مەكسيكالىق ساۋل "كانەلو" الۆارەس (49-1-2، 34 كو) LA Times باسىلىمىنا بەرگەن سۇحباتىندا ۇستالىپ قالعان دوپينگ سىناعى جانە گەنناديي گولوۆكينمەن (38-0-1، 34 كو) تەكەتىرەسى جايلى اڭگىمەلەدى دەپ حابارلايدى Qamshy.kz اقپارات اگەنتتىگى tengrinews.kz سايتىنا سىلتەمە جاساپ. 2017 جىلدىڭ قىركۇيەگىندە بوكسشىلار العاشقى جەكپە-جەگىن T-Mobile ارەناسىندا وتكىزىپ، سول كەزدەسۋدە جەڭىمپاز انىقتالماعان ەدى. 12 راۋند قورىتىندىسىندا ەسەپ تەڭ بولىپ، ارتى داۋعا ۇلاسقان ەدى.
ءبىر جىلدان كەيىن بوكسشىلار وسى رينگتە تاعى دا كەزدەسۋدى جوسپارلاپ وتىر. باستاپقىدا ەكىنشى كەزدەسۋ 5 مامىردا وتەدى دەلىنگەن، الايدا "كانەلو" دوپينگ سىناعىنان وتە الماي، شەتتەتىلگەن ەدى. وسىدان كەيىن تاراپتار قىركۇيەكتە كەزدەسۋگە كەلىستى.
"بۇعان ءتىپتى دە ۋايىمدامايمىن، - دەيدى الۆارەس ۇستالعان دوپينگ سىناعى جايلى. - مەن ءاردايىم العا ءجۇرىپ، ءوزىمنىڭ كىم ەكەنىمدى جانە نە ىستەگەنىمدى انىق بىلەمىن. ءاردايىم سابىرلى بولدىم. ۋاقىت وتە كەلە قانداي سىناق جايلى ايتىلعانى انىقتالادى. مەنىڭشە، بۇعان بولا ويلانىپ، قىمسىناتىن جاعداي ەمەس. كوميسسيا مەنىڭ قاساقانا جاساماعانىمدى بىلەدى، ءبىراق ءاردايىم ەرەجەنى ساقتاۋ قاجەت".
الۆارەس ءوزىن الاياق دەپ ايىپتاعان گولوۆكين مەن ونىڭ باپكەرى ابەل سانچەستىڭ مالىمدەمەلەرى جۇيكەسىنە ابدەن تيگەنىن مويىندادى. ءبىراق بارىنەن دە قاتتى مازالاتقانى - GGGء-دىڭ تابىستى تەڭ ءبولۋ تۋرالى تالابى ەكەن، سەبەبى ول دوپينگ سىناعى قارساڭىندا 35 پايىزعا دا كەلىسىپ تۇرعان. اقىرى قازاقستاندىق 40 پايىزدان اسا تابىس الاتىن بولدى.
"گولوۆكين اقشا ءۇشىن ەمەس، جەكپە-جەك ءۇشىن جۇدىرىقتاساتىنىن مالىمدەۋگە شەبەر. ءبىراق ول "اقشا ءۇشىن جۇدىرىقتاسپايمىن" دەپ الىپ، سول ءۇشىن عانا رينگكە شىعاتىن بوكسشى"، - دەدى "كانەلو". مۇنىمەن قاتار، مەكسيكالىق ەكىنشى كەزدەسۋدى ۋاقىتىنان بۇرىن اياقتاۋعا بەل بۋىپ وتىرعانىن اتاپ ءوتتى.
ايتۋىنشا، ءبىرىنشى كەزدەسۋدە ول گولوۆكيننىڭ دەنەسى مەن باسىنان سوققى جاساۋمەن بولعان. "قالىڭداتىلعان قولعاپتان بولىپ وتىر"، - دەدى "كانەلو". باسىلىمنىڭ مالىمەتىنشە، "كانەلو" جاتتىعۋ كەزىندە قولىن جاراقاتتاپ العاندىقتان وسىنداي قولعاپ كيگەن. ال ريەۆانشتا ول قالىڭداتىلماعان قولعاپپەن جۇدىرىقتاسپاق. "نوكاۋتقا ءتۇسىرۋدىڭ امالىن ءبىرىنشى راۋندتان باستاپ جاساۋعا نيەتتەمىن"، - دەدى الۆارەس.
پىكىر قالدىرۋ