بۇگىن «ازاماتتارعا ارنالعان ۇكىمەت» مەملەكەتتىك كورپوراسياسىنىڭ ماماندارى الماتىداعى مەكتەپ جارمەڭكەلەرىنە كەلۋشىلەرگە ەسق، اقپاراتتىق انىقتامالار بەردى جانە موبيلدىك ازاماتتار بازاسىنا تىركەدى. جاڭا وقۋ جىلىنىڭ قارساڭىندا كورپوراسيا فيليالى وقۋشىلاردىڭ اتا-انالارى كوپ جينالاتىن ورىندارعا قىزمەت كورسەتۋ سەكتورلارىن اشتى.
«جىل سايىن جاڭا وقۋ جىلى قارساڭىندا مەملەكەتتىك كورپوراسيانىڭ فرونت-وفيستەرىندە مەكتەپتەر مەن بالاباقشالار سۇراتاتىن قاجەتتى انىقتامالاردى الۋ ءۇشىن اتا-انالار لەگى كوبەيەدى. ءبىز جۇمىستاعى اتا-انالاردىڭ ۋاقىتىن ۇنەمدەۋ ءۇشىن مەكتەپ جارمەڭكەلەرىندە حالىققا قىزمەت كورسەتۋ سەكتورلارىن اشىپ وتىرمىز. بۇل جەردە مەكەنجاي انىقتامالارىن الۋعا بولادى، الداعى ۋاقىتتا مەملەكەتتىك قىزمەتتەردى ۇيدە نەمەسە جۇمىس ورنىندا وتىرىپ الۋلارى ءۇشىن ەلەكتروندىق ۇكىمەت پورتالىندا ءوز بەتىنشە جۇمىس ىستەۋدى ۇيرەتەمىز. سونىمەن قاتار، مەكتەپ نەمەسە بالاباقشا قىزمەت الۋشىعا SMS-حابارلاما جىبەرىپ، ول راستالعان سوڭ انىقتامانى وزدەرى الا بەرەتىن "انىقتاماسىز قىزمەت" سەرۆيسى جايلى دا ايتىپ تۇسىندىرەمىز. ءبىزدىڭ ماماندار تامىز ايىنىڭ سوڭىنا دەيىن مەكتەپ جارمەڭكەلەرىنە كەلۋشىلەرگە قىزمەت كورسەتىپ، كەڭەستەر بەرەدى» - دەدى «ازاماتتارعا ارنالعان ۇكىمەت» مەملەكەتتىك كورپوراسياسى الماتى قالاسى بويىنشا فيليالىنىڭ PR-مەنەدجەرى جاڭىل اپەتوۆا.
ەستەرىڭىزگە سالساق، "انىقتاماسىز قىزمەتتەر" جوباسى بويىنشا ءۇشىنشى جاق sms-حابارلاما ارقىلى قىزمەت الۋشىنىڭ كەلىسىمىمەن ءتورت ءتۇرلى انىقتامانى الۋعا مۇمكىندىگى بار. ول ءۇشىن ازاماتتار موبيلدىك ازاماتتار قورىندا تىركەلگەن بولۋى كەرەك، ال انىقتاما الاتىن بولسا – ەسق بولۋى ءتيىس.
جۇمىس مەحانيزمى قاراپايىم: مۇددەلى تۇلعا ەلەكتروندىق ۇكىمەت پورتالىندا اۆتوريزاسيادان ءوتۋى ءتيىس. سوسىن «ءۇشىنشى تۇلعالاردىڭ انىقتاما الۋى سەرۆيسى» ءبولىمىن تاڭداپ، قاي ازامات تۋرالى مالىمەت العىسى كەلەدى، سونىڭ جەكە سايكەستەندىرۋ ءنومىرىن جازۋى ءتيىس. ەگەر ازامات ءموبيلدى ازاماتتار بازاسىندا تىركەلگەن بولسا، مۇددەلى تۇلعا انىقتاما ءتۇرىن تاڭداپ، ءوزىنىڭ ەلەكتروندىق-سيفرلىق قولتاڭباسىمەن قول قويادى. سول ساتتە پورتال اۆتوماتتى تۇردە ازاماتقا SMS-حابارلاما جولداپ، ءۇشىنشى تۇلعاعا مالىمەت بەرۋ/بەرمەۋ جونىندە شەشىم قابىلداۋدى سۇرايدى.
موبيلدىك ازاماتتار قورىندا تىركەلۋ ءۇشىن پايدالانۋشى ەلەكتروندىق ۇكىمەت پورتالىنداعى جەكە كابينەتىندە تەلەفون ءنومىرىن ءوز جسن-ىنا بەكىتۋ كەرەك. نەمەسە «ازاماتتارعا ارنالعان ۇكىمەت» مەملەكەتتىك كورپوراسياسىنىڭ كەز-كەلگەن فرونت-وفيسىنە جۇگىنۋىنە بولادى.
