىپ ساقشىلارى بالالار جولعا بىردەن شىعا كەلدى دەپ اقتالماق بولعان كورىنەدى. الايدا، كۋاگەرلەر جاعدايدىڭ مۇلدە باسقاشا بولعانىن ايتادى. بۇل وقيعا ونىسىز دا ىشكى ىستەر ورگاندارىنا وكپەسى قارا قازانداي حالىقتىڭ جاراسىن اشىپ جىبەرگەندەي كورىندى. ونىڭ ۇستىنە بۇلدىرشىندەردى قاعىپ كەتكەن پوليسەيلەر ەشقانداي جاۋاپكەرشىلىككە تارتىلماپتى. جايباراقات جۇمىستارىندا ءجۇر. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسى سىلتەمە جاساپ حابارلايدى.
وقيعا مىنا "استانالىق بازار" ماڭىندا بولعان. باعدارشامنىڭ جاسىل ءتۇسى جانعاندا، ۆەلوسيپەدىنە ءىنىسىن وتىرعىزعان بالا جولدان كەسىپ وتپەك بولىپتى. الايدا مىنا باعىتتان جۇيىتكىپ كەلگەن جول پاترۋلدىك پوليسياسىنىڭ كولىگى بالالاردى كورمەدى مە، الدە باعدارشامنىڭ جاسىل ءتۇسىن ەلەمەدى مە، ءبۇلدىرشىندى قاعىپ كەتەدى.
ول جەرگە دەرەۋ كوشەدەن ءوتىپ بارا جاتقان جۇرت جينالىپ، بالالارعا كومەك كورسەتىپتى. ال پوليسەيلەر وزدەرى قاعىپ كەتكەن 12 جاستاعى ءجاسوسپىرىم مەن ونىڭ 9 جاستاعى ءىنىسىن مەديسينالىق ورتالىققا الىپ بارماق بولىپتى. كۋاگەرلەردىڭ سوزىنشە، بالالار ودان باس تارتقان سوڭ ءتارتىپ ساقشىلار ءوز جوندەرىنە كەتىپ قالعان.
«كوز الدىمدا ەكى ادامدى قاعىپ كەتتى. بالا عوي ەش كۇناسى جوق. وقيعا ورنىنا ادامدار جينالىپ جاتىر. ەكەۋىن بىردەي قاعىپ كەتىپ جاتىر. ەششە وعان ەشكىم جاۋاپ بەرمەيدى. نە دەگەن جاۋاپسىزدىق؟ سونى ايتقىم كەلەدى» - دەيدى قالا تۇرعىنى دانابەك.
جول كولىك وقيعاسىنا قاراماي، استانالىق پوليسەيلەر جۇمىستارىن جالعاستىرا بەرگەنى كوپشىلىكتىڭ اشۋ-ىزاسىن تۋعىزدى. بەلگىلى ساياساتتانۋشى ەرلان سايىروۆ تارتىپكە جاۋاپتى ساقشىلاردىڭ ءوزى ءتارتىپتى ورەسكەل بۇزۋى قالىپتى جاعدايعا اينالىپ بارا جاتقانىن ايتادى.
«ولاردىڭ جازاسىن شىعارىپ، ولارعا بەلگىلى ءبىر قىزمەتتىك سونىمەن بىرگە قۇقىقتىق باعا بەرىلۋ كەرەك. ول باعا ءالى بەرىلمەگەن. بۇل ارينە قۇقىق قورعاۋ ورگاندارىنا قوعامنىڭ سەنىمىن ازايتپايدى. قازىرگى تاڭدا قوعامدا مۇلدە سەنىم جوق» - دەيدى ساياساتتانۋشى ەرلان سايىروۆ.
ايتا كەتسەم، بۇل پوليسەيلەردىڭ قاتىسۋىمەن بولىپ جاتقان العاشقى وقيعا ەمەس. ساياساتكەر كوپ جاعدايدا زاڭدى بەلشەسىنەن باسىپ، قىزمەتىن جالعاستىرا بەرەتىن قۇزىرلى ورگان وكىلدەرى جازاعا مىندەتتى تۇردە تارتىلۋى كەرەك دەپ سانايدى.
«قۇقىق قورعاۋ وكىلدەرى باسقا ءبىر زاڭ اياسىندا ءومىر سۇرەدى دا، ءبىزدىڭ باسقا ازاماتتار بارلىعى زاڭ اياسىندا ءومىر سۇرەدى دەگەن نارسە بۇل ادىلەتتى قوعام فورماسىنا مۇلدە سايكەس كەلمەيدى. سوندىقتان ولار وزدەرىنىڭ جازاسىن الۋى كەرەك. ول اكىمشىلىك، قىزمەتتىك جازا بولۋى مۇمكىن» - دەيدى ساياساتتانۋشى ەرلان سايىروۆ.
ال جول-كولىك وقيعاسى ەلوردالىق پوليسيانىڭ بەينەكامەرالارىنا ءتۇسىپ قالعان. الايدا قۇزىرلى ورگان بەينەجازبانى بەرمەك تۇگىلى وسى جاعدايعا بايلانىستى سۇحبات بەرگىسى كەلمەدى. بۇعان دەيىن اقپاراتتىق پورتالدارعا جازباشا جاۋاپ بەرگەن ىشكى ىستەر دەپارتامەنتىنىڭ باسپا ءسوز قىزمەتى قىزمەتكەرلەرىنە قاتىستى ەندى عانا تەرگەۋ باستالعانىن حابارلادى.
